ಆರ್.ಕೃಷ್ಣ ಮೈಸೂರು
ಮೈಸೂರಿನ ಹೆಗ್ಗುರುತಾಗಿರುವ ಮರದ ಕೆತ್ತನೆಯ ಇನ್ಲೆ ಕಲೆ (ಹುದುಗು ಕಲೆ) ಪುನರುಜ್ಜೀವನಕ್ಕೆ ಕ್ರಿಯಾಯೋಜನೆ ಸಿದ್ಧಗೊಂಡಿದೆ.
ಮೈಸೂರು ಹೆಸರಿನೊಂದಿಗೆ ಬೆರತು ಹೋಗಿರುವ ವೀಳ್ಯದೆಲೆ, ಮೈಸೂರು ಪಾಕ್, ಗಂಧದ ಎಣ್ಣೆ, ವೀರನಗೆರೆ ಬದನೆಕಾಯಿ, ನಂಜನಗೂಡು ರಸಬಾಳೆ ಜತೆಗೆ ಮರದ ಕೆತ್ತನೆಯೂ ದೇಶ, ವಿದೇಶಗಳಲ್ಲಿ ತನ್ನದೇ ವಿಶಿಷ್ಟ ಪರಂಪರೆಯನ್ನು ಉಳಿಸಿಕೊಂಡು ಬಂದಿದೆ.
ಆದರೆ, ಇತ್ತೀಚಿನ ಆಧುನಿಕ ಆವಿಷ್ಕಾರಗಳಿಂದಾಗಿ ಸಾಂಪ್ರಯಿಕವಾಗಿ ಮೈಸೂರು ಅರಸರಿಂದ ಪೋಷಿಸಲ್ಪಟ್ಟಿರುವ ಇನ್ಲೆ ಕಲೆಯೂ ನಶಿಸುವ ಹಾದಿಯಲ್ಲಿದೆ. ಹೀಗಾಗಿ ಇದರ ಪುನರುಜ್ಜೀವನಕ್ಕಾಗಿ ಸರ್ಕಾರ ಜಾರಿಗೆ ತಂದಿರುವ ‘ಒಂದು ಜಿಲ್ಲೆ ಒಂದು ಉತ್ಪನ್ನ’ ಯೋಜನೆಯಡಿ ಪ್ರಸಿದ್ಧ ರೋಸ್ವುಡ್ ಇನ್ಲೆ ಕಲೆ (ಹುದುಗು ಕಲೆ)ಯನ್ನು ಉಳಿಸಲು ಕ್ರಿಯಾಯೋಜನೆ ಸಿದ್ಧಪಡಿಸಲಾಗಿದೆ.
ಕಲೆಗೆ ರಾಜಾಶ್ರಯ
ನೂರಾರು ವರ್ಷಗಳ ಹಿಂದೆ ರಾಜಾಶ್ರಯದಲ್ಲಿ ಆರಂಭವಾದ ಮರದ ಕೆತ್ತನೆಯ ಕಲೆಯಲ್ಲಿ 20 ಸಾವಿರಕ್ಕೂ ಹೆಚ್ಚು ಜನರು ತೊಡಗಿಸಿಕೊಂಡಿದ್ದರು. ರಾಜ್ಯ, ದೇಶ, ವಿದೇಶಗಳಲ್ಲಿಯೂ ಮೈಸೂರು ಇನ್ಲೆ ಕಲೆಗೆ ಬಹುಬೇಡಿಕೆ ಇತ್ತು. ಆದರೆ, ಇತ್ತೀಚಿನ ವರ್ಷದಲ್ಲಿ ಕಲೆ ಕುಂಟಿತಗೊಳ್ಳುತ್ತಾ ಸಾಗಿದೆ.
ಕಲೆ ಸಂರಕ್ಷಿಸುವ ಹಿನ್ನೆಲೆಯಲ್ಲಿ ಈಗಾಗಲೇ ಇನ್ಲೆ ಕಲೆಯಲ್ಲಿ ತೊಡಗಿಸಿಕೊಂಡಿರುವ ಕಲಾವಿದರ ಸಮೀಕ್ಷೆ ನಡೆಸಿ ಅವರೊಂದಿಗೆ ಸಭೆಯೊಂದನ್ನು ನಡೆಸಿ ಅವರ ಸಮಸ್ಯೆಗಳನ್ನು ಆಲಿಸಲಾಗಿದೆ. ಮಾರುಕಟ್ಟೆ ವ್ಯವಸ್ಥೆ, ಕಚ್ಚಾ ಸಾಮಗ್ರಿಗಳ ಪೂರೈಕೆ ಹಂತದಲ್ಲಿ ಮಧ್ಯವರ್ತಿಗಳ ಹಾವಳಿ ಸೇರಿದಂತೆ ಅವರಿಗೆ ಇರುವ ಸಮಸ್ಯೆಯನ್ನು ಆಲಿಸಲಾಗಿದೆ.
ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಕೈಗಾರಿಕೆ ನಗರದಲ್ಲಿಯೇ ಮಾರಾಟಕ್ಕೆ ವ್ಯವಸ್ಥೆ ಮಾಡಿ ಇನ್ಲೆ ಟೂರಿಸಂ ಕಲ್ಪನೆಯಲ್ಲಿ ವ್ಯಾಪಾರ ಹಾಗೂ ಪ್ರವಾಸೋದ್ಯಮಕ್ಕೆ ಉತ್ತೇಜನ ನೀಡಲು ಉದ್ದೇಶಿಸಲಾಗಿದೆ. ಕಚ್ಚಾ ಸಾಮಗ್ರಿ ಖರೀದಿಗೆ ಸಂಬಂಧಿಸಿದಂತೆ ನಾನಾ ಕಾನೂನು ತೊಡಕುಗಳು ಇದ್ದು, ಅದನ್ನು ಅರಣ್ಯ ಇಲಾಖೆಯ ಅಧಿಕಾರಿಗಳೊಂದಿಗೆ ಚರ್ಚಿಸಿ ಬಗೆಹರಿಸಲು ನಿರ್ಧಾರ ಮಾಡಲಾಗಿದೆ.
ಹೊಸ ಪೀಳಿಗೆ ರೂಪಿಸಲು ಉತ್ತೇಜನ: ಈ ಕಲೆಗೆ ಉತ್ತೇಜನ ನೀಡಲು ಕಲಾವಿದರ ಇನ್ನಿತರ ವಿನ್ಯಾಸಗಳ ರಚನೆ ಹಾಗೂ ಕೌಶಲಾಭಿವೃದ್ಧಿಗೆ ಸಂಬಂಧಿಸಿದಂತೆ ವಿಶೇಷ ತರಬೇತಿ ನೀಡಲು ತೀರ್ಮಾನಿಸಲಾಗಿದೆ. ಈಗಾಗಲೇ ಕಲೆಯಲ್ಲಿ ತೊಡಗಿಸಿಕೊಂಡಿರುವ ಕುಟುಂಬದ ಇನ್ನಿತರ ಸದಸ್ಯರು, ಇಲ್ಲವೇ ಆಸಕ್ತಿ ಇರುವ ಇತರರಿಗೆ ಇನ್ಲೆ ಕಲೆಯ ತರಬೇತಿ ನೀಡಿ ಈ ಕಲೆಯಲ್ಲಿ ತೊಡಗಿಸಿಕೊಳ್ಳುವ ಹೊಸ ಪೀಳಿಗೆಯನ್ನು ರೂಪಿಸಲಾಗುತ್ತದೆ.
ಈ ಮೂಲಕ ಅಳಿವಿನಂಚಿನಲ್ಲಿರುವ ಕಲೆಯನ್ನು ಪುನಃಶ್ಚೇತನಗೊಳಿಸುವುದು ಮಾತ್ರವಲ್ಲದೆ, ಹುದುಗು ಕಲೆಯಲಿ ್ಲನಿರತರಾಗಿರುವ ಕಲಾವಿದರ ಸಮಸ್ಯೆಗಳೆಲ್ಲವನ್ನೂ ಪಟ್ಟಿ ಮಾಡಿ ಅವುಗಳನ್ನು ಪರಿಹರಿಸಿ ಅವರ ಆರ್ಥಿಕ ಮಟ್ಟವನ್ನು ಸುಧಾರಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.
