ಗಜೇಂದ್ರಗಡ: ಕಿಡಿಗೇಡಿಗಳು ಕಾಲಕಾಲೇಶ್ವರ ಗುಡ್ಡಕ್ಕೆ ಶನಿವಾರ ಸಂಜೆ ಬೆಂಕಿ ಹಚ್ಚಿರುವುದರಿಂದ ಕುರುಚಲು ಕಾಡು ಬೆಂಕಿಗೆ ಆಹುತಿಯಾಗಿದೆ. ಕಳೆದ ಎರಡ್ಮೂರು ದಿನಗಳಿಂದ ಕಿಡಿಗೇಡಿಗಳು ಕತ್ತಲಾಗುತ್ತಿದ್ದಂತೆ ಈ ಭಾಗದ ಗುಡ್ಡದ ತುದಿಗೆ ಹೋಗಿ ಬೆಂಕಿ ಹಾಕುತ್ತಿದ್ದು ಸಾಲು ಗುಡ್ಡಗಳು ಇಡೀ ರಾತ್ರಿ ಹೊತ್ತಿ ಉರಿಯುತ್ತಿವೆ. ಗುಡ್ಡಕ್ಕೆ ಬೆಂಕಿ ಹಾಕಿದರೆ ಹುಲ್ಲು ಚಿಗುರುತ್ತದೆ ಎಂಬ ತಪ್ಪು ಕಲ್ಪನೆ ಈ ಭಾಗದ ಕುರಿಕಾಯುವರಲ್ಲಿ ಬಲವಾಗಿ ಬೇರೂರಿದೆ. ಗುಡ್ಡದ ತುದಿಯವರೆಗೂ ಹೋಗುವ ಕುರಿ ಹಾಗೂ ದನಗಾಹಿಗಳು ಸಂಜೆ ಗುಡ್ಡ ಇಳಿಯುವಾಗ ಒಣ ಹುಲ್ಲಿಗೆ ಬೆಂಕಿ ಹಚ್ಚಿ ಬರುತ್ತಾರೆ. ಗಾಳಿ ಬೀಸಿದ ಕಡೆ ಬೆಂಕಿ ಪಸರಿಸಿ ಇಡೀ ಗುಡ್ಡದ ಕಾಡನ್ನು ಬಲಿತೆಗೆದುಕೊಳ್ಳುತ್ತಿದೆ.
