ಚಿಕ್ಕಚಾಗಳ್ಳಿ, ಪೂಜೆಕೊಪ್ಪಲು ಮತ್ತು ಕೊಂಗಲಬೀಡು ಈ ಮೂರು ಗ್ರಾಮದ ಜೀವನಾಡಿಯಾದ ಈ ಕೆರೆ ಹೇಮಾವತಿ ಬಲದಂಡೆ ನಾಲೆ ಹಾಗೂ ಮಳೆಯ ನೀರಿನಿಂದ ಸಂಪೂರ್ಣ ಭರ್ತಿಯಾಗಿದೆ. ಬೇಸಿಗೆ ಸಮಯದಲ್ಲಿ ಬಿಟ್ಟರೆ ಉಳಿದ ಅವಧಿಯಲ್ಲಿ ತುಂಬಿರುತ್ತದೆ. ಏರಿಯ ಮಧ್ಯ ಭಾಗದಲ್ಲಿ ಪ್ರತಿನಿತ್ಯ ನೀರು ಕುಡಿಸಲು ಹಾಗೂ ಜನರು ಜಾನುವಾರುಗಳನ್ನು ತೊಳೆಯಲು ಇಳಿಸುತ್ತಾರೆ. ಹಲವು ದಿನಗಳಿಂದ ಇದೇ ರೀತಿ ಚಟುವಟಿಕೆ ನಿರಂತರವಾಗಿ ನಡೆಯುತ್ತಿರುವುದರಿಂದ ಕೆರೆ ಏರಿಯ ತಡ ಕುಸಿಯುತ್ತಾ ಬಂದಿದೆ. ಅರ್ಧ ಏರಿ ರಸ್ತೆವರೆಗೆ ಕುಸಿದಿದೆ. ಇದೇ ರೀತಿ ಮುಂದುವರಿದರೆ ಕೆಲವೇ ದಿನಗಳಲ್ಲಿ ಕೆರೆಏರಿ ಒಡೆಯುವ ಸಾಧ್ಯತೆ ಇದೆ. ನೀರಿನ ಒತ್ತಡಕ್ಕೆ ಕೆರೆ ಏರಿಯ ಮಣ್ಣು ಕುಸಿದು ಬಿರುಕು ಬಿಟ್ಟು ಕೆರೆಯ ನೀರು ಪೋಲಾಗುವುದರ ಜತೆಗೆ ನೂರಾರು ಎಕರೆ ಭೂಪ್ರದೇಶದಲ್ಲಿ ಬೆಳೆದಿರುವ ಭತ್ತದ ಬೆಳೆ ನಾಶವಾಗುವ ಆತಂಕ ಎದುರಾಗಿದೆ.
