ವಿಶ್ವ ಹಿಂದು ಪರಿಷತ್ತಿನ ಸೇವಾ ಭಾರತಿ ಶಾಲೆಯಲ್ಲಿ ದೈಹಿಕ ಶಿಕ್ಷಣ ಶಿಕ್ಷಕರಾಗಿರುವ ರಾಮಚಂದ್ರ ಅಪ್ಪಟ ದೇಶಭಕ್ತ. ತನ್ನ ಮಗ ಪ್ರಜ್ವಲ್ ಯೋಧನಾಗಬೇಕೆಂಬ ಆಸೆಯನ್ನು ಇಟ್ಟುಕೊಂಡಿದ್ದರು. ಅದರಂತೆ ಪ್ರಜ್ವಲ್ ಅಗ್ನಿವೀರ್ ನೇಮಕಾತಿಯಾಗಿ ಪಶ್ಚಿಮ ಬಂಗಾಳದಲ್ಲಿ ಯೋಧರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದರು. ರಜೆ ಮೇಲೆ ಊರಿಗೆ ಬಂದ ಮಗನಿಗೆ ಯೋಧನ ಸಮವಸ ಹಾಕಿಸಿಕೊಂಡು ಗುರುವಾರ ಶ್ರೀಚಾಮರಾಜೇಶ್ವರಸ್ವಾಮಿ ದೇವಾಲಯಕ್ಕೆ ಕುಟುಂಬ ಸಮೇತ ಕರೆದುಕೊಂಡು ಹೋಗಿ ಪೂಜೆ ಸಲ್ಲಿಸಿದ್ದರು. ಮಗನ ಪೋಟೊ, ಕುಟುಂಬದ ಪೋಟೋ ತೆಗೆಸಿ ಸಂಭ್ರಮಿಸಿದ್ದರು. ಆದರೆ ಗುರುವಾರ ರಾತ್ರಿ ಅಪಘಾತದಲ್ಲಿ ಮಗ ಮೃತಪಟ್ಟ. ರಾಮಚಂದ್ರ ಶಿವಮೊಗ್ಗ ಮೂಲದವರಾಗಿದ್ದು, ಅಂತ್ಯಕ್ರಿಯೆಗಾಗಿ ಮೃತದೇಹವನ್ನು ಅಲ್ಲಿಗೆ ಕೊಂಡೊಯ್ಯಲಾಯಿತು.
