ದೇಶ ಮೊದಲು ಎನ್ನುವ ಭಾವನೆ, ನಂಬಿಕೆ ಇದ್ದರೆ ಜಗತ್ತಿಗೆ ಭಾರತವನ್ನು ವಿಶ್ವಗುರುವಿನ ಸ್ಥಾನಕ್ಕೆ ತಂದು ನಿಲ್ಲಿಸಬಹುದು. ದ್ವೇಷ, ಜಾತಿ-ಉಪಜಾತಿ ಕಂದಕಗಳನ್ನು ತೋಡಿಕೊಂಡು ರಾಜಕೀಯ ಸೇರಿ ವಿವಿಧ ಕಾರಣಕ್ಕಾಗಿ ಪೋಷಿಸಿಕೊಂಡು ಬರಲಾಗುತ್ತಿದೆ ಎಂದು ತಿಳಿಸಿದರು.
ಭಾರತದ ಐಕ್ಯತೆ, ಅಖಂಡತೆಗಾಗಿ ನಾವು ದೇಶ ಮೊದಲು ಎನ್ನುವುದು ಬರಬೇಕು. ಜನಸಂಖ್ಯೆಯಲ್ಲಿ 2ನೇ ಸ್ಥಾನದಲ್ಲಿರುವ ಭಾರತ ಮುಂದಿನ ವರ್ಷಕ್ಕೆ ಮೊದಲ ಸ್ಥಾನಕ್ಕೇರಲಿದೆ. ಅದೇ ರೀತಿ ಭಾರತವು ವಿಶ್ವಗುರು ಆಗಬೇಕಿದೆ ಎಂದರು.
ಪದವಿಯ ಮುಂದಿನ ಜೀವನದ ಹಾದಿ ಅತ್ಯಂತ ಕಠಿಣ ಹಾದಿ ಆಗಿದೆ. ಹೆಚ್ಚಿನ ಶ್ರಮ ಬೇಡುತ್ತದೆ. ಆ ಹಾದಿಯಲ್ಲಿ ಮುಂದುವರಿಯಲು ನಮಗೆ ಪ್ರಬಲ ಇಚ್ಛಾಶಕ್ತಿ ಇರಬೇಕು. ಆ ಇಚ್ಛಾಶಕ್ತಿ ಬರುವುದು ಆಧ್ಯಾತ್ಮಿಕ ಜ್ಞಾನದಿಂದ. ಪದವಿ ಜತೆಗೆ ಆಧ್ಯಾತ್ಮಿಕ ತಳಹದಿಗೆ ಒಂದು ಭದ್ರ ಬುನಾದಿ ನೀಡುವ ಸಂಸ್ಕಾರಯುತ ಶಿಕ್ಷಣ ನಮ್ಮದಾಗಿಸಿಕೊಳ್ಳುವುದು ಮುಖ್ಯ ಎಂದು ತಿಳಿಸಿದರು.
ರಾಷ್ಟ್ರದ ಜವಾಬ್ದಾರಿಯುತ ಪ್ರಜೆಗಳಾಗಲು ನಮ್ಮ ದೇಶದ ಅತ್ಯುನ್ನತ ಗ್ರಂಥವಾದ ಭಾರತ ಸಂವಿಧಾನವನ್ನು ಅಧ್ಯಯನ ಮಾಡುವುದೂ ಅಷ್ಟೇ ಅಗತ್ಯ ಎಂದು ಯುವ ಜನರಿಗೆ ಕಿವಿಮಾತು ಹೇಳಿದರು.
ಮಾತಾ ಅಮೃತಾನಂದಮಯಿ ಮಠದ ಪ್ರಧಾನ ಕಾರ್ಯದರ್ಶಿ ಸ್ವಾಮಿ ಪೂರ್ಣಾಮೃತಾನಂದ ಪುರಿ ಮಾತನಾಡಿ, ವಿದ್ಯಾರ್ಥಿಗಳು ಸಮಾಜಕ್ಕೆ, ದೇಶಕ್ಕೆ ದೊಡ್ಡ ಆಸ್ತಿಯಾಗಿ ಬೆಳೆಯಬೇಕು. ಪ್ರತಿಯೊಬ್ಬ ಹಿರಿಯರನ್ನು ತನ್ನ ತಂದೆ-ತಾಯಿಯೆಂದು ತಿಳಿದು ಗೌರವ ಸಲ್ಲಿಸಬೇಕು ಎಂದು ತಿಳಿಸಿದರು.
