ಬೇಸಿಗೆಯ ಬೇಗೆಗೆ ಎಲ್ಲೆಡೆ ನೀರಿನ ತುಟಾಗ್ರತೆ ಎದುರಾಗುತ್ತಿದೆ. ವನ್ಯ ಜೀವಿಗಳಿಗೆ ಕುಡಿಯುವ ನೀರು ಲಭ್ಯವಾಗುವ ಜತೆ ಮಳೆ ನೀರಿಂಗಿಸುವ ಸಲುವಾಗಿ ರಚಿಸಿದ್ದ ಕಣಿವೆ ಕೆರೆಗಳ ಮಾದರಿಯ ಕೆರೆ, ಹೊಂಡಗಳು ಆರುತ್ತಿವೆ. ಹೀಗಾಗಿ, ವನ್ಯಜೀವಿಗಳು ಕುಡಿಯುವ ನೀರಿಗಾಗಿ ತಮ್ಮ ವಾಸಸ್ಥಳದ ಸಮೀಪದ ನೀರಾವರಿ ಜಮೀನುಗಳತ್ತ ಮುಖ ಮಾಡುತ್ತಿವೆ. ಆಯಾ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಅರಣ್ಯ ಪ್ರದೇಶದಲ್ಲಿ ಅರಣ್ಯ ಇಲಾಖೆಯು ಕನಿಷ್ಠ ಎರಡಾದರೂ ಬೃಹತ್ತಾದ ಇಂಗುಗುಂಡಿಗಳನ್ನು ನಿರ್ವಿುಸಿದೆ. ತಾಲೂಕಿನ 32 ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿಯೂ ಇಂತಹ ನೂರಾರು ಕಣಿವೆ ಕೆರೆಗಳಿವೆ. ಈ ಕೆರೆಗಳು ನೀರಿಂಗಿಸಿಕೊಳ್ಳುವ ಮೂಲಕ ಅಂತರ್ಜಲ ಹೆಚ್ಚಳಕ್ಕೆ ಕಾರಣವಾಗುವ ಜತೆ ವನ್ಯಜೀವಿಗಳಿಗೆ ಕುಡಿಯುವ ನೀರನ್ನು ಒದಗಿಸುವ ಕೃತಕ ಕೊಳವಾಗಿಯೂ ಕಾರ್ಯ ಮಾಡುತ್ತಿವೆ. ಪ್ರತಿ ವರ್ಷ ಏಪ್ರಿಲ್ ಕೊನೆಯವರೆಗೂ ಈ ಕೊಳಗಳಲ್ಲಿ ನೀರು ಇರುತ್ತಿದ್ದ ಕಾರಣ ವನ್ಯಜೀವಿಗಳಿಗೆ ಕುಡಿಯಲು ನೀರಿನ ಕೊರತೆ ಎದುರಾಗುತ್ತಿರಲಿಲ್ಲ. ಆದರೆ, ಪ್ರಸಕ್ತ ವರ್ಷ ಮಾತ್ರ ಮಾರ್ಚ್ ಅಂತ್ಯದೊಳಗೇ ನೀರಿನ ಕೊರತೆ ಕಾಡತೊಡಗಿದ್ದು, ವನ್ಯ ಸಂಕುಲಕ್ಕೆ ತೊಂದರೆ ತಂದೊಡ್ಡಿದೆ.
