ರಂಗನವಾಡಿ ಗಲ್ಲಿ ಸುತ್ತಮುತ್ತ ಬಿಗಿ ಪಹರೆ: ಏಪ್ರಿಲ್ ನಾಲ್ಕರಂದು ನೆಗಡಿ, ಕೆಮ್ಮು, ಉಸಿರಾಟದ ತೊಂದರೆಯಿಂದ ವೃದ್ಧೆ ಜಿಲ್ಲಾಸ್ಪತ್ರೆಗೆ ದಾಖಲಾಗಿದ್ದಾರೆ. ಅದೇ ದಿನ ಪರೀಕ್ಷೆಗಾಗಿ ವೃದ್ಧೆಯ ಗಂಟಲ ದ್ರವ ಮತ್ತು ರಕ್ತದ ಮಾದರಿಯನ್ನು ಶಿವಮೊಗ್ಗ ಪ್ರಯೋಗಾಲಯಕ್ಕೆ ಕಳಿಸಲಾಗಿತ್ತು. ಏಪ್ರಿಲ್ 6ರಂದು ಸೋಂಕು ಇರುವ ಕುರಿತು ವೈದ್ಯಕೀಯ ವರದಿ ಜಿಲ್ಲಾಡಳಿತದ ಕೈಗೆ ಸಿಕ್ಕಿದೆ. ವೃದ್ಧೆಯ ವೈದ್ಯಕೀಯ ವರದಿ ಕರೊನಾ ಪಾಸಿಟಿವ್ ಬಂದ ಮೇಲೆ ಮಂಗಳವಾರ ಜಿಲ್ಲಾಡಳಿತವು ವೃದ್ಧೆ ವಾಸಿಸುವ ಗಲ್ಲಿ ಹಾಗೂ ಎಸ್.ಎಂ. ಕೃಷ್ಣ ನಗರವನ್ನು ಕಂಟೇನ್ವೆುಂಟ್ ಪ್ರದೇಶ ಎಂದು ಬಿಗಿ ಪಹರೆ ನಿಯೋಜಿಸಿತು. ಸೋಂಕಿತೆ ವಾಸಿಸುವ ಪ್ರದೇಶದ 500 ಮೀ. ಸುತ್ತಳತೆಯಲ್ಲಿ ಇರುವ ಎಲ್ಲ ಮನೆಗಳ ಜನರಿಗೆ ಯಾರೂ ಹೊರಗೆ ಬರಬಾರದು ಎಂದು ಸೂಚನೆ ನೀಡಲಾಯಿತಲ್ಲದೇ, ಆರೋಗ್ಯ ಇಲಾಖೆ ಸಿಬ್ಬಂದಿ, ಆಶಾ ಕಾರ್ಯಕರ್ತೆಯರು ಮನೆ ಮನೆ ತೆರಳಿ ಸರ್ವೆ ಕಾರ್ಯ ಆರಂಭಿಸಿದರು. ಆದರೆ, ಸೋಂಕು ಇರುವ ಕುರಿತು ಜಿಲ್ಲಾಡಳಿತ ಅಧಿಕೃತವಾಗಿ ಘೊಷಣೆ ಮಾಡದ್ದರಿಂದ ತೀವ್ರ ಗೊಂದಲ ಉಂಟಾಯಿತು. ಸೋಂಕು ಕುರಿತಂತೆ ಜಿಲ್ಲಾಧಿಕಾರಿ ಸಹಿವುಳ್ಳ ಜಿಲ್ಲಾಡಳಿತ ಪತ್ರಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿ ಅವಳಿನಗರದ ಜನರನ್ನು ಮತ್ತಷ್ಟು ಆತಂಕಕ್ಕೆ ದೂಡಿತು. ಒಂದು ಕಡೆಗೆ ಜಿಲ್ಲಾಧಿಕಾರಿ ವೃದ್ಧೆಗೆ ಸೋಂಕು ಇಲ್ಲ ಎಂದು ಹೇಳುತ್ತಿದ್ದರು. ಇನ್ನೊಂದು ಕಡಗೆ ಜಿಲ್ಲಾಧಿಕಾರಿ ಅವರ ಸಹಿವುಳ್ಳ ಪತ್ರಗಳು ಜಾಲತಾಣಗಳಲ್ಲಿ ಹರಿದಾಡಿದ್ದರಿಂದ ಸ್ವತಃ ಜಿಲ್ಲಾಡಳಿತವೇ ಏನೂ ಮಾಡದಂತಹ ಅಸಹಾಯಕ ಸ್ಥಿತಿಯನ್ನು ತಂದುಕೊಂಡಿತು.
