ಕಾಫಿ, ಅಡಕೆ, ಬಾಳೆ ಬೆಳೆ ನಾಶ

ಬೇಲೂರು: ತಾಲೂಕಿನ ಅರೇಹಳ್ಳಿ ಸಮೀಪದ ಮಾಲಹಳ್ಳಿ ಕೆರೆಯಲ್ಲಿ ಬುಧವಾರ ರಾತ್ರಿ ಈಜಾಡಿದ 15ಕ್ಕೂ ಹೆಚ್ಚು ಆನೆಗಳ ಹಿಂಡು ನಂತರ ಪಕ್ಕದ ತೋಟಕ್ಕೆ ದಾಳಿ ಮಾಡಿ ಬೆಳೆ ನಾಶಪಡಿಸಿವೆ.

ಅರೇಹಳ್ಳಿ ಸಮೀಪದ ಪ್ಲಾಂಟರ್ಸ್ ಕ್ಲಬ್ ಸಮೀಪ ಕಾಣಿಸಿಕೊಂಡಿದ್ದ ಕಾಡಾನೆಗಳು, ಅಕ್ಕಪಕ್ಕದ ತೋಟಗಳ ಮೂಲಕ ಅರೇಹಳ್ಳಿ ಸಮೀಪದ ಮಾಲಹಳ್ಳಿಯ ಎಚ್.ಎನ್.ಚಂದ್ರು ಅವರ ತೋಟದಲ್ಲಿರುವ ಕೆರೆಯ ನೀರಿನಲ್ಲಿ ಸಾಕಷ್ಟು ಸಮಯದವರೆಗೂ ಈಜಾಡಿವೆ. ನಂತರ ನೇರವಾಗಿ ಪಕ್ಕದಲ್ಲಿದ್ದ ಕಾಫಿ ತೋಟಕ್ಕೆ ನುಗ್ಗಿ ತೋಟದಲ್ಲಿ ಹುಲುಸಾಗಿ ಬೆಳೆದಿದ್ದ ಕಾಫಿ, ಅಡಕೆ, ಹಾಗೂ ಫಸಲಿಗೆ ಬಂದಿದ್ದ ಬಾಳೆ ಬೆಳೆಯನ್ನು ನಾಶಪಡಿಸಿವೆ. ಕಾಡಾನೆಗಳ ದಾಳಿಗೆ ಗಿಡಗಳೆಲ್ಲವನ್ನೂ ನೆಲಕ್ಕುರುಳಿಸಿವೆ. ಜತೆಗೆ ಪೈಪ್‌ಗಳನ್ನು ತುಳಿದು ಹಾಕಿವೆ.

ಮಾಲಳ್ಳಿಯಲ್ಲಿರುವ ನಮ್ಮ ತೋಟಕ್ಕೆ ಬುಧವಾರ ರಾತ್ರಿ 15ಕ್ಕೂ ಹೆಚ್ಚಿನ ಕಾಡಾನೆಗಳು ದಾಳಿ ಮಾಡಿ ಕಾಫಿ, ಬಾಳೆ ಹಾಗೂ ಅಡಕೆ ಗಿಡಗಳನ್ನು ನಾಶ ಮಾಡಿವೆ. ಜತೆಗೆ ಪೈಪ್‌ಗಳನ್ನು ತುಳಿದು ಹಾಳು ಮಾಡಿವೆ. ಆನೆಗಳು ಗಿಡಗಳನ್ನು ಬುಡ ಸಮೇತ ಕಿತ್ತು ಎಸೆಯುವುದು, ಮರಗಳನ್ನು ಉರುಳಿಸುವುದರಿಂದ ಮತ್ತೆ ಬೆಳೆ ಬೆಳೆಯಲು ಕಷ್ಟವಾಗುತ್ತದೆ. ಈಗಾಗಲೇ ಸಾಕಷ್ಟು ನಷ್ಟ ಉಂಟಾಗಿದೆ. ಮುಂದಿನ ದಿನಗಳಲ್ಲಾದರೂ ಈ ಭಾಗದ ಬೆಳೆಗಾರರು, ರೈತರು, ಕಾರ್ಮಿಕರು ನೆಮ್ಮದಿ ಜೀವನ ನಡೆಸಲು ಕಾಡಾನೆಗಳನ್ನು ಶಾಶ್ವತವಾಗಿ ಕಡಿಗಟ್ಟುವ ಕೆಲಸವನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಮಾಡಲು ಮುಂದಾಗಬೇಕಿದೆ.

ಎಚ್.ಎನ್.ಚಂದ್ರು, ಮಾಲಹಳ್ಳಿ ಅರೇಹಳ್ಳಿ ಹೋಬಳಿ