ಯುವಕರ ಬಲಿ: ಬಂಗಾರಗುಂಡ ಗ್ರಾಮದಲ್ಲಿ ಅಕ್ರಮ ಮದ್ಯ ಎಲ್ಲೆಂದರಲ್ಲಿ ಮಾರಾಟ ಮಾಡುತ್ತಿರುವ ಪರಿಣಾಮ ಹಲವು ಯುವಕರು ಮದ್ಯದ ಚಟಕ್ಕೊಳಗಾಗಿ ಈವರೆಗೆ 20ಕ್ಕೂ ಹೆಚ್ಚು ಯುವಕರು ಪ್ರಾಣ ಕಳೆದುಕೊಂಡಿದ್ದಾರೆ. ಚಟಕ್ಕೆ ಹಣವಿಲ್ಲದೆ ಹೆತ್ತವರೊಂದಿಗೆ ಜಗಳವಾಡಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಅಧಿಕಾರಿಗಳಿಗೆ ಹಿಡಿ ಶಾಪ ಹಾಕಿದರು.
ಶಾಲೆಯೊಳಗೆ ಗುಂಡು ಪಾರ್ಟಿ: ಬಂಗಾರಗುಂಡ ಗ್ರಾಮದ ಸರ್ಕಾರಿ ಶಾಲೆಯ ಕಾಂಪೌಂಡ್ನಲ್ಲಿ ಬಿಂದಾಸ್ ಗುಂಡು ಪಾಟಿ ನಡೆಯುತ್ತಿದ್ದು, ಕುಡುಕರು ಎಲ್ಲೆಂದರಲ್ಲಿ ಮದ್ಯದ ಬಾಟಲಿಗಳನ್ನು ಎಸೆದು ಮಕ್ಕಳು, ಶಿಕ್ಷಕರು ಶಾಲೆಗೆ ಬರದಂಥ ವಾತಾವರಣ ನಿರ್ಮಿಸಿದ್ದಾರೆ ಎಂದು ಆವರಣದೊಳಗೆ ಬಿದ್ದ ಅಪಾರ ಮದ್ಯದ ಬಾಟಲಿಗಳನ್ನು ಭಾನುವಾರ ಬೆಳಗಿನ ಜಾವ 7 ಗಂಟೆ ವೇಳೆ ಗ್ರಾಮಸ್ಥರು ಪ್ರದರ್ಶಿಸಿದರು.
ಅಧಿಕಾರಿಗಳ ಅನುಚಿತ ವರ್ತನೆ: ಬಂಗಾರಗುಂಡ, ಕಪನೂರ ಗ್ರಾಮದಲ್ಲಿ ಇಷ್ಟೆಲ್ಲ ಮದ್ಯ ಮಾರಾಟ ಹಾಗೂ ಕುಡುಕರಿಂದ ನೆಮ್ಮದಿ ಹಾಳಾಗಿದೆ ಎಂದು ಗಮನಕ್ಕೆ ತಂದರೂ ಅಬಕಾರಿ ಅಧಿಕಾರಿಗಳು ಶನಿವಾರ ರಾತ್ರಿ ಬಂಗಾರಗುಂಡ ನಡೆದ ಪ್ರತಿಭಟನೆ ವೇಳೆ ಯಾರು ಮಾರಾಟ ಮಾಡುತ್ತಾರೋ ಸಾಕ್ಷಿ ಸಮೇತ ಸಾಕಷ್ಟು ಬಾಟಲಿಗಳನ್ನು ತೋರಿಸಿ ನೋಡೋಣ ಎಂದು ಮಹಿಳೆಯರಿಗೆ ಸವಾಲ್ ಹಾಕಿ ತಮ್ಮ ದರ್ಪ ತೋರಿದ್ದಾರೆ ಎಂದು ಅವಳಿ ಗ್ರಾಮಗಳ ಗ್ರಾಮಸ್ಥರು ಆರೋಪಿಸಿದರು.
ಉಪವಾಸ ಸತ್ಯಾಗ್ರಹ: ಇನ್ನೆರಡು ದಿನಗಳಲ್ಲಿ ಗ್ರಾಮಗಳಿಗೆ ಮೇಲಧಿಕಾರಿಗಳು, ತಹಸೀಲ್ದಾರ್ ಹಾಗೂ ಜಿಲ್ಲಾ ಅಬಕಾರಿ ಅಧಿಕಾರಿಗಳು ಆಗಮಿಸಿ ಅಕ್ರಮ ಮದ್ಯ ಮಾರಾಟಕ್ಕೆ ಕಡಿವಾಣ ಹಾಕದೆ ಇದ್ದರೆ ಜಿಲ್ಲಾಧಿಕಾರಿ ಕಚೇರಿ ಎದುರು ಸಾಕ್ಷಿ ಸಮೇತ ಹಾಗೂ ಮುದ್ದೇಬಿಹಾಳ ಅಬಕಾರಿ ಅಧಿಕಾರಿಗಳ ವಿರುದ್ಧ ಉಪವಾಸ ಸತ್ಯಾಗ್ರಹ ಮಾಡುವುದು ಖಚಿತ ಎಂದು ಅವಳಿ ಗ್ರಾಮಗಳ ಗ್ರಾಮಸ್ಥರು ಎಚ್ಚರಿಸಿದರು.
