ತಾಲೂಕಿನ ರೈತರು ಹಾಗೂ ವರ್ತಕರ ವಿವಿಧ ಆಹಾರ ಧಾನ್ಯಗಳ ಸಂಗ್ರಹಕ್ಕಾಗಿ ಪಟ್ಟಣದ ಎಪಿಎಂಸಿ ಪ್ರಾಂಗಣದಲ್ಲಿ 2018ರಲ್ಲಿ ಕೇಂದ್ರ ಉಗ್ರಾಣ ನಿಗಮ (ಸೆಂಟ್ರಲ್ ವೇರ್ ಹೌಸ್) ಅನ್ನು ಕೋಟ್ಯಂತರ ರೂ.ಗಳ ವೆಚ್ಚದಲ್ಲಿ ನಿರ್ವಿುಸಲಾಗಿದೆ. ಇದೇ ವೇಳೆ ಪ್ರತ್ಯೇಕ 15 ಲಕ್ಷ ರೂ.ಗಳ ವೆಚ್ಚದಲ್ಲಿ ಮ್ಯಾನೇಜರ್ ಚೇಂಬರ್, ಕ್ಲರ್ಕ್, ಸಿಬ್ಬಂದಿ ಹಾಗೂ ಟೆಕ್ನಿಕಲ್ ಕೊಠಡಿ (ತಾಂತ್ರಿಕ ರೂಂ) ಮತ್ತು ಹಮಾಲರ ಉಪಯೋಗಕ್ಕಾಗಿ ವಿಶ್ರಾಂತಿ ಕೊಠಡಿ, ನಾಲ್ಕು ಪ್ರತ್ಯೇಕ ಶೌಚಗೃಹಗಳನ್ನು ನಿರ್ವಿುಸಲಾಗಿದೆ. ಉಗ್ರಾಣ ನಿಗಮದ ಇಂಜಿನಿಯರ್ಗಳು ಮಾಡಿರುವ ಎಡವಟ್ಟು ಹಾಗೂ ಗುತ್ತಿಗೆದಾರರ ಪ್ರಮಾದದಿಂದಾಗಿ ಈ ಕಟ್ಟಡ ಕಟ್ಟಿದ ಎರಡೇ ವರ್ಷದಲ್ಲಿ ಸಂಪೂರ್ಣವಾಗಿ ಬಿರುಕು ಬಿಟ್ಟು ಬೀಳುವ ಹಂತದಲ್ಲಿದೆ. ಹೀಗಾಗಿ, ಇಲ್ಲಿ ಪ್ರತಿನಿತ್ಯ ಕರ್ತವ್ಯ ನಿರ್ವಹಿಸಬೇಕಿದ್ದ ಕೇಂದ್ರ ಉಗ್ರಾಣ ನಿಗಮದ ವ್ಯವಸ್ಥಾಪಕ ಎ.ವೈ. ಕುಂಗಾರೆ, ಇತರೆ ಸಿಬ್ಬಂದಿ ಹಾಗೂ ಹಮಾಲರು ಜೀವ ಭಯದಿಂದ ಕಚೇರಿಯ ಕಟ್ಟಡ ತೊರೆದಿದ್ದಾರೆ. ಇದರಿಂದಾಗಿ ರೈತರು, ವ್ಯಾಪಾರಸ್ಥರು ಕಿರಿಕಿರಿ ಅನುಭವಿಸುವಂತಾಗಿದೆ.
