ಮುರ್ಕಿ ನಿವಾಸಿಯಾದ ರವಿ ಡಿಇಡಿ ಪದವೀಧರರು. 2010-11ರಲ್ಲಿ ಅರಣ್ಯ ಇಲಾಖೆಯಲ್ಲಿ ಉಪ ವಲಯ ಅರಣ್ಯಾಧಿಕಾರಿ ಆಗಿ ಆಯ್ಕೆಯಾಗಿ ಕೊಡಗು ಜಿಲ್ಲೆಯ ವಿರಾಜಪೇಟೆ ವಿಭಾಗದಲ್ಲಿ ಸೇವೆಗೆ ಸೇರಿದರು. ಕರ್ನಾಟಕ ಗಡಿಯಿಂದ ಕೇರಳದ ಗಡಿಯೊಳಗೆ ಕಳ್ಳ ಸಾಗಣೆಯಾಗುತ್ತಿದ್ದ ಜಾನುವಾರು ರಹಸ್ಯ ಬಯಲಿಗೆಳೆದು, ಕೃತ್ಯ ಮಾಡಿದವರಿಗೆ ಜೈಲಿಗೆ ಅಟ್ಟಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ನಂತರ ತಾಲೂಕಿನ ಸಂತಪುರ, ಔರಾದ್ ಉಪ ವಲಯ ಅರಣ್ಯ ಕಚೇರಿಯಲ್ಲಿ ಸೇವೆ ಸಲ್ಲಿಸಿ, 1300 ಎಕರೆ ಅರಣ್ಯ ಒತ್ತುವರಿ ಮಾಡಿದ ಭೂಮಿ ಸರ್ಕಾರದ ಸುಪರ್ದಿಗೆ ಕೊಟ್ಟರು. 75 ಕಿಮೀ ರಸ್ತೆಯಲ್ಲಿ 50 ಸಾವಿರಕ್ಕೂ ಹೆಚ್ಚಿನ ಸಸಿ ರಸ್ತೆ ಬದಿಗಳಲ್ಲಿ ನೆಟ್ಟರು. ವನ್ಯ ಪ್ರಾಣಿಗಳಿಂದ ಬೆಳೆ ಮತ್ತು ಪ್ರಾಣ ಹಾನಿಗೊಳಗಾದ 350 ಕುಟುಂಬಗಳಿಗೆ ಸರ್ಕಾರದ ಸಹಾಯಧನ ಕೊಡಿಸುವಲ್ಲಿ ರವಿ ಅವರ ಕೊಡುಗೆ ಅಪಾರ.
ಇತ್ತೀಚೆಗೆ ಗಡಿಕುಶನೂರು ಗ್ರಾಮದಲ್ಲಿ ರೈತ ಮಾರುತಿ (30) ವನ್ಯ ಪ್ರಾಣಿ ದಾಳಿಗೆ ಪ್ರಾಣ ಕಳೆದುಕೊಂಡಿದ್ದ. ರೈತನ ಕುಟುಂಬಕ್ಕೆ 7.50 ಲಕ್ಷ ರೂ. ಸಹಾಯಧನ ಕೊಡಿಸುವಲ್ಲಿ ರವಿ ಪ್ರಮುಖ ಪಾತ್ರ ವಹಿಸಿದರು. ರವಿ ಸಾಧನೆ ಹಾಗೂ ಸಿಎಂ ಪ್ರಶಸ್ತಿ ಮುಡಿಗೇರಿದ್ದಕ್ಕೆ ಅರಣ್ಯ ಇಲಾಖೆ ಡಿಸಿಎಫ್ ಶಿವಶಂಕರ, ಆರ್.ಎಫ್.ಒ ಪ್ರವೀಣಕುಮಾರ, ಪ್ರೇಮಶೇಖರ ಇತರರು ಹರ್ಷ ವ್ಯಕ್ತಪಡಿಸಿದ್ದಾರೆ.
