ಕೆ.ಎಸ್.ಪ್ರಣವಕುಮಾರ್ ಚಿತ್ರದುರ್ಗ
ಕಲುಷಿತ ನೀರು ಸೇವನೆ ಪ್ರರಕರಣಕ್ಕೆ ಸಂಬಂಧಿಸಿದಂತೆ ಕವಾಡಿಗರಹಟ್ಟಿಯ ದಲಿತ ಕಾಲನಿಯಲ್ಲಿ ಭಾನುವಾರ ಮತ್ತೆ 11 ಜನರು ಅಸ್ವಸ್ಥರಾಗಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಈ ಮೂಲಕ ಚಿಕಿತ್ಸೆ ಪಡೆಯುವವರ ಸಂಕ್ಯೆ 206ಕ್ಕೆ ಏರಿದೆ.
ಈ ಪ್ರಕರಣಕ್ಕೆ ಕಾಲರಾ ಮಾದರಿಯ ಬ್ಯಾಕ್ಟೀರಿಯಾ ಕಾರಣವಿರಬಹುದು ಎಂದು ಶಂಕಿಸಲಾಗಿದ್ದರೂ ಅಸ್ವಸ್ಥರ ಸಂಖ್ಯೆ ಇಳಿಕೆಯಾಗದ ಹಿನ್ನೆಲೆಯಲ್ಲಿ ಮತ್ತಿನ್ನೇನಾದರೂ ಇರಬಹುದೇ ಎಂದು ಹುಡುಕುವ ಪ್ರಯತ್ನಗಳು ನಡೆದಿವೆ.
ತಜ್ಞ ವೈದ್ಯರ ತಂಡದ ಸಲಹೆ ಮೇರೆಗೆ ಟ್ಯಾಂಕ್ಗಳಲ್ಲಿನ ಕಲುಷಿತ ನೀರಿನ ಮರು ಪರಿಶೀಲನೆ, ಚರಂಡಿ ನೀರು, ಹೊಸದಾಗಿ ಅಸ್ವಸ್ಥರಾದವರ,ಚಿಕಿತ್ಸೆ ಪಡೆಯುತ್ತಿರುವವರ ಮಲ, ರಸ್ತೆ ಬದಿ ಹರಿಯುತ್ತಿರುವ ಕೊಳಚೆ ನೀರಿನ ಮಾದರಿಗಳನ್ನು ಸಂಗ್ರಹಿಸಿ ಮತ್ತೆ ಪ್ರಯೋಗಾಲಯಕ್ಕೆ ರವಾನಿಸಲಾಗಿದೆ.
ವೈದ್ಯರ ತಂಡ ಪ್ರಕರಣದ ಮೂಲ ಪತ್ತೆಗೆ ವಿವಿಧ ಆಯಾಮಗಳಲ್ಲಿ ಸಾಗುತ್ತಿದ್ದು, ವರದಿ ಬಂದ ನಂತರವೇ ನಿಖರ ಕಾರಣ ತಿಳಿಯಲಿದೆ.
ಜುಲೈ 31ರಂದು 41 ಇದ್ದ ಅಸ್ವಸ್ಥರ ಸಂಖ್ಯೆ ಇದೀಗ 200ರ ಗಡಿ ದಾಟಿದೆ. ಕವಾಡಿಗರಹಟ್ಟಿಯಲ್ಲಿ 735 ಕುಟುಂಬಗಳಿವೆ. 3,206 ಜನ ವಾಸಿಸುತ್ತಿದ್ದಾರೆ. ದಲಿತ ಕಾಲನಿಯಲ್ಲಿ 320 ಕುಟುಂಬಗಳಿದ್ದು 2,064 ಜನರಿದ್ದಾರೆ.
