ದಲಿತ ಮುಖಂಡ ನಿರ್ವಾಣಪ್ಪ ಮಾತನಾಡಿ, ವಿರಾಜಪೇಟೆ ತಾಲೂಕಿನ ದಿಡಳ್ಳಿಯಿಂದ ಸುಮಾರು 250ಕ್ಕೂ ಅಧಿಕ ಕುಟುಂಬಗಳನ್ನು ಒಕ್ಕಲೆಬ್ಬಿಸಿ ಬ್ಯಾಡಗೂಟ್ಟಕ್ಕೆ ಕರೆತರಲಾಗಿದೆ. ಸರ್ಕಾರದ ವತಿಯಿಂದ ನಿರ್ಮಿಸಲ್ಪಟ್ಟಂತಹ ಮನೆಗಳು ಕೂಡ ಇನ್ನೂ ಪರಿಪೂರ್ಣವಾಗಿ ವಾಸಕ್ಕೆ ಯೋಗ್ಯವಾಗಿಲ್ಲ. ಈ ಗಿರಿಜನ ಕಾಲನಿಗೆ ಸೂಕ್ತವಾದ ರಸ್ತೆ ಅಭಿವೃದ್ಧಿ ಇಲ್ಲ. ಕುಡಿಯುವ ನೀರಿನ ವ್ಯವಸ್ಥೆ ಸರಿ ಇಲ್ಲ ಮತ್ತು ಇಲ್ಲಿನ ಮಕ್ಕಳಿಗೆ ಉನ್ನತಮಟ್ಟದ ಶಿಕ್ಷಣದ ಕೊರತೆ ಇರುವ ಕಾರಣದಿಂದಾಗಿ ಮತ್ತು ಶಾಲೆಗಳಿಗೆ ಬಹುದೂರ ನಡೆದು ಸಾಗುವ ಪರಿಸ್ಥಿತಿ ಇರುವುದರಿಂದಾಗಿ ಗಿರಿಜನ ಕಾಲನಿಗೆ ಹೊಂದಿಕೊಂಡಂತೆ ಒಂದು ಪ್ರಾಥಮಿಕ ಶಾಲೆ ನಿರ್ಮಾಣವಾಗಬೇಕು. ಅಲ್ಲದೆ, ಗಿರಿಜನರು ಶ್ರಮಿಕ ಜೀವಿಗಳಾಗಿದ್ದು ಇದೀಗ ನೂತನವಾಗಿ ಕಾಲನಿಗೆ ಹೊಂದಿಕೊಂಡಂತೆ ಮದ್ಯದ ಅಂಗಡಿ ತೆರೆಯಲ್ಪಟ್ಟಿದ್ದು, ಗಿರಿಜನರು ತಮ್ಮ ದಿನದ ಕೂಲಿಯನ್ನು ಮದ್ಯದ ಅಂಗಡಿಗೆ ಸುರಿದು ತಮ್ಮ ಜೀವನವನ್ನು ನರಕ ಮಾಡಿಕೊಳ್ಳುತ್ತಿದ್ದಾರೆ. ಕೂಡಲೇ ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳು ಈ ಬಗ್ಗೆ ಗಮನ ಹರಿಸಿ ಸೂಕ್ತ ಕ್ರಮ ಕೈಗೊಳ್ಳಬೇಕು. ಮುಂದಿನ ದಿನಗಳಲ್ಲಿ ಸಮಗ್ರ ಗಿರಿಜನ ಅಭಿವೃದ್ಧಿ ಯೋಜನಾ ಅಧಿಕಾರಿಗಳು ಹಾಗೂ ಸಮಾಜ ಕಲ್ಯಾಣ ಇಲಾಖೆಯ ಅಧಿಕಾರಿಗಳೊಂದಿಗೆ ಗಿರಿಜನ ಕಾಲನಿಯಲ್ಲಿ ಉನ್ನತ ಮಟ್ಟದ ಸಭೆ ನಡೆಸಿ ಇಲ್ಲಿನ ದಲಿತ ನಿವಾಸಿಗಳ ಸಮಸ್ಯೆ ನಿವಾರಣೆಗೆ ಮುಂದಾಗಲಾಗುವುದೆಂದು ತಿಳಿಸಿದರು.
