ಎತ್ತಿನ ಬಾಯಲ್ಲಿ ನಾಡಬಾಂಬ್ ಸ್ಪೋಟ!

ಮುಂಡಗೋಡ: ತಾಲೂಕಿನ ಸನವಳ್ಳಿ ಡ್ಯಾಂ ಬಳಿ ಮೇಯಲು ಹೋಗಿದ್ದ ಎತ್ತು ನಾಡಬಾಂಬ್ (ಕೈ ಬಾಂಬ್) ಕಚ್ಚಿದ್ದರಿಂದ ಗಂಭೀರವಾಗಿ ಗಾಯಗೊಂಡು ಸಾವು- ಬದುಕಿನ ಮಧ್ಯೆ ಹೋರಾಡುತ್ತಿರುವ ಮನಕಲಕುವ ಘಟನೆ ಸೋಮವಾರ ನಡೆದಿದೆ.

ಎತ್ತು ಸನವಳ್ಳಿ ಪ್ಲಾಟ್​ನ ಅಪ್ಪು ನಾಯರ ಎಂಬುವರಿಗೆ ಸೇರಿದೆ. ಸೋಮವಾರ ಬೆಳಗ್ಗೆ ಇತರ ದನ- ಕರುಗಳೊಂದಿಗೆ ಮೇಯಲು ಅಡವಿಗೆ ಹೋಗಿದ್ದ ವೇಳೆ ಈ ಅವಘಡ ಸಂಭವಿಸಿದೆ. ಯಾರೋ ದುಷ್ಕರ್ವಿುಗಳು ಪ್ರಾಣಿಗಳನ್ನು ಬೇಟಿಯಾಡಲು ಇಟ್ಟಿದ್ದ ಕೈ ಬಾಂಬ್ ಅನ್ನು ಎತ್ತು ಕಚ್ಚಿದ್ದರಿಂದ ಬಾಂಬ್ ಸ್ಪೋಟಗೊಂಡಿದೆ. ಇದರಿಂದ ಎತ್ತಿನ ಬಾಯಲ್ಲಿ ಗಂಭೀರವಾದ ಗಾಯವಾಗಿದ್ದು, ಮೇವು ತಿನ್ನಲು ಮತ್ತು ನೀರು ಕುಡಿಯಲು ಆಗುತ್ತಿಲ್ಲ.

ಸ್ಥಳದಲ್ಲಿ ಅನುಮಾನಾಸ್ಪದ ಕೈ ಬಾಂಬ್ ಪತ್ತೆಯಾಗಿದೆ. ಇದರಿಂದ ಆತಂಕಗೊಂಡ ಗ್ರಾಮಸ್ಥರು ಇದೇ ರೀತಿ ಬೇರೆ ಜಾಗಗಳಲ್ಲಿ ನಾಡ ಬಾಂಬ್ ಇಟ್ಟಿರುವುದನ್ನು ಪತ್ತೆ ಹಚ್ಚಬೇಕು. ಈ ರೀತಿ ಅಮಾನವೀಯ ಕೃತ್ಯ ಎಸಗಿದವರ ವಿರುದ್ಧ ಕಠಿಣ ಕ್ರಮ ಜರುಗಿಸಬೇಕು ಎಂದು ಸ್ಥಳೀಯರು ಅರಣ್ಯ ಇಲಾಖೆ ಅಧಿಕಾರಿಗಳನ್ನು ಒತ್ತಾಯಿಸಿದ್ದಾರೆ.