ಪಟ್ಟಣದಲ್ಲಿ ಮುಸ್ಲಿಂ ಸಮುದಾಯದ ಎರಡು ಸ್ಮಶಾನಗಳಿವೆ. ವೀರಶೈವ ಲಿಂಗಾಯತ ಸಮಾಜ, ಕಲಾಲ್ ಸಮಾಜ, ಮಂಚಿ ಬಳಗ, ಭೋವಿ ಸಮಾಜ, ಕ್ರಿಶ್ಚಿಯನ್ ಸಮುದಾಯದವರು ಪ್ರತ್ಯೇಕವಾಗಿ ಸ್ಮಶಾನ ಹೊಂದಿದ್ದಾರೆ. ಉಳಿದಂತೆ ಹಿಂದು ಸಮಾಜದ ಇತರ ಎಲ್ಲ ಜಾತಿ, ಸಮುದಾಯದವರು ಈ ಸ್ಮಶಾನದಲ್ಲಿ ಅಂತ್ಯ ಸಂಸ್ಕಾರ ನಡೆಸುತ್ತಾರೆ. ಸುಮಾರು ಒಂದು ಎಕರೆಗಿಂತ ಹೆಚ್ಚು ವ್ಯಾಪ್ತಿಯಿರುವ ಈ ಭೂಮಿಯನ್ನು 1960ಕ್ಕಿಂತ ಮೊದಲೇ ದಾನವಾಗಿ ನೀಡಲಾಗಿದೆ. ಈ ಸ್ಮಶಾನದಲ್ಲಿ ಕುಡಿಯುವ ನೀರಿನ ಟ್ಯಾಂಕ್ ವ್ಯವಸ್ಥೆ ಮಾಡಿದ್ದರೂ ನಿರ್ವಹಣೆ ಕೊರತೆ ಇದೆ. ಶವ ದಹನ ಮಂಟಪದ ಮೇಲ್ಛಾವಣಿ ಸೋರುತ್ತಿದೆ. ಇದರಿಂದ ಮಳೆಗಾಲದಲ್ಲಿ ತೊಂದರೆಯಾಗುತ್ತಿದೆ. ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಮೂಲಕ ದೊರೆತ ಅನುದಾನದಿಂದ ದೊರೆತ ಚಿತಾಗಾರದ ಯಂತ್ರ ಸ್ಥಳಾವಕಾಶದ ಕೊರತೆಯಿಂದ ಮೂಲೆ ಸೇರಿದೆ.
