ಮೈಸೂರಿನಿಂದ ನಂಜನಗೂಡು ಪುರ ಪ್ರವೇಶಿಸುತ್ತಿದ್ದಂತೆ ಬಲಭಾಗದಲ್ಲಿರುವ ಬಸವನಗುಡಿ ಬ್ಲಾಕ್ ಬಡಾವಣೆಯನ್ನು 25 ವರ್ಷಗಳ ಹಿಂದೆ ಮುಡಾದಿಂದ ನಿರ್ಮಾಣ ಮಾಡಲಾಗಿದೆ. ಇತ್ತೀಚಿನ ವರ್ಷಗಳಲ್ಲಿ ನಂಜನಗೂಡಿನಲ್ಲಿ ಮುಡಾದಿಂದ ನಿರ್ಮಾಣಗೊಂಡಿರುವ ಹಲವಾರು ಬಡಾವಣೆಗಳಲ್ಲಿ ಸುಸಜ್ಜಿತವಾದ ಉದ್ಯಾನ ನಿರ್ಮಿಸಿ, ಸಿಎ ನಿವೇಶನಗಳನ್ನು ಗುರುತಿಸಲಾಗಿದೆ. ಆದರೆ 5.2 ಎಕರೆ ವಿಸ್ತೀರ್ಣ ಹಾಗೂ 72 ಮನೆಗಳಿರುವ ಈ ಬಡಾವಣೆಯಲ್ಲಿ ಉದ್ಯಾನವೇ ಇಲ್ಲ. ಉದ್ಯಾನಕ್ಕಾಗಿ ಮೀಸಲಿಟ್ಟಿರುವ ಜಾಗ ಅತ್ಯಂತ ಕಿರಿದಾಗಿದ್ದು, ದಾಖಲೆಗಳಲ್ಲಿ ತೋರಿಸುವ ಸಲುವಾಗಿ ನಾಮ್ ಕೇ ವಾಸ್ತೆಗಾಗಿ ಜಾಗ ಬಿಡಲಾಗಿದೆ. ಅಲ್ಲಿ ಪಾರ್ಕ್ ಅಭಿವೃದ್ಧಿ ಮಾಡುವಷ್ಟು ಸ್ಥಳಾವಕಾಶವಿಲ್ಲ. ಇದುವರೆಗೂ ಯಾವುದೇ ಅಭಿವೃದ್ಧಿಯನ್ನೂ ಮಾಡಿಲ್ಲ ಎಂಬುದು ಸ್ಥಳೀಯರ ಆರೋಪ.
ಹರಾಜು ನಿಲ್ಲಿಸಿ, ಪಾರ್ಕ್ ಮಾಡಿ: ಮುಡಾ ವತಿಯಿಂದ ಬಸವನಗುಡಿ ಬ್ಲಾಕ್ ಬಡಾವಣೆಯಲ್ಲಿ 5 ಎಂಐಜಿ ಹಾಗೂ 2 ಎಚ್ಐಜಿ ಸೇರಿ ಒಟ್ಟು ಏಳು ನಿವೇಶನಗಳನ್ನು ಆ.28ರಂದು ಇ-ಹರಾಜು ಮೂಲಕ ನೇರ ಬಿಡ್ಡಿಂಗ್ ಕರೆಯಲಾಗಿದೆ. ಉದ್ಯಾನ ಹಾಗೂ ಸಿಎ ನಿವೇಶನಕ್ಕಾಗಿ ಜಾಗ ಬಿಡಲಾಗಿದೆ ಎಂದು ಸ್ಥಳೀಯರು ನಂಬಿದ್ದ ಜಾಗವನ್ನೇ ಇದೀಗ ಹರಾಜು ಮೂಲಕ ಮಾರಾಟ ಮಾಡಲು ಮುಂದಾಗಿರುವುದು ಸ್ಥಳೀಯರ ವಿರೋಧಕ್ಕೆ ಕಾರಣವಾಗಿದೆ. ಈ ನಿವೇಶನಗಳನ್ನು ಮಾರಾಟ ಮಾಡಿಬಿಟ್ಟರೆ 5 ಎಕರೆ ವಿಸ್ತೀರ್ಣವಿರುವ ಈ ಬಡಾವಣೆಯಲ್ಲಿ ಸುಸಜ್ಜಿತ ಪಾರ್ಕ್ ನಿರ್ಮಾಣ ಮಾಡುವುದು ಕನಸಾಗಿಯೇ ಉಳಿಯಲಿದೆ. ಇನ್ನು ಸಿಎ ನಿವೇಶನ ಯಾವುದೆಂಬುದು ತಿಳಿದಿಲ್ಲ.
