ಕುಮಾರ ಗಂಧರ್ವ ಕಲಾಮಂದಿರಕ್ಕೆ ಹೈಟೆಕ್ ಸ್ಪರ್ಶ

ಬೆಳಗಾವಿ: ಸದಾ ಕನ್ನಡ ಚಟುವಟಿಕೆಗಳ ತಾಣವಾಗಿ ಎರಡು ದಶಕ ಪೂರೈಸಿರುವ ಕುಮಾರ ಗಂಧರ್ವ ಕಲಾಮಂದಿರ ಇದೀಗ ಹೈಟೆಕ್ ಸ್ವರೂಪ ಪಡೆದುಕೊಂಡಿದೆ. ಅದಕ್ಕಾಗಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಲೋಕೋಪಯೋಗಿ ಮಹಾನಗರ ಪಾಲಿಕೆ 1.20 ಕೋಟಿ ರೂ. ವೆಚ್ಚ ಮಾಡಿವೆ.

ಗಡಿಭಾಗವಾದ ಬೆಳಗಾವಿ ನಗರದಲ್ಲಿ ನಿರಂತರವಾಗಿ ಕನ್ನಡಪರ ಚಟುವಟಿಕೆಗಳು, ಸಂಸ್ಕೃತಿ ಕಾರ್ಯಕ್ರಮಗಳು ನಡೆಯಬೇಕು ಎಂಬ ಉದ್ದೇಶದಿಂದ ನಿರ್ಮಾಣಗೊಂಡಿದ್ದ ಕುಮಾರ ಗಂಧರ್ವ ಕಲಾಮಂದಿರ 1999ರಲ್ಲಿ ಲೋಕಾರ್ಪಣೆಗೊಂಡಿತ್ತು. ಆದರೆ, ಸಮರ್ಪಕವಾಗಿ ನಿರ್ವಹಣೆ ಕೊರತೆ, ಆರ್ಥಿಕ ಸಮಸ್ಯೆ ಕಾರಣಗಳಿಂದಾಗಿ ಕಟ್ಟಡ ಸಂಪೂರ್ಣ ಹಾಳಾಗಿತ್ತು. ಇದರಿಂದ ಸಾರ್ವಜನಿಕರು ಕುಮಾರ ಗಂಧರ್ವ ಕಲಾಮಂದಿರ ಬಳಕೆ ಕಡಿಮೆ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ 2021ರಲ್ಲಿ ಕಲಾಮಂದಿರ ನವೀಕರಣ ಕಾಮಗಾರಿ ಆರಂಭವಾಗಿತ್ತು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸ್ವಂತ ನಿಧಿ ಹಾಗೂ ಲೋಕೋಪಯೋಗಿ ಇಲಾಖೆಯ 88 ಲಕ್ಷ ರೂ. ಅನುದಾನದಲ್ಲಿ ವಿದ್ಯುತ್, ಶೌಚಗೃಹ, ಕುಡಿಯುವ ನೀರು, ವೇದಿಕೆ, ಕುರ್ಚಿಗಳು ಸೇರಿ ವಿವಿಧ ಹೈಟೆಕ್ ಸೌಲಭ್ಯ ಕಲ್ಪಿಸಿಲಾಗಿದೆ. ಇನ್ನೂ ಮಹಾನಗರ ಪಾಲಿಕೆಯ 32 ಲಕ್ಷರೂ. ಅನುದಾನದಲ್ಲಿ ಹೈಟೆಕ್ ಸೌಂಡ್ ಸಿಸ್ಟಂ, ವೈರಿಂಗ್, ಹೊರ ಆವರಣದಲ್ಲಿ ಊಟದ ಭವನ ಸೇರಿ ಇತರ ಸೌಲಭ್ಯ ಕಲ್ಪಿಸಲಾಗಿದೆ ಎಂದು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಪಾಲಿಕೆ ಅಧಿಕಾರಿಗಳು ತಿಳಿಸಿದ್ದಾರೆ.