ಅತಂತ್ರ ಸ್ಥಿತಿಯಲ್ಲಿ ಬಯಲು ಕಮ್ಮಾರರು

ಲಕ್ಷ್ಮೇಶ್ವರ: ಕರೊನಾ ಭೀತಿಯಿಂದಾಗಿ ಇಡೀ ದೇಶವೇ ಲಾಕ್​ಡೌನ್ ಘೊಷಣೆಯಲ್ಲಿ ಇರುವುದರಿಂದ ಅಲೆಮಾರಿ ಕುಟುಂಬಗಳೀಗ ಅತಂತ್ರ ಸ್ಥಿತಿಯಲ್ಲಿವೆ. ಪಟ್ಟಣದ ಹೊರವಲಯದಲ್ಲಿ ಬೀಡುಬಿಟ್ಟಿರುವ ಬಯಲು ಕಮ್ಮಾರರು ಒಂದು ಹೊತ್ತಿನ ಊಟಕ್ಕೂ ಪರದಾಡುವ ಸ್ಥಿತಿ ನಿರ್ವಣವಾಗಿದೆ. ಬಯಲು ಕಮ್ಮಾರರು ಸಿದ್ಧಪಡಿಸಿ ಕೊಡುವ ಕೃಷಿ ಉಪಕರಣಗಳನ್ನು ಯಾರೂ ಕೇಳುವವರಿಲ್ಲದಂತಾಗಿದೆ.

ಬಡತನ, ಅನಕ್ಷರತೆಯಿಂದ ಅಂದಿನ ದುಡಿಮೆಯ ಫಲದಿಂದ ಬಂದ ದುಡ್ಡಿನಲ್ಲಿ ಜೀವನ ಸಾಗಿಸುವ ಇವರು ಇದೀಗ ಬದುಕು ಸಾಗಿಸುವುದೇ ದುಸ್ತರವಾಗಿದೆ. ಮುಂದಿನ ಊರಿಗಾದರೂ ಹೋಗಿ ಬದುಕಿದರಾಯಿತೆಂದರೂ ಅದಕ್ಕೂ ಅವಕಾಶವಿಲ್ಲ. ಜೀವನಾವಶ್ಯಕ ಸಾಮಾನು ಸರಂಜಾಮುಗಳೊಂದಿಗೆ ಮಕ್ಕಳು, ವಯೋವೃದ್ಧರು ಸೇರಿ ಕುಟುಂಬವನ್ನು ಊರಿಂದೂರಿಗೆ ಸಾಗಿಸುವ ಗೂಡ್ಸ್ ಗಾಡಿಯೇ ಇವರಿಗೆ ಆಶ್ರಯ ತಾಣವಾಗಿದೆ.

ರೈತ ಸಮುದಾಯಕ್ಕೆ ಬೇಕಾಗುವ ಕುಡಗೋಲು, ಕುಂಟೆಯ ಕುಡ, ತಾಳು, ಕೊಡಲಿ, ಸಲಿಕೆ, ಕುರ್ಚಗಿ, ಫಿಕಾಸಿ, ಕಂದಲಿ, ಗುದ್ದಲಿ ಹೀಗೆ ಹತ್ತಾರು ಸಲಕರಣೆಗಳನ್ನು ಸಿದ್ಧಪಡಿಸಿ ಮಾರುಕಟ್ಟೆ ಬೆಲೆಗಿಂತ ಕಡಿಮೆ ದರದಲ್ಲಿ ಮಾರಾಟ ಮಾಡುತ್ತಾರೆ. ಪುರುಷರು ಕಬ್ಬಿಣವನ್ನು ಕಾಯಿಸಿದರೆ ಮಹಿಳೆಯರು ಕಾಯ್ದ ಕಬ್ಬಿಣಕ್ಕೆ ಒಂದು ರೂಪ ಬರುವಂತೆ ಮಾಡುತ್ತಾರೆ. ಮಹಾರಾಷ್ಟ್ರ ಮೂಲದ ಇವರು ಊರೂರು ಅಲೆಯುತ್ತ ರೈತರ ಕೃಷಿ ಸಲಕರಣೆಗಳನ್ನು ಸಿದ್ಧಪಡಿಸಿ ಮಾರಾಟ ಮಾಡುವ ಮೂಲಕ ಬದುಕು ಸಾಗಿಸುತ್ತಾರೆ. ಆ ಊರಿನಲ್ಲಿ ತಮ್ಮ ವಸ್ತುಗಳಿಗೆ ಬೇಡಿಕೆ ಇಲ್ಲ ಕೆಲಸವಿಲ್ಲ ಎಂಬುದನ್ನರಿತು ಮುಂದಿನ ಊರಿಗೆ ತಮ್ಮ ಟಂಟಂನೊಂದಿಗೆ ಪಯಣ ಬೆಳೆಸುತ್ತಾರೆ. ದೊಡ್ಡ ಗ್ರಾಮ, ಪಟ್ಟಣದ ಹೊರವಲಯದ ಸಾಲಿಗುಡಿ, ರಸ್ತೆ ಪಕ್ಕದ ಖಾಲಿ ನಿವೇಶನದಲ್ಲಿ ನಾಲ್ಕಾರು ದಿನಗಳ ಕಾಲ ನೆಲೆ ನಿಲ್ಲುತ್ತಾರೆ.