ಕಲಬುರಗಿ: ಜಿಲ್ಲೆಯಲ್ಲಿ ಕರೊನಾ ಆರ್ಭಟ ಹೆಚ್ಚಾಗುತ್ತಲೇ ಇದ್ದು, ಸಾವಿನ ಸರಣಿಯೂ ಮುಂದುವರಿದಿದೆ. ಚೇತರಿಕೆ ಪ್ರಮಾಣದಲ್ಲೂ ಏರಿಕೆ ಕಂಡಿದ್ದರಿಂದ ಆತಂಕದ ನಡುವೆಯೂ ಜನರಲ್ಲಿ ನೆಮ್ಮದಿ ಮೂಡಿಸಿದೆ.
61 ವರ್ಷದ ವೃದ್ಧ (ಪಿ-10270) ಕರೊನಾಕ್ಕೆ ಬಲಿಯಾಗಿದ್ದು, ಮೃತರ ಸಂಖ್ಯೆ 14ಕ್ಕೇರಿದೆ. 35 ಹೊಸ ಪ್ರಕರಣ ಪತ್ತೆಯಾಗುವ ಮೂಲಕ ಸೋಂಕಿತರ ಸಂಕ್ಯೆ 1289ಕ್ಕೇರಿದೆ.
ಮೃತ ವೃದ್ಧ ಕಲಬುರಗಿ ನಗರದ ಇಸ್ಲಾಮಬಾದ್ ಕಾಲನಿ ನಿವಾಸಿ. ತೀವ್ರ ರಕ್ತದೊತ್ತಡ ಮತ್ತು ಉಸಿರಾಟ ತೊಂದರೆಯಿಂದಾಗಿ 22ರಂದು ಜಿಮ್ಸ್ ಆಸ್ಪತ್ರೆಗೆ ದಾಖಲಾಗಿದ್ದು, ಮರುದಿನ ಕೊನೆಯುಸಿರೆಳೆದಿದ್ದ. ಈತನಿಗೆ ಎಲ್ಲಿಂದ ಹಾಗೂ ಹೇಗೆ ಕರೊನಾ ಅಂಟಿತು ಎಂಬ ಬಗ್ಗೆ ಮಾಹಿತಿ ಕಲೆ ಹಾಕಲಾಗುತ್ತಿದೆ ಎಂದು ಜಿಲ್ಲಾಧಿಕಾರಿ ಶರತ್ ಬಿ. ತಿಳಿಸಿದ್ದಾರೆ.
ಗುರುವಾರ 31 ಜನ ಸೇರಿ ಇದುವರೆಗೆ 860 ಸೋಂಕಿತರು ಚೇತರಿಸಿಕೊಂಡು ಮನೆಗೆ ತೆರಳಿದ್ದು, 415 ಸೋಂಕಿತರ ಚಿಕಿತ್ಸೆ ಮುಂದುವರಿದಿದೆ. ಮೂರು ವರ್ಷದ ಹೆಣ್ಣು, 13 ವರ್ಷದ ಬಾಲಕಿ ಹಾಗೂ 11 ವರ್ಷದ ಬಾಲಕ ಸೇರಿ ಗುರುವಾರ 20 ಪುರುಷರು, 15 ಮಹಿಳೆಯರಲ್ಲಿ ಸೋಂಕು ದೃಢಪಟ್ಟಿದೆ.
