ಮಾವಿನಮನೆ ಗ್ರಾ.ಪಂ. ವ್ಯಾಪ್ತಿಯ ಬಾಸಲದಿಂದ 2-3 ಕಿ.ಮೀ. ದೂರದಲ್ಲಿರುವ ಕಾನೂರು ಜಲಪಾತವು ಹಳ್ಳವೊಂದರಿಂದ ನಿರ್ವಣವಾಗಿದೆ. ಕಾನೂರಿನಲ್ಲಿ ಇತರ ಜಲಪಾತಗಳಂತೆ ಜಲಧಾರೆಯನ್ನು ಎದುರಿನಿಂದ ನಿಂತು ಇದನ್ನು ನೋಡಲಾಗದು. ಬದಲಾಗಿ ನೀರು ಬೀಳುವ ಸ್ಥಳದಿಂದ, ಅಂದರೆ ಮೇಲಿನಿಂದಲೇ ನಿಂತು ವೀಕ್ಷಿಸಬೇಕು. ಹಳ್ಳದಲ್ಲಿ ಅಪಾಯಕಾರಿ ಗುಂಡಿಗಳಿದ್ದು, ನೀರು ಬೀಳುವುದನ್ನು ಮೇಲೆ ನಿಂತು ವೀಕ್ಷಿಸಬೇಕಾಗಿರುವುದು ಅಪಾಯಕಾರಿಯಾಗಿ ಪರಿಣಮಿಸಿದೆ. ಆಯತಪ್ಪಿ ಬಿದ್ದರೆ ನೀರಿನ ಜತೆ ಪ್ರಪಾತ ಸೇರುವ ಅಪಾಯವಿದೆ. ನಿತ್ಯ ನೂರಾರು ಪ್ರವಾಸಿಗರು ದೂರದ ಊರುಗಳಿಂದ ಜಲಪಾತಕ್ಕೆ ಬರುತ್ತಾರೆ. ಕಳೆದ ವರ್ಷ ಇಲ್ಲಿ ಕಾಲುಜಾರಿ ಬಿದ್ದು ಹುಬ್ಬಳ್ಳಿಯ ಪ್ರವಾಸಿಗನೊಬ್ಬ ಮೃತಪಟ್ಟಿದ್ದ. ಈ ಬಾರಿಯೂ ಭಾನುವಾರವಷ್ಟೇ ಹುಬ್ಬಳ್ಳಿಯ ಯುವಕನೊಬ್ಬ ನೀರಿನಲ್ಲಿ ಬಿದ್ದು ಮೃತಪಟ್ಟಿದ್ದಾನೆ. ಹೀಗೆ ಪ್ರವಾಸಿಗರಿಗೆ ಅಪಾಯವಾಗುವ ಘಟನೆಗಳು ನಡೆಯುತ್ತಿದ್ದರೂ ಜಲಪಾತ ವೀಕ್ಷಣೆಯ ಸ್ಥಳದಲ್ಲಿ ಸ್ಥಳೀಯ ಆಡಳಿತದಿಂದಾಗಲಿ, ಸಂಬಂಧಪಟ್ಟವರಿಂದಾಗಲಿ ಸುರಕ್ಷೆಗೆ ಯಾವುದೇ ಕ್ರಮ ಕೈಗೊಂಡಿಲ್ಲ. ಕಳೆದ ವರ್ಷ ಪ್ರವಾಸೋದ್ಯಮ ಇಲಾಖೆಯಿಂದ ನಿರ್ವಹಣೆಯ ಹೆಸರಿನಲ್ಲಿ ಸೂಚನಾ ಫಲಕಗಳ ಅಳವಡಿಕೆ, ರಸ್ತೆ ದುರಸ್ತಿ ಸೇರಿ ಕೆಲ ಕಾಮಗಾರಿಗಳು ನಡೆದಿವೆ. ಆದರೆ, ಇಲಾಖೆ ಪ್ರವಾಸಿಗರ ಸುರಕ್ಷೆಗೆ ಇದು ಸಾಕಾಗುತ್ತಿಲ್ಲ.
