ಕಳಪೆ ಟಾರ್ಪಾಲ್ ವಿತರಣೆ; ಹೊಸತನ್ನು ನೀಡುವುದಾಗಿ ಹೇಳಿ ತಿಂಗಳುಗಳೇ ಕಳೆದರೂ ಪರಿಹಾರ ಇಲ್ಲ

ಆನೇಕಲ್: ಕೃಷಿ ಭಾಗ್ಯ ಯೋಜನೆಯಡಿ ಕೃಷಿ ಹೊಂಡಗಳಿಗೆ ವಿತರಿಸಿರುವ ಟಾರ್ಪಾಲ್ ಕಳಪೆಯಾಗಿದೆ ಆನೇಕಲ್ ತಾಲೂಕಿನ ಸಮಂದೂರು ಗ್ರಾಮದ ರೈತರು ಅಳಲು ತೋಡಿಕೊಂಡಿದ್ದಾರೆ.

ಸಮಂದೂರು ಗ್ರಾಮದ ರೈತ ಮುನಿಸ್ವಾಮಿ ಕೃಷಿ ಇಲಾಖೆಯಿಂದ ಟಾರ್ಪಾಲ್ ಪಡೆದಿದ್ದು, ಅದನ್ನು ಕೃಷಿ ಹೊಂಡಕ್ಕೆ ಹಾಕಿದ ಒಂದು ವಾರಕ್ಕೇ ಹರಿದು ಹೋಗಿದ್ದು, ಟಾರ್ಪಾಲ್‌ನಲ್ಲಿ ಸಣ್ಣಸಣ್ಣ ತೂತು ಬಿದ್ದು ಶೇಖರಣೆಗೊಂಡ ಮಳೆ ನೀರು ಇಂಗುತ್ತಿದೆ.

ರೈತರ ಆರ್ಥಿಕ ಅಭಿವೃದ್ಧಿಗಾಗಿ ಸರ್ಕಾರ ನಾನಾ ಯೋಜನೆಗಳ ಮೂಲಕ ವಿತರಿಸುವ ಸಾಮಗ್ರಿಗಳು ಕಳಪೆಯಾಗಿರುವುದರಿಂದ ರೈತರು ಸಮಸ್ಯೆ ಎದುರಿಸುವಂತಾಗಿದೆ. ಕೃಷಿ ಹೊಂಡಗಳನ್ನು ತೆಗೆಸಲು ಮುಂದಾದ ಸರ್ಕಾರ ಸಹಾಯಧನ ನೀಡಿತ್ತು. ಈ ಯೋಜನೆಯಿಂದ ತಾಲೂಕಿನಲ್ಲಿ ನೂರಾರು ರೈತರಿಗೆ ಅನುಕೂಲವಾಗುವ ಭರವಸೆ ಇತ್ತು. ಆದರೆ ಕಳಪೆ ಟಾರ್ಪಾಲ್ ವಿತರಣೆಯಿಂದ ಶೇಖರಣೆಗೊಂಡ ಮಳೆ ನೀರು ಹೊಂಡಗಳಲ್ಲಿ ನಿಲ್ಲುತ್ತಿಲ್ಲ ಎಂದು ರೈತರು ಆರೋಪಿಸುತ್ತಿದ್ದಾರೆ.

ಈ ಬಗ್ಗೆ ಕೃಷಿ ಇಲಾಖೆ ಅಧಿಕಾರಿಗಳಿಗೆ ಸಾಕಷ್ಟು ಬಾರಿ ದೂರು ನೀಡಿದ ಬಳಿಕ ನೆಪಮಾತ್ರಕ್ಕೆ ಪರಿಶೀಲಿಸಿ ಹೋದ ಅಧಿಕಾರಿಗಳು ಮೇಲಧಿಕಾರಿಗಳಿಗೆ ಪತ್ರ ಬರೆದು ಹೊಸ ಟಾರ್ಪಾಲ್ ಕೊಡಿಸುವುದಾಗಿ ಹೇಳಿದ್ದರು. ತಿಂಗಳುಗಳೇ ಕಳೆದರೂ ಯಾವುದೇ ಪರಿಹಾರ ಬಂದಿಲ್ಲ.