ಕಡಿಮೆ ಖರ್ಚು: ತಾಲೂಕಿನಲ್ಲಿ ಕೆಲ ದಶಕಗಳ ಹಿಂದೆ ಸುಮಾರು 7000 ಎಕರೆ ಪ್ರದೇಶದಲ್ಲಿ ಕಗ್ಗ ಬೆಳೆಯುತ್ತಿದ್ದು ಕೇವಲ ಬಾಡ, ಕಾಗಾಲ, ಹೊಲನಗದ್ದೆ ಹಾಗೂ ಕೋಡ್ಕಣಿ ಪಂಚಾಯಿತಿಯ ಛತ್ರಕುರ್ವೆ ಗಜನಿ ಪ್ರದೇಶದಲ್ಲೇ 5,000 ಎಕರೆಗೂ ಹೆಚ್ಚು ಪ್ರದೇಶದಲ್ಲಿ ಕಗ್ಗ ಬೇಸಾಯವಿತ್ತು. ಕಗ್ಗದಲ್ಲಿ ಬಿಳಿ ಹಾಗೂ ಕರಿ ಎಂಬ ಎರಡು ತಳಿಗಳಿದ್ದು ಕರಿಕಗ್ಗವನ್ನೇ ಹೆಚ್ಚಿನ ಪ್ರಮಾಣದಲ್ಲಿ ಬೆಳೆಯಲಾಗುತ್ತಿತ್ತು. ಸದಾ ಸಮುದ್ರ, ಹೊಳೆಯ ಉಪ್ಪು ಹಿನ್ನೀರು ಭರತ-ಇಳಿತ, ನೆರೆಯ ನೈಸರ್ಗಿಕ ವ್ಯವಸ್ಥೆಯಲ್ಲಿ ಕಗ್ಗ ಬೆಳೆದ ಬಳಿಕ ಅದೇ ಗದ್ದೆಗಳಲ್ಲಿ ವಿಫುಲವಾಗಿ ಸಿಗಡಿ, ಏಡಿ ಹಾಗೂ ಇತರ ಜಲಚರ ಸಂಪತ್ತು ಬೆಳೆಯುತ್ತಿತ್ತು. ಗಜನಿಯ ಬಂಡು ಹಾಗೂ ಜಂತ್ರಡಿ ವ್ಯವಸ್ಥೆಯ ಮೂಲಕ ಕೃಷಿ ಹಾಗೂ ಮೀನುಗಾರಿಕೆಯೆರಡೂ ಸುಸ್ಥಿರವಾಗಿ ನಿಯಂತ್ರಿಸಲ್ಪಟ್ಟು ರೈತರಲ್ಲಿ ಸಮೃದ್ಧಿ ತುಂಬಿರುತ್ತಿತ್ತು. ಕಗ್ಗ ಬೆಳೆಯಲ್ಲಿ ಹೆಚ್ಚಿನ ಹೂಡಿಕೆ ಇರುವುದಿಲ್ಲ. ಬೀಜ ದಾಸ್ತಾನು ಮಾಡಿಕೊಂಡು ಬಿತ್ತಲಾಗುತ್ತದೆ. ಯಾವುದೇ ಔಷಧ, ಗೊಬ್ಬರ, ಪಾಲನೆ- ಪೋಷಣೆಯಿಲ್ಲದೆ, ಉಪ್ಪು ನೀರು ಹಾಗೂ ಪ್ರವಾಹವನ್ನು ತಡೆದು ಬೆಳೆಯುತ್ತದೆ.
