ಆರ್​ಟಿಪಿಸಿಆರ್ ಯಂತ್ರ ಕಾರ್ಯಾರಂಭ

ಗದಗ: ನಗರದ ಗದಗ ವೈದ್ಯಕೀಯ ವಿಜ್ಞಾನ ಸಂಸ್ಥೆಯಲ್ಲಿ (ಜಿಮ್್ಸ) ಕೋವಿಡ್ 19 ಪರೀಕ್ಷೆ ಅತ್ಯಾಧುನಿಕ ಆರ್​ಟಿಪಿಸಿಆರ್ ಯಂತ್ರ (ರಿಸರ್ವ್ ಟ್ರಾನ್ಸ್ಕ್ರಿಪ್ಶನ್ ಪಾಲಿಮರೈಸ್ಡ್ ಚೈನ್ ರಿಯಾಕ್ಷನ್) ಶುಕ್ರವಾರ ಕಾರ್ಯ ನಿರ್ವಹಣೆ ಆರಂಭಿಸಿದೆ.

ಸದ್ಯ ಜಿಮ್ಸ್​ನಲ್ಲಿ ಟ್ರೂನಾಟ್ ಯಂತ್ರದ ಮೂಲಕ ಕೋವಿಡ್ 19 ಪರೀಕ್ಷೆ ಆರಂಭಿಸಲಾಗಿದ್ದು, ದಿನಕ್ಕೆ ಕೇವಲ 50 ಸ್ಯಾಂಪಲ್​ಗಳ ಪರೀಕ್ಷೆ ಮಾಡುವ ಸಾಮರ್ಥ್ಯ ಹೊಂದಿದೆ. ಆದರೆ, ದಿನದಿಂದ ದಿನಕ್ಕೆ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ 1 ಕೋಟಿ ರೂ. ಮೊತ್ತದಲ್ಲಿ ಆರ್​ಟಿಪಿಸಿಇಆರ್ ಯಂತ್ರ ಸ್ಥಾಪಿಸಲಾಗಿದೆ. ಆರ್​ಟಿಪಿಸಿಆರ್ ಪ್ರಯೋಗಾಲಯ ಮೂಲಕ ಒಂದೇ ಸಲಕ್ಕೆ 50 ಕೋವಿಡ್ 19 ಸ್ಯಾಂಪಲ್​ಗಳನ್ನು ಪರೀಕ್ಷೆಗೆ ಒಳಪಡಿಸಬಹುದು. ಅಂದರೆ ದಿನಕ್ಕೆ 4 ಸಲ ಅಂದರೆ ಸುಮಾರು 200 ರೋಗಿಗಳ ಸ್ಯಾಂಪಲ್ ಪರೀಕ್ಷೆ ಮಾಡಬಹುದು ಎಂದು ಜಿಮ್್ಸ ಮೈಕ್ರೋಬಯಾಲಜಿ ವಿಭಾಗದ ಮುಖ್ಯಸ್ಥ ಡಾ. ಮಹೇಶ ಬರಗುಂಡಿ ವಿವರಿಸಿದರು.

ಟ್ರೂನಾಟ್ ಯಂತ್ರ: ಕೋವಿಡ್ 19 ಪ್ರಕರಣಕ್ಕೆ ಸಂಬಂಧಿಸಿದಂತೆ ರೋಗಿಯಿಂದ ತೆಗೆದುಕೊಂಡ ಗಂಟಲ ದ್ರವ ಸ್ಯಾಂಪಲ್ ಅನ್ನು ಬೆಂಗಳೂರು, ಬಳ್ಳಾರಿ, ಶಿವಮೂಗ್ಗ ಜಿಲ್ಲೆಗೆ ಕಳಿಸಬೇಕಿತ್ತು. ಹೀಗಾಗಿ ಸ್ಯಾಂಪಲ್​ನ ವೈದ್ಯಕೀಯ ವರದಿ ಬರುವುದು ಎರಡ್ಮೂರು ದಿನವಾಗುತ್ತಿತ್ತು. ಇದು ಕೊಂಚ ಸಮಸ್ಯೆ ಆಗಿದ್ದರಿಂದ ಜಿಲ್ಲಾಡಳಿತ ಜಿಮ್್ಸ ಆಸ್ಪತ್ರೆಯಲ್ಲಿಯೇ ಏ. 22ರಿಂದ ಟ್ರೂನಾಟ್ ಯಂತ್ರವುಳ್ಳ ಕೋವಿಡ್ 19 ಪ್ರಯೋಗಾಲಯ ಆರಂಭಿಸಿತು. ಈ ಯಂತ್ರದಿಂದ ದಿನಕ್ಕೆ 48ರಿಂದ 50 ಸ್ಯಾಂಪಲ್​ಗಳನ್ನು ಪರೀಕ್ಷೆ ಮಾಡಬಹುದು.