ಎಪಿಎಂಸಿ ಅಧ್ಯಕ್ಷ ಸ್ಥಾನಕ್ಕೆಪನ್ನಾಳೆ ರಾಜೀನಾಮೆ

ಬೀದರ್: ಬೀದರ್ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ (ಎಪಿಎಂಸಿ) ಅಧ್ಯಕ್ಷ ಸ್ಥಾನಕ್ಕೆ ಅನೀಲಕುಮಾರ ಪನ್ನಾಳೆ ಸೋಮವಾರ ರಾಜೀನಾಮೆ ನೀಡಿದ್ದಾರೆ. ಬಿಜೆಪಿ ವರಿಷ್ಠರ ಆದೇಶದಂತೆ ಸಮಿತಿ ಕಾರ್ಯದರ್ಶಿ ಶಿವಶರಣಪ್ಪ ಮಜಗೆ ಅವರಿಗೆ ರಾಜೀನಾಮೆ ಪತ್ರ ಸಲ್ಲಿಸಿದ್ದಾರೆ.

ಎಪಿಎಂಸಿ ಕೊನೇ ಅವಧಿ ಇದಾಗಿದೆ. ಪನ್ನಾಳೆ 6 ತಿಂಗಳು ಅಧಿಕಾರ ನಡೆಸಿ ಇದೀಗ ರಾಜೀನಾಮೆ ನೀಡಿದ್ದು, ಇನ್ನೂ 14 ತಿಂಗಳ ಕಾಲಾವಕಾಶ ಇದೆ. ಕಳೆದ ವರ್ಷ ಜೂನ್ ನಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಬಿಜೆಪಿ ಬೆಂಬಲಿತರಲ್ಲಿ ಭಾರಿ ಪೈಪೋಟಿ ನಡೆದಿದ್ದ ಕಾರಣಕ್ಕೆ ಪಕ್ಷದ ಮುಖಂಡರು 6:14 ಅನುಪಾತದ ಸೂತ್ರ ಹೆಣೆದು ಅಧಿಕಾರ ಹಂಚಿಕೆ ಮಾಡಿದ್ದರು. ಅನೀಲಕುಮಾರ ಪನ್ನಾಳೆ ಮೊದಲ 6 ತಿಂಗಳು ಅಧ್ಯಕ್ಷರಾಗಿ, ಉಳಿದ 14 ತಿಂಗಳು ವಿಜಯಕುಮಾರ ಆನಂದೆ ಅಧ್ಯಕ್ಷರಾಗಿ ಮುಂದುವರಿಯಬೇಕು ಎನ್ನುವ ಸೂತ್ರ ಮಾಡಿದ್ದರು.

ಇದರಂತೆ 6 ತಿಂಗಳು ಪನ್ನಾಳೆ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿ ರಾಜೀನಾಮೆ ಸಲ್ಲಿಸಿದ್ದಾರೆ. ಮುಂದಿನ 14 ತಿಂಗಳಿಗೆ ವಿಜಯಕುಮಾರ ಆನಂದೆ ಅಧ್ಯಕ್ಷರಾಗಿ ಆಯ್ಕೆಯಾಗುವ ಸಾಧ್ಯತೆ ಹೆಚ್ಚಾಗಿದೆ. ಆದರೂ ಬಿಜೆಪಿಯ ಪ್ರಮುಖರು ಯಾವ ತೀರ್ಮಾನ ಕೈಗೊಳ್ಳುತ್ತಾರೋ ಕಾದು ನೋಡಬೇಕು.