ಆರ್ಥಿಕ ಸಂಕಷ್ಟದಲ್ಲಿ ಸಿಲುಕಿದ ರೈತ ಸಮುದಾಯದ ಆಗ್ರಹದಿಂದ ಕಡಲೆಯನ್ನು ಪ್ರತಿ ಕ್ವಿಂಟಾಲ್ ಗೆ 4,875 ರೂ. ದರ ನಿಗದಿಪಡಿಸಿ ಬೆಂಬಲ ಬೆಲೆಯಲ್ಲಿ ಖರೀದಿಸಲು ಮಾ.2ನೇ ವಾರದಲ್ಲಿ ಸೂಚಿಸಿತ್ತು. ಆದರೆ, ಪ್ರಕ್ರಿಯೆ ಪ್ರಾರಂಭದ ಬೆನ್ನೆಲ್ಲೇ ಕರೊನಾ ಭೀತಿ ಎದುರಾದ ಪರಿಣಾಮ ಸರ್ಕಾರ ಸೂಚನೆ ನೀಡುವವರೆಗೆ ಖರೀದಿಗೆ ತಾತ್ಕಾಲಿಕ ತಡೆ ನೀಡಿತ್ತು. ಕೊನೆಗೆ ಮುಕ್ತ ಮಾರುಕಟ್ಟೆಯಲ್ಲಿ ಬೆಲೆ ಕುಸಿತದ ಬೇಗುದಿ ಹಾಗೂ ಕರೊನಾ ಕರಿನೆರಳಿನ ಪ್ರಭಾವದಿಂದ ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿರುವ ಅನ್ನದಾತರ ನೆರವಿಗೆ ಬರುವುದರ ಮೂಲಕ ಸರ್ಕಾರ ಕೃಷಿ ಉತ್ಪನ್ನಗಳ ಬೆಂಬಲ ಬೆಲೆ ಖರೀದಿಗೆ ಆದೇಶ ನೀಡಿದ್ದರಿಂದ ರೈತ ಸಮುದಾಯದಲ್ಲಿನ ಆತಂಕ ದೂರಾಗಿದೆ.
