ನಾಡಿನ ಅಪೂರ್ವ ವನಸಿರಿ ಹಾಗೂ ವನ್ಯಜೀವಿಗಳ ರಕ್ಷಣೆಗೆ ಮುಂಚೂಣಿವಹಿಸುವ ಗಸ್ತು ಅರಣ್ಯಪಾಲಕರು, ಅರಣ್ಯ ವೀಕ್ಷಕರು, ದಿನಗೂಲಿ ಮತ್ತು ಕ್ಷೇಮಾಭಿವೃದ್ಧಿ ನೌಕರರು ಸೇರಿದಂತೆ ವಾಹನ ಚಾಲಕರು ಅತ್ಯಂತ ದುರ್ಗಮ ಹಾದಿ ಹಾಗೂ ದಟ್ಟ ಕಾಡಿನೊಳಗೆ ಕಾರ್ಯ ನಿರ್ವಹಿಸುತ್ತಾರೆ. ವಾರಾನುಗಟ್ಟಲೇ ಮಳೆ, ಗಾಳಿ, ಬಿಸಿಲು ಎನ್ನದೆ ತಮ್ಮ ಕುಟುಂಬಗಳಿಂದ ದೂರ ಉಳಿದು ತುರ್ತು ಸಂದರ್ಭಗಳಲ್ಲೂ ಮೂಲ ಸೌಕರ್ಯ ಇಲ್ಲದೆ ಕಾರ್ಯ ನಿರ್ವಹಿಸುವುದನ್ನು ಈ ಹಿಂದೆ ತಾವೇ ಖುದ್ದಾಗಿ ಪರಿಶೀಲಿಸಿದ್ದು, ಇಂತಹ ಪರಿಸ್ಥಿತಿ ಸಾಧ್ಯವಾದಷ್ಟು ನಿಯಂತ್ರಿಸುವ ಸಲುವಾಗಿ ವಿಶೇಷ ಸುರಕ್ಷತಾ ಪರಿಕರಗಳಿರುವ 9,100 ವಿಶೇಷ ಕಿಟ್ಗಳನ್ನು ನೀಡಲಾಗುತ್ತದೆ. ರಾಜ್ಯ ಸಾಬೂನು ಮತ್ತು ಮಾರ್ಜಕಗಳ ಲಿಮಿಟೆಡ್(ಕೆಎಸ್ಡಿಎಲ್) ಸಹಭಾಗಿತ್ವದೊಂದಿಗೆ ಸಿಎಸ್ಆರ್ ನಿಧಿಯಲ್ಲಿ ಅರಣ್ಯ ಸಿಬ್ಬಂದಿಗೆ ವಿತರಣೆ ಮಾಡಲಾಗುತ್ತಿದೆ. ಈ ಕಿಟ್ನಲ್ಲಿ ಮಳೆ ಸುರಕ್ಷಿತ ಕವಚ, ವಿಶೇಷವಾಗಿ ವಿನ್ಯಾಸಗೊಂಡ ಸದೃಢ ಬೂಟುಗಳು, ಕುಡಿಯುವ ನೀರಿನ ಬಾಟಲ್ ಹಾಗೂ ರಕ್ಷಣಾಯುಧ ಪರಿಕರ ಇಡುವ ಬ್ಯಾಗ್ ಇರಲಿದೆ. ಸಿಬ್ಬಂದಿ ಇದನ್ನು ಸದ್ಬಳಕೆ ಮಾಡಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
