ತಾಲೂಕಿನ ಮಲೆನಾಡು ಭಾಗದ ಬಿಕ್ಕೋಡು ಹೋಬಳಿಯ ಜಗಬೋರನಹಳ್ಳಿ ಅರಣ್ಯ ಪ್ರದೇಶದಲ್ಲಿ ಬೀಡು ಬಿಟ್ಟಿರುವ ಕಾಡಾನೆಗಳು ಸಂಜೆಯಾಗುತಿದ್ದಂತೆಯೇ ಅಪಕ್ಕಪಕ್ಕದ ಗ್ರಾಮಗಳ ಜಮೀನುಗಳತ್ತ ನುಗ್ಗುತ್ತಿವೆ. ಹಿಂಡು ಹಿಂಡಾಗಿ ದಾಳಿ ಇಟ್ಟು ಬೆಳೆ ನಾಶ ಪಡಿಸುತ್ತಿರುವ 25 ಕ್ಕೂ ಹೆಚ್ಚು ಕಾಡಾನೆಗಳು ಕಳೆದ ತಿಂಗಳು ಬಿಕ್ಕೋಡು ಸಮೀಪದ ಚಿಕ್ಕ ಬಿಕ್ಕೋಡು, ಮತ್ತಾವರ, ಸುಂಡೆಕೆರೆ, ನಿಡುಮನಹಳ್ಳಿ, ಜಗಬೋರನಹಳ್ಳಿ ಸೇರಿದಂತೆ ಇತರೆ ಗ್ರಾಮಗಳ ಸುತ್ತಮುತ್ತ ಕಾಣಿಸಿಕೊಂಡಿದ್ದವು. ಸಾಕಷ್ಟು ಬೆಳೆ ನಾಶ ಪಡಿಸಿದ್ದವು. ಆದರೆ ಇತ್ತೀಚಿನ ದಿನಗಳಲ್ಲಿ ಇದೇ ಆನೆಗಳು ಬಿಕ್ಕೋಡು ಹೋಬಳಿಯ ಕೋಗಿಲಮನೆ, ಬೊಮ್ಮಡಿಹಳ್ಳಿ ಮೂಲಕ ಕಸಬಾ ಹೋಬಳಿಯ ಕೊತ್ತನಹಳ್ಳಿ, ಹಿರಿಕೊಲೆ, ಚಿಕ್ಕೋಲೆ, ತಗರೆ ಗ್ರಾಮಗಳ ಜಮೀನುಗಳಿಗೆ ದಾಳಿ ಇರಿಸಿವೆ.
