ಕಿಮ್ಮತ್ತು ಸಿಗುತ್ತಿಲ್ಲವೆಂದಿದ್ದ ಕಾಂಗ್ರೆಸ್ಸಿಗರು

ಹುಬ್ಬಳ್ಳಿ : ಕಾಂಗ್ರೆಸ್​ನಲ್ಲಿ ಗುಲಾಮಿತನ ಇನ್ನೂ ಇದೆ. ಪಕ್ಷದಲ್ಲಿ ನಾಯಿಗೆ ಕಿಮ್ಮತ್ತು ಇದೆ, ನಮಗೆ ಮರ್ಯಾದೆ ಇಲ್ಲವೆಂದು ಅನೇಕ ಕಾಂಗ್ರೆಸ್ಸಿಗರು ಹೇಳಿದ್ದಾರೆ. ಪಕ್ಷದಲ್ಲಿ ನಮ್ಮದೇನೂ ನಡೆಯುವುದಿಲ್ಲ, ಎಲ್ಲ ಗಾಂಧಿ ಪರಿವಾರದ್ದೇ ನಡೆಯುವುದೆಂದು ಆ ಪಕ್ಷದ ಬಹಳಷ್ಟು ಮುಖಂಡರು ಕಾಲಕಾಲಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಎಂದು ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ಟೀಕಿಸಿದ್ದಾರೆ.

ನಗರದಲ್ಲಿ ಶುಕ್ರವಾರ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಅವರು, ಇದೇ ಸಿದ್ದರಾಮಯ್ಯ ಈ ಹಿಂದೆ ಕಾಂಗ್ರೆಸ್ ವಿರುದ್ಧ ಏನೇನು ಮಾತನಾಡಿದ್ದಾರೆಂದು ನೆನಪಿಸಿಕೊಳ್ಳಲಿ ಎಂದರು.

ತಮ್ಮ ಪಕ್ಷದವರು ಹಣ ಪಡೆದು ಟಿಕೆಟ್ ಹಂಚುತ್ತಾರೆಂದು ಕಾಂಗ್ರೆಸ್​ನವರೇ ಹೇಳುತ್ತಾರೆ. ಸೋನಿಯಾ ಗಾಂಧಿ, ರಾಹುಲ್ ಗಾಂಧಿ ಅವರ ಮನೆಯ ಎದುರು ಟಿಕೆಟ್ ಆಕಾಂಕ್ಷಿಗಳು ತಿರುಗಾಡುವುದನ್ನು ನೋಡಿದರೆ ಬ್ರೋಕರ್ ಯಾರೆಂಬುದು ಗೊತ್ತಾಗುತ್ತದೆ ಎಂದರು.

ದೇಶದಲ್ಲಿ ಭ್ರಷ್ಟಾಚಾರದ ರಕ್ತ ಬೀಜಾಸುರನನ್ನು ಹುಟ್ಟಿಸಿದ್ದೇ ಕಾಂಗ್ರೆಸ್. ಜವಾಹರಲಾಲ್ ನೆಹರು ಅವರಿಂದ ಹಿಡಿದು ಸಿದ್ದರಾಮಯ್ಯ, ಮಲ್ಲಿಕಾರ್ಜುನ ಖರ್ಗೆವರೆಗಿನ ಆ ಪಕ್ಷದ ಎಲ್ಲ ನಾಯಕರು ಭ್ರಷ್ಟ ವ್ಯವಸ್ಥೆ ನಿರ್ಮಾಣ ಮಾಡಿದ್ದಾರೆ ಎಂದು ದೂರಿದರು.

ಮಲ್ಲಿಕಾರ್ಜುನ ಖರ್ಗೆ ಅವರು ಬಹಳ ಮಾತನಾಡಿದರೆ ಅವರನ್ನು ರಾಷ್ಟ್ರೀಯ ನಾಯಕನ್ನೆನ್ನುತ್ತಾರೆ ಎಂದುಕೊಂಡಿರಬಹುದು. ಆ ಪಕ್ಷ ಬೂತಕಾಲದ ಪಾರ್ಟಿ ಎನ್ನುವುದನ್ನು ನೆನಪಿನಲ್ಲಿ ಇಟ್ಟುಕೊಳ್ಳಬೇಕು ಎಂದು ಹೇಳಿದರು.