ಕರೊನಾಕ್ಕಿಂತ ಕೆಎಫ್​ಡಿ ಆತಂಕ

ವಿಜಯವಾಣಿ ಸುದ್ದಿಜಾಲ ಕಾರವಾರ/ಸಿದ್ದಾಪುರ

ಜಿಲ್ಲೆಯ ಸಿದ್ದಾಪುರ ಭಾಗದಲ್ಲಿ ಕರೊನಾಕ್ಕಿಂತ ಮಂಗನ ಕಾಯಿಲೆ (ಕೆಎಫ್​ಡಿ)ಯ ಭೀತಿ ಹೆಚ್ಚಿದೆ. ಕಳೆದ ಎರಡು ದಿನಗಳಲ್ಲಿ ಸಿದ್ದಾಪುರ ತಾಲೂಕಿನಲ್ಲಿ ಹೊಸ 9 ಪ್ರಕರಣಗಳು ಪತ್ತೆಯಾಗಿವೆ ಎನ್ನಲಾಗಿದೆ. ಜಿಲ್ಲೆಯಲ್ಲಿ ಈ ವರ್ಷ ಒಟ್ಟಾರೆ ಸೋಂಕಿತರ ಸಂಖ್ಯೆ 33ಕ್ಕೆ ಏರಿದೆ.

ದೊಡ್ಮನೆ ಪ್ರಾಥಮಿಕ ಆರೋಗ್ಯ ಕೇಂದ್ರದ ಕಬ್ಬಗಾರದ 38 ವರ್ಷದ ವ್ಯಕ್ತಿಗೆ, ಕ್ಯಾದಗಿ ಪ್ರಾಥಮಿಕ ಆರೋಗ್ಯ ಕೇಂದ್ರದ ಕೆರಮನೆಯ 17 ವರ್ಷದ ಬಾಲಕನಿಗೆ, ಕೊರ್ಲಕೈ ಪ್ರಾಥಮಿಕ ಆರೋಗ್ಯ ಕೇಂದ್ರದ ಜೊಗಿನಮಠದ 37 ವರ್ಷದ ಮಹಿಳೆ ಹಾಗೂ 30 ವರ್ಷದ ವ್ಯಕ್ತಿಗೆ ಮಂಗನಖಾಯಿಲೆ ಇರುವುದು ಭಾನುವಾರ ಖಚಿತ ಪಟ್ಟಿದೆ. ಸೋಮವಾರ ಇನ್ನೂ ಐದು ಹೊಸ ಪ್ರಕರಣಗಳು ಖಚಿತವಾಗಿವೆ ಎಂಬ ಮಾಹಿತಿ ಬಂದಿದೆ. ಆದರೆ, ಆರೋಗ್ಯ ಅಧಿಕಾರಿಗಳು ಇದುವರೆಗೂ ಅದನ್ನು ಅಧಿಕೃತವಾಗಿ ಬಹಿರಂಗಗೊಳಿಸಿಲ್ಲ.

ಹೊಸ ಪ್ರದೇಶಗಳಿಗೆ ವಿಸ್ತರಣೆ: ಕಳೆದ ವರ್ಷ 86 ಜನರಲ್ಲಿ ಸೋಂಕು ಕಂಡು ಬಂದಿತ್ತು. ಅದರಲ್ಲಿ 6 ಜನರು ಮೃತಪಟ್ಟಿದ್ದರು. ಈ ವರ್ಷ ಕಾಯಿಲೆ ಸಿದ್ದಾಪುರ ತಾಲೂಕಿಗೆ ಮಾತ್ರ ಸೀಮಿತವಾಗಿರದೆ ಅಂಕೋಲಾಕ್ಕೂ ವಿಸ್ತರಿಸಿದೆ. ಅಂಕೋಲಾ ತಾಲೂಕಿನ ಒಬ್ಬ ವ್ಯಕ್ತಿ ಕಾಯಿಲೆಗೆ ತುತ್ತಾಗಿ ಚೇತರಿಸಿಕೊಂಡಿದ್ದಾರೆ. ಯಲ್ಲಾಪುರ, ಜೊಯಿಡಾದಲ್ಲೂ ಮಂಗಗಳ ಸಾವು ಸಂಭವಿಸುತ್ತಿದೆ. ಅವುಗಳ ಮಾದರಿಯನ್ನು ಪಡೆದು ಪ್ರಯೋಗಾಲಯಕ್ಕೇನೋ ಕಳಿಸಲಾಗುತ್ತಿದೆ. ಆದರೆ, ವರದಿ ತೀವ್ರ ವಿಳಂಬವಾಗುತ್ತಿದೆ.