ಶ್ರೀಕೃಷ್ಣನ ನಾಡು ಉಡುಪಿಯಲ್ಲಿ ಕಾಂಗ್ರೆಸ್ಗೆ ಅಸ್ಥಿರತೆ ಕಾಡುತ್ತಿದೆ. ಆಸ್ಕರ ಫರ್ನಾಂಡಿಸ್ ನಿಧನಾನಂತರ ಜಿಲ್ಲಾ ಕಾಂಗ್ರೆಸ್ ನಾಯಕರಿಲ್ಲದ ಮನೆಯಂತಾಗಿದೆ. ಪಠ್ಯಪುಸ್ತಕದಲ್ಲಿ ನಾರಾಯಣಗುರು ಕಡೆಗಣನೆ, ರಾಜ್ಯ, ಕೇಂದ್ರ ಸರ್ಕಾರಗಳ ವಿರುದ್ಧ ಶಕ್ತಿಯುತವಾಗಿ ಧ್ವನಿ ಎತ್ತುವಲ್ಲಿ ಪ್ರಯತ್ನ ಮಾಡದಿರುವುದು ಪಕ್ಷಕ್ಕೆ ಗಮನಾರ್ಹ ಹಿನ್ನಡೆ. ಇದು ಜಿಲ್ಲೆಯಲ್ಲಿ ಬಿಜೆಪಿ ಗಟ್ಟಿಯಾಗಲು ಪರೋಕ್ಷ ಕಾರಣ. ಬಿಜೆಪಿ ಹಿಂದು ಅಜೆಂಡಾ ಮೂಲಕ ಬಿಗಿಹಿಡಿತ ಸಾಧಿಸಿದೆ. ಅಜಾನ್, ಲವ್ ಜಿಹಾದ್, ಹಿಜಾಬ್ ತೀರ್ಪಿನ ನಂತರ ಮುಸ್ಲಿಂ ಸಂಘಟನೆ ನಡೆಸಿದ ಬಂದ್, ಗೋಹತ್ಯೆ, ಗೋವು ಕಳವು ಘಟನೆಗಳನ್ನೇ ಹೈಲೈಟ್ ಮಾಡಿ ಬಿಜೆಪಿ ಮತ ಬ್ಯಾಂಕ್ ಭದ್ರಪಡಿಸಿದೆ. ಜಿಲ್ಲೆಯ ಐದು ಕ್ಷೇತ್ರಗಳಲ್ಲಿಯೂ ಹಿಂದುತ್ವ ಮತ್ತು ಪ್ರಧಾನಿ ನರೇಂದ್ರ ಮೋದಿ ವರ್ಚಸ್ಸು ನಿರಾಯಾಸ ಗೆಲುವಿನ ಸನಿಹಕ್ಕೆ ತಂದು ನಿಲ್ಲಿಸಲಿದೆ ಅಂದರೆ ತಪ್ಪಾಗದು. ಒಟ್ಟಾರೆ ಜಿಲ್ಲೆಯಲ್ಲಿ ಕಾಂಗ್ರೆಸ್ ಶಸ್ತ್ರ ತ್ಯಾಗಮಾಡಿದ್ದು, ಬಿಜೆಪಿಗೆ ಅನುಕೂಲವಾಗಿ ಪರಿಣಮಿಸಿದೆ.
