ಮಳೆಗಾಲದಲ್ಲಿ ಕೊಳಚೆ: ಇಲ್ಲಿ ಮಳೆಯಾಶ್ರಿತ ಭತ್ತ ಬೆಳೆಯಲಾಗುತ್ತದೆ. ಮಳೆ ಆರಂಭದ ನಂತರ ಕೃಷಿ ಚಟುವಟಿಕೆ ಬಿರುಸು ಪಡೆಯುತ್ತದೆ. ಆದರೆ, ಇದೇ ಸಮಯದಲ್ಲಿ ಸಮಸ್ಯೆ ಕೂಡ ಶುರುವಾಗುತ್ತದೆ. ನಗರದಿಂದ ಹರಿದು ಬರುವ ಮಳೆಯ ನೀರು, ಮಲಿನ ನೀರು ಗ್ರಾಮೀಣ ಭಾಗದಿಂದ ಮುಂದೆ ಹರಿದು ಹೋಗುವಂತೆ ರಾಜಕಾಲುವೆ ಮಾಡಲಾಗಿದೆ. ಆದರೆ, ರಾಜಕಾಲುವೆ ಇಲ್ಲಿನ ಭತ್ತ ಸಂಶೋಧನಾ ಕೇಂದ್ರದ ಹಿಂಭಾಗದವರೆಗಷ್ಟೇ ಮಾಡಲಾಗಿದೆ. ಅದರ ಮುಂದೆ ಕಚ್ಚಾ ಗಟಾರ ಹಾಗೆಯೇ ಉಳಿದಿದೆ. ಅದು ಕೂಡ ನಿರ್ವಹಣೆಯಿಲ್ಲದೆ ನೀರು ಹರಿದು ಹೋಗದ ಸ್ಥಿತಿ ಇದೆ. ಮಳೆಗಾಲದುದ್ದಕ್ಕೂ ತುಂಬಿ ಹರಿಯುವ ಈ ಕಚ್ಚಾ ಗಟಾರದ ತ್ಯಾಜ್ಯ ಮಿಶ್ರಿತ ನೀರು ಗದ್ದೆಗೆ ಬಂದು ಕೃಷಿ ಕಾಯಕ ಮಾಡದಂತೆ ತಡೆಯೊಡ್ಡುತ್ತದೆ. ನಗರದ ಸಂಪೂರ್ಣ ತ್ಯಾಜ್ಯ ಈ ಮಾರ್ಗದಲ್ಲಿಯೇ ಸಾಗುವ ಕಾರಣ ಪ್ಲಾಸ್ಟಿಕ್, ಬಾಟಲಿ, ಮನೆಗಳ ತ್ಯಾಜ್ಯ, ಮಾಂಸ ತ್ಯಾಜ್ಯ, ಇ- ತ್ಯಾಜ್ಯ, ವೈದ್ಯಕೀಯ ತ್ಯಾಜ್ಯ ಸೇರಿ ಎಲ್ಲ ಬಗೆಯ ತ್ಯಾಜ್ಯ ಗದ್ದೆಗೆ ಸೇರುತ್ತದೆ. ಮಳೆಗಾಲದ ಸಂದರ್ಭದಲ್ಲಿ ಇಲ್ಲಿನ ಜಮೀನು ಬಹುತೇಕ ಮುಳುಗಡೆಯಾಗಿರುತ್ತದೆ. ಹೀಗಾಗಿ, ಇಲ್ಲಿ ಕಾರ್ಯ ಮಾಡುವ ಕೃಷಿಕರು ಚರ್ಮರೋಗಕ್ಕೆ ತುತ್ತಾದ ಉದಾಹರಣೆಗಳು ಸಾಕಷ್ಟಿವೆ.
