ಒತ್ತಡದಿಂದ ಹೊರಬರಲು ಕ್ರೀಡೆಗಳು ಸಹಕಾರಿ

ಚಿಕ್ಕಮಗಳೂರು: ವೈದ್ಯಕೀಯ ಕ್ಷೇತ್ರದಲ್ಲಿ ಪ್ರತಿದಿನವು ಒತ್ತಡದಿಂದ ಕಾರ್ಯನಿರ್ವಹಿಸುವ ಸಿಬ್ಬಂದಿಗೆ ಕ್ರೀಡಾ ಮನೋಭಾವ ಬೆಳೆಸಲು ಪಂದ್ಯಾವಳಿ ಆಯೋಜಿಸಿರುವುದು ಉತ್ತಮ ಬೆಳವಣಿಗೆ ಎಂದು ಆಶಾಕಿರಣ ಶಾಲೆ ಸಂಸ್ಥಾಪಕ ಡಾ. ಜೆ.ಪಿ.ಕೃಷ್ಣೇಗೌಡ ತಿಳಿಸಿದರು.

ನಗರದ ರಾಮನಹಳ್ಳಿ ಸಮೀಪ ಪೊಲೀಸ್ ಮೈದಾನದಲ್ಲಿ ಸಾಯಿ ಅಮೃತ್ ಹೆಲ್ತ್ಕೇರ್, ಸ್ಪರ್ಶ ಆಸ್ಪತ್ರೆ ಹಾಗೂ ವಿವಿಧ ಸಂಸ್ಥೆಗಳ ಸಹಭಾಗಿತ್ವದಲ್ಲಿ ಏರ್ಪಡಿಸಿದ್ಧ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ವಿಜೇತ ತಂಡಕ್ಕೆ ಬಹುಮಾನ ವಿತರಿಸಿ ಮಾತನಾಡಿದರು.

ವೈದ್ಯಕೀಯ ಲೋಕ ಸುಲಭದ ಮಾತಲ್ಲ. ರೋಗಿಗಳನ್ನು ಗುಣಮುಖರನ್ನಾಗಿಸಿ ಸಂರಕ್ಷಿಸುವ ಕಾರ್ಯ ಮಹತ್ತರವಾದದು. ಒತ್ತಡ, ಜಂಜಾಟ ಹಾಗೂ ಮಾನಸಿಕವಾಗಿ ಕುಗ್ಗುವ ಸಾಧ್ಯತೆಯಿದೆ. ಹೀಗಾಗಿ ಮನಸ್ಸನ್ನು ಕೊಂಚ ಹಗುರಗೊಳಿಸಲು ಕ್ರೀಡೆಗಳಲ್ಲಿ ಭಾಗವಹಿಸಿದರೆ ದೈನಂದಿನ ವೃತ್ತಿಯ ಒತ್ತಡಕ್ಕೆ ಪರಿಹಾರ ಸಿಗಲಿದೆ ಎಂದು ಹೇಳಿದರು.

ನಗರ ಸೇರಿದಂತೆ ಗ್ರಾಮೀಣ ಪ್ರದೇಶಗಳಲ್ಲಿ ಕ್ರಿಕೆಟ್ ಅತ್ಯಂತ ಪ್ರಸಿದ್ಧಿ ಪಡೆದುಕೊಂಡಿದೆ. ಅಲ್ಲದೇ ಇಡೀ ವಿಶ್ವದಲ್ಲೇ ಭಾರತೀಯ ಕ್ರಿಕೆಟ್ ಅತ್ಯಂತ ಶ್ರೀಮಂತಿಕೆ ಹೊಂದಿದೆ. ಪಂದ್ಯಾವಳಿ ಗೆಲುವುದೇ ಗುರಿಯಾಗಬಾರದು. ಮುಕ್ತವಾಗಿ ಆಟವಾಡಿ ಎಲ್ಲರೊಂದಿಗೆ ಪರಸ್ಪರ ಬೆರೆತಾಗ ಮಾತ್ರ ಪಂದ್ಯಾವಳಿಗೆ ನೈಜವಾಗಿ ಅರ್ಥ ಬರಲಿದೆ ಎಂದು ತಿಳಿಸಿದರು.

ಪಂದ್ಯಾವಳಿ ಆಯೋಜಕ ಡಾ. ಚಂದ್ರಶೇಖರ್ ಸರ್ಜಾ ಮಾತನಾಡಿ, ಎರಡು ದಿನಗಳ ಕಾಲ ಆಯೋಜಿಸಿದ್ದ ಪಂದ್ಯಾವಳಿಯಲ್ಲಿ ಅಂತಿಮವಾಗಿ ಪಿಕ್ಸಿಲ್ ಸ್ಪೆಷರ್ ಮತ್ತು ಇವಿಂಗ್ ಹೀರೋಸ್ ಹಣಾಹಣಿಗೆ ಮುಂದಾದವು. ಮೊದಲ ಬ್ಯಾಟಿಂಗ್ ಆರಂಭಿಸಿದ ಪಿಕ್ಸಿಲ್ ೫೮ ರನ್‌ಗಳನ್ನು ಕಲೆಹಾಕಿತು.

ಇದನ್ನು ಬೆನ್ನಟ್ಟಿದ ಇವಿಂಗ್ ಹೀರೋಸ್ ೩೫ ರನ್ ಕಲೆಹಾಕಿದ ಕಾರಣ ಪಿಕ್ಸಿಲ್ ಸ್ಪೆಷರ್ ವಿಜೇತ ತಂಡವಾಗಿ ಹೊರಹೊಮ್ಮಿತು ಎಂದರು. ಮಹಿಳಾ ಥೋಬಾಲ್ ಪಂದ್ಯಾವಳಿಯಲ್ಲಿ ಮೊದಲ ಸ್ಥಾನ ಆಶ್ರಯ ಆಸ್ಪತ್ರೆ ಪಡೆದುಕೊಂಡರೆ, ಎರಡನೇ ಸ್ಥಾನವನ್ನು ಕೆಆರ್‌ಎಸ್ ಆಸ್ಪತ್ರೆ ಪಡೆಯಿತು ಎಂದರು.

ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಎ.ಎನ್.ಮೂರ್ತಿ ಮಾತನಾಡಿ, ವರ್ಷಪೂರ್ತಿ ವೈದ್ಯಕೀಯ ಸಿಬ್ಬಂದಿ ಹಾಗೂ ಪೊಲೀಸ್ ಇಲಾಖೆ ರಜೆಯಿಲ್ಲದೇ ಕರ್ತವ್ಯ ನಿರ್ವಹಿಸುತ್ತಾರೆ. ಜೊತೆಗೆ ಅಂಬುಲೆನ್ಸ್ ಚಾಲಕರಂತೂ ದಿನದ ೨೪ ಗಂಟೆಗಳ ಸೇವೆ ಒದಗಿಸುತ್ತಿರುವುದು ಸಾಮಾನ್ಯವಾದ ಮಾತಲ್ಲ. ಹೀಗಾಗಿ ವೈದ್ಯಕೀಯ ಸಿಬ್ಬಂದಿಗಳಿಗೆ ಕನಿಷ್ಟ ೬ ತಿಂಗಳಿಗೊಮ್ಮೆ ಕ್ರೀಡಾಕೂಟ ಆಯೋಜಿಸಬೇಕು ಎಂದು ಹೇಳಿದರು.

ಈ ಸಂದರ್ಭದಲ್ಲಿ ವಕೀಲ ವಿ.ಕೆ.ರಘು, ಸಾಯಿ ಅಮೃತ ಹೆಲ್ತ್ಕೇರ್‌ನ ಡಾ. ನಿತಿನ್ ಬಂಕಪುರ, ವೈದ್ಯರಾದ ಡಾ. ಗೀತಾ, ಡಾ. ಕಾರ್ತೀಕ್, ಡಾ. ವಿನಯ್ ಮತ್ತಿತರರಿದ್ದರು.