ಕಾಯಿಲೆ ಗುಣಪಡಿಸುವ ಪ್ರಸನ್ನ ಲಕ್ಷ್ಮೀ ವೆಂಕಟರಮಣಸ್ವಾಮಿ : ಪ್ರತಿವರ್ಷ ವಿಶೇಷ ಬ್ರಹ್ಮೋತ್ಸವ, ಆಂಧ್ರ, ತಮಿಳುನಾಡಿನಿಂದಲೂ ಹರಿದುಬರುವ ಭಕ್ತಸಾಗರ

ವೈ.ಶಿವಶಂಕರ್​, ಕೆಜಿಎಫ್​

ಹತ್ತಾರು ಗ್ರಾಮಗಳಲ್ಲಿ ಹರಡಿದ್ದ ದಡಾರ ಕಾಯಿಲೆಯು ಇದ್ದಕ್ಕಿದ್ದಂತೆ ಶಮನಗೊಳ್ಳುವಲ್ಲಿ ನಗರದ ಶ್ರೀ ಪ್ರಸನ್ನ ಲಕ್ಷ್ಮೀ ವೆಂಕಟರಮಣಸ್ವಾಮಿ ಅನುಗ್ರಹ ಜನಜನಿತವಾಗಿದೆ.

ಕೆಜಿಎ್​ ನಗರದ ರಾರ್ಬಟ್​ಸನ್​ಪೇಟೆಯಲ್ಲಿರುವ ಪ್ರಸಿದ್ಧ ಶ್ರೀ ಲಕ್ಷ್ಮೀ ವೆಂಕಟರಮಣಸ್ವಾಮಿ ದೇಗುಲವು ಮುಜರಾಯಿ ಇಲಾಖೆಯ ಸಿ ದರ್ಜೆಗೆ ಒಳಪಟ್ಟಿದ್ದು, ಹಲವು ವರ್ಷಗಳ ಇತಿಹಾಸ ಮತ್ತು ರೋಚಕತೆಗೆ ಸಾಯಾಗಿದೆ.

ಇತಿಹಾಸ: ಬ್ರಿಟಿಷರ ಆಳ್ವಿಕೆ ಕಾಲದಲ್ಲಿ ರಾರ್ಬಟ್​ಸನ್​ ಎಂಬ ವ್ಯಕ್ತಿಯು ಕೆಎಫ್ ನಗರ ಪ್ರದೇಶದಲ್ಲಿ ವಾಸಿಸುತ್ತಿದ್ದನು. ಆದ್ದರಿಂದ ಈ ಪ್ರದೇಶಕ್ಕೆ ರಾರ್ಬಟ್​ಸನ್​ಪೇಟೆ ಎಂದು ನಾಮಾಂಕಿತವಾಯಿತು. ಬ್ರಿಟಿಷ್​ ಕಾಲಾವಧಿಯಲ್ಲಿ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಭಯಾನಕವಾಗಿ ಜನರನ್ನು ಕಾಡುತ್ತಿದ್ದ ಸಾಂಕ್ರಾಮಿಕ ಕಾಯಿಲೆಯಾದ ದಡಾರ ಕಾಣಿಸಿಕೊಂಡು ಹಲವು ಗ್ರಾಮಸ್ಥರು ಸಾಯತೊಡಗಿದ್ದರು. ನಗರದ ಗೀತಾ ರಸ್ತೆಯಲ್ಲಿ ವಾಸವಿದ್ದ ಭಾಸ್ಕರ್​ನಾಯ್ಡು ಎಂಬುವವರು ಮನೆಯ ಮುಂಭಾಗದಲ್ಲಿ ಖಾಲಿ ಇದ್ದ ಜಾಗವನ್ನು ಮೈಸೂರು ಮಹಾರಾಜರಿಗೆ ಒಪ್ಪಿಸಿ ಇಲ್ಲಿ ಶ್ರೀ ಪ್ರಸನ್ನ ಲಕ್ಷ್ಮೀ ವೆಂಕಟರಮಣಸ್ವಾಮಿ ದೇವರ ಪೂಜೆ ನೆರವೇರಿಸಿ ಹರಕೆ ಹೊತ್ತಿದ್ದರಿಂದ ಸಾಂಕ್ರಾಮಿಕ ಕಾಯಿಲೆಗಳು ತಗ್ಗಿತ್ತು ಎಂಬ ನಂಬಿಕೆಯಿದೆ. ಈ ಹಿನ್ನಲೆಯಲ್ಲಿ ಊರಿನ ಮುಖಂಡರಿಂದ ಚಿಕ್ಕ ದೇವಾಲಯ ನಿರ್ಮಿಸಿ ಬ್ರಹ್ಮೋತ್ಸವ ಆಯೋಜಿಸುತ್ತ ಬರಲಾಗುತ್ತಿದೆ.

ವಿಶೇಷ ಬ್ರಹ್ಮೋತ್ಸವ: ಪ್ರತಿವರ್ಷ ಫೆಬ್ರವರಿಯಲ್ಲಿ 13 ದಿನಗಳ ಕಾಲ ಬ್ರಹ್ಮೋತ್ಸವ ಮತ್ತು ಹಲವು ಉತ್ಸವಗಳನ್ನು ಏರ್ಪಡಿಸಲಾಗುತ್ತದೆ. ಚಿಕ್ಕತಿರುಪತಿಯ ತಿರುಮಲ ದೇವಾಲಯದ ಆಗಮಿಕರೊಂದಿಗೆ ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ. ಉತ್ಸವಕ್ಕೆ ಜಿಲ್ಲೆ ಸೇರಿ ನೆರೆಯ ಆಂಧ್ರ, ತಮಿಳುನಾಡಿನಿಂದಲೂ ಅಪಾರ ಭಕ್ತರು ಆಗಮಿಸುವುದು ವಾಡಿಕೆ.

ಕಲ್ಯಾಣಿ ಜೀಣೋರ್ದ್ಧಾರ: ದೇವಾಲಯ ಹಿಂಭಾಗದಲ್ಲಿರುವ ಪುರಾತನ ಕಲ್ಯಾಣಿಯನ್ನು ಇತ್ತೀಚೆಗೆ ಜೀಣೋರ್ದ್ಧಾರ ಮಾಡಲಾಗಿದೆ. ಇದರಿಂದ ಪ್ರತಿ ವರ್ಷ ಫೆಬ್ರವರಿಯಲ್ಲಿ ನಡೆಯುವ ಜಾತ್ರೆ ವೇಳೆ ಕಲ್ಯಾಣಿಯಲ್ಲಿ ವಿಶೇಷ ಪೂಜೆ ನೆರವೇರಿಸಲಾಗುತ್ತದೆ.