ವಿಜಯವಾಣಿ ಸುದ್ದಿಜಾಲ ಸಾಗರ
ನಗರಸಭಾ ಸದಸ್ಯರು ತಮ್ಮ ಅಕಾರಾವ ಮುಗಿಯುವ ಕೇವಲ 56 ದಿನ ಇರುವಾಗ 40 ಲಕ್ಷ ರೂ. ವೆಚ್ಚ ಮಾಡಿ ದೆಹಲಿ, ಹರಿಯಾಣ ರಾಜ್ಯಕ್ಕೆ ಅಧ್ಯಯನ ಪ್ರವಾಸ ಮಾಡಲು ಸಿದ್ಧತೆ ನಡೆಸಿದ್ದರು. ಇದು ಸಾರ್ವಜನಿಕ ವಲಯದಲ್ಲಿ ಚರ್ಚೆಯಾಗಿತ್ತಲ್ಲದೆ, ಪಕ್ಷಗಳಲ್ಲೇ ಪರ-ವಿರೋಧ ವ್ಯಕ್ತವಾಗಿತ್ತು. ಇದೀಗ ಪ್ರವಾಸಕ್ಕೆ ತಡೆ ಬಿದ್ದಂತಾಗಿದೆ.
ನಗರಸಭೆಯ ಆಡಳಿತ ಪಕ್ಷ ಬಿಜೆಪಿಯ 16 ಸದಸ್ಯರು ಪ್ರವಾಸ ಹೋಗುವುದಿಲ್ಲ ಎಂದು ಸಾಮಾನ್ಯ ಸಭೆಯಲ್ಲೇ ಅಕೃತವಾಗಿ ಘೋಷಿಸಿದ್ದರು. ನಿರಂತರ ಮಳೆಯಿಂದ ಸಾಗರ ನಗರದ ರಸ್ತೆಗಳು ಗುಂಡಿ ಬಿದ್ದು ಓಡಾಡಲು ಸಾಧ್ಯವಾಗದ ಪರಿಸ್ಥಿತಿ ಎದುರಾಗಿದೆ. ಮಳೆಯಿಂದ ಸಾಕಷ್ಟು ಮನೆಗಳು ಬಿದ್ದು, ಗೋಡೆಗಳು ಕುಸಿದು ಹಾನಿಯಾಗಿವೆ. ಇವುಗಳ ನಡುವೆ ನಗರಸಭಾ ಸದಸ್ಯರು ಪ್ರವಾಸಕ್ಕೆ ಸರ್ವಸಿದ್ಧತೆ ನಡೆಸಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿಯೂ ತೀವ್ರ ಟೀಕೆ ವ್ಯಕ್ತವಾಗಿತ್ತು.
ಕೆಲವು ಸದಸ್ಯರು ಪ್ರವಾಸಕ್ಕೆ ಹೋಗಲೇಬೇಕೆಂದು ಹಠತೊಟ್ಟು ತೆರೆಮರೆಯಲ್ಲಿ ಬಹಳಷ್ಟು ಪ್ರಯತ್ನ ನಡೆಸಿದ್ದರು. ಕೊನೆಗೆ ಕಾಂಗ್ರೆಸ್ನ ಕೆಲವು ಸದಸ್ಯರು ನಾವು ಪ್ರವಾಸಕ್ಕೆ ತೆರಳಿದರೆ ಕೆಟ್ಟ ಹೆಸರು ಬರಲಿದೆ ಎಂದು ಅರಿತು ಜಾಣನಡೆ ಪ್ರದರ್ಶಿಸಿದ್ದಾರೆ.
ನಾಮ ನಿರ್ದೇಶಿತರು ಸೇರಿದಂತೆ 36 ಜನ ಸದಸ್ಯರಿರುವ ನಗರಸಭೆಯಲ್ಲಿ ಕೆಲ ಸದಸ್ಯರು ಪ್ರವಾಸಕ್ಕೆ ಹೋಗಲು ಅಂತಿಮ ಪ್ರಯತ್ನನಡೆಸಿದರು. ಆದರೆ ಆಯುಕ್ತರು, ಅಧ್ಯಕ್ಷರು ಸೇರಿ ಬಹುತೇಕ ಸದಸ್ಯರು ಪಾಲ್ಗೊಳ್ಳದೆ ಇರುವುದರಿಂದ ಪ್ರವಾಸವನ್ನು ಅಂತಿಮವಾಗಿ ರದ್ದುಗೊಳಿಸಲಾಗಿದೆ.
