ಕನಿಷ್ಠ ಅವಧಿಯಲ್ಲಿ 3,785 ಕಿ.ಮೀ. ಪಯಣ

ರಮೇಶ ಹಾರ್ಸಿಮನೆ ಸಿದ್ದಾಪುರ

ಕಾಶ್ಮೀರದಿಂದ ಕನ್ಯಾಕುಮಾರಿವರೆಗೆ ಬೈಸಿಕಲ್​ನಲ್ಲಿ ಅತಿ ಕಡಿಮೆ ಅವಧಿಯಲ್ಲಿ ಅಂದರೆ 19 ದಿನ 5 ಗಂಟೆಯಲ್ಲಿ 3,785 ಕಿ.ಮೀ. ಕ್ರಮಿಸುವ ಮೂಲಕ ಸಿದ್ದಾಪುರ ತಾಲೂಕಿನ ಹೆಗ್ಗರಣಿ ಸಮೀಪದ ಅತ್ತಿಗಾರಜಡ್ಡಿಯ ಡಾ. ಹರ್ಷವರ್ಧನ ನಾರಾಯಣ ನಾಯ್ಕ ಅವರು ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್​ನಲ್ಲಿ ದಾಖಲಾಗಿದ್ದಾರೆ.

2019ರ ನವಂಬರ್ 14ರಂದು ಜಮ್ಮು ಮತ್ತು ಕಾಶ್ಮೀರ ಶ್ರೀನಗರದ ಲಾಲ್​ಚೌಕ್​ನಿಂದ ಬೆಳಗ್ಗೆ 7.30ಕ್ಕೆ ಹೊರಟು ಜಮ್ಮು- ಕಾಶ್ಮೀರ, ಪಂಜಾಬ್, ಹರಿಯಾಣ, ಮಧ್ಯಪ್ರದೇಶ, ರಾಜಸ್ತಾನ, ಮಹಾರಾಷ್ಟ್ರ, ಕರ್ನಾಟಕ, ತಮಿಳುನಾಡು ಮೂಲಕ ಕನ್ಯಾಕುಮಾರಿಗೆ 2019ರ ಡಿಸೆಂಬರ್ 3ರಂದು ಮಧ್ಯಾಹ್ನ 12 ಗಂಟೆಗೆ ತಲುಪಿದ್ದಾರೆ.

ಸೈನಿಕರಿಗೆ ಗೌರವ ಸೂಚಿಸುವ ಸಲುವಾಗಿ ‘ಸೆಲ್ಯೂಟ್ ಫಾರ್ ಅವರ್ ಸೋಲ್ಜರ್ಸ್’ ಎಂಬ ಘೊಷವಾಕ್ಯದೊಂದಿಗೆ ಅಭಿಯಾನ ನಡೆಸಿದ್ದರು. ಅಭಿಯಾನ ಆರಂಭಿಸುವ ಮೊದಲು 20 ದಿನಗಳ ಕಾಲ ಲಡಾಖ್​ನಲ್ಲಿ ಉಳಿದು ಬಾಡಿಗೆ ಸೈಕಲ್​ನಲ್ಲಿ ಪ್ರಪಂಚದ ಅತಿ ಎತ್ತರದ ರಸ್ತೆ ಎಂದು ಗುರುತಿಸಲ್ಪಟ್ಟ ಕರದುಂಗ್ಲಾ ರಸ್ತೆಯಲ್ಲಿ ತರಬೇತಿ (ಪ್ರ್ಯಾಕ್ಟಿಸ್) ಪಡೆದು ನಂತರ ವಿಶ್ವದ ಎರಡನೇ ಅತಿ ಶೀತ ಪ್ರದೇಶ ಎಂದು ಕರೆಸಿಕೊಳ್ಳುವ ದರಾಸ್​ನಿಂದ ಸೋನ ಮಾರ್ಗದಲ್ಲಿ 62 ಕಿ.ಮೀ. ಕ್ರಮಿಸಿ ಸೈಕಲ್​ಗೆ ನಿರ್ಬಂಧ ಇರುವ ದಾರಿಯಲ್ಲಿ ಸ್ಥಳೀಯರ ವಾಹನದಲ್ಲಿ ಸಂಚರಿಸಿದ್ದರು.

ಈ ದಾಖಲೆಯ ಅವಾರ್ಡ್ ಘೊಷಣೆಯಾಗಿದ್ದರೂ ಕರೊನಾ ಲಾಕ್​ಡೌನ್​ನಿಂದಾಗಿ ಸರ್ಟಿಫಿಕೇಟ್(ಪ್ರಮಾಣ ಪತ್ರ) ಇವರ ಕೈಗೆ ಸಿಗಲಿಲ್ಲವಾಗಿತ್ತು. ಈಗ ಒಂದು ವಾರದ ಹಿಂದೆ ಕೋರಿಯರ್ ಮೂಲಕ ಇಂಡಿಯಾ ಬುಕ್ ಆಫ್ ರೆಕಾರ್ಡ್ಸ್​ನಲ್ಲಿ ದಾಖಲಾದ ಪ್ರಮಾಣ ಪತ್ರ ಬಂದು ತಲುಪಿದೆ ಎಂದು ಡಾ. ಹರ್ಷವರ್ಧನ ತಿಳಿಸಿದ್ದಾರೆ.

ಹುಬ್ಬಳ್ಳಿ ಕಿಮ್ಸ್​ನಲ್ಲಿ ಎಂಬಿಬಿಎಸ್ ಪದವಿ ಪಡೆದಿರುವ ಡಾ. ಹರ್ಷವರ್ಧನ ಅವರು ಎಂ.ಡಿ. ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದಾರೆ. ಇವರು ಅತ್ತಿಗಾರಜಡ್ಡಿಯ ಕೃಷಿಕ ನಾರಾಯಣ ನಾಯ್ಕ ಹಾಗೂ ಪ್ರೇಮಾ ನಾರಾಯಣ ನಾಯ್ಕ ಅವರ ಪುತ್ರ.