ಅಚ್ಚುಮನೆ ಕಾರ್ಯ ಮೆಚ್ಚಿಕೊಂಡ ವಿದ್ಯಾರ್ಥಿಗಳು: ವಿಜಯವಾಣಿ ಪತ್ರಿಕೆ ಮುದ್ರಣಾಲಯಕ್ಕೆ ಭಾರತೀ ಕಾಲೇಜಿನ ಮಕ್ಕಳು ಭೇಟಿ

 ಮೈಸೂರು: ನಂ.1 ಕನ್ನಡದ ದಿನಪತ್ರಿಕೆ ‘ವಿಜಯವಾಣಿ’ ಮುದ್ರಣಾಲಯಕ್ಕೆ ಮಂಡ್ಯ ಜಿಲ್ಲೆಯ ಮದ್ದೂರು ತಾಲೂಕಿನ ಕೆ.ಎಂ.ದೊಡ್ಡಿಯ ಭಾರತೀ ಕಾಲೇಜಿನ ವಿದ್ಯಾರ್ಥಿಗಳು ಶುಕ್ರವಾರ ಸಂಜೆ ಭೇಟಿ ನೀಡಿ, ಅಚ್ಚುಮನೆಯ ಕಾರ್ಯವೈಖರಿಯನ್ನು ಕುತೂಹಲದಿಂದ ವೀಕ್ಷಿಸಿದರು.

ಮೈಸೂರು ತಾಲೂಕಿನ ಸಿದ್ದಲಿಂಗಪುರ ಗ್ರಾಮದಲ್ಲಿರುವ ಮುದ್ರಣಾಲಯಕ್ಕೆ 2ನೇ ವರ್ಷದ ಎಂ.ಕಾಂ.ನ 29 ವಿದ್ಯಾರ್ಥಿಗಳು ಮತ್ತು ಅವರೊಂದಿಗೆ ಸಹಾಯಕ ಪ್ರಾಧ್ಯಾಪಕ ಡಾ.ಕೆ.ಟಿ.ಗಣೇಶ್ ಭೇಟಿ ಕೊಟ್ಟಿದ್ದರು. ಇವರೆಲ್ಲರೂ ಉತ್ಸಾಹ, ಕೌತಕದಿಂದ ಪ್ರವೇಶಿಸಿ ಸಂಭ್ರಮಿಸಿದರು. ಇವರ ಭೇಟಿ ಸಂದರ್ಭದಲ್ಲಿ ನಡೆಯುತ್ತಿದ್ದ ವಿಜಯವಾಣಿಯ ‘ವಿದ್ಯಾರ್ಥಿ ಮಿತ್ರ’ ಪತ್ರಿಕೆ ಮುದ್ರಿಸುವ ಪ್ರಕ್ರಿಯೆಯನ್ನು ಸಮೀಪದಿಂದ ನೋಡಿದರು.

ಪತ್ರಿಕೆ ಮುದ್ರಣಕ್ಕೆ ಮುನ್ನ ನಡೆಯುವ ಪ್ಲೇಟ್ ತಯಾರಿಕೆ, ಕಲರ್ ಕಾಂಬಿನೇಷನ್...ಹೀಗೆ ವಿವಿಧ ಪೂರ್ವಸಿದ್ಧತೆಯ ಕುರಿತು ಮಾಹಿತಿ ಪಡೆದುಕೊಂಡರು. ಅಲ್ಲಿದ್ದ ಸಿಬ್ಬಂದಿ, ತಾಂತ್ರಿಕ ಪರಿಣಿತರು ಸಿದ್ಧತೆಯನ್ನು ಪ್ರಾಯೋಗಿಕವಾಗಿ ತಿಳಿಸಿಕೊಟ್ಟರು. ಮುದ್ರಣ ಪ್ರಕ್ರಿಯೆ ಪ್ರತಿಯೊಂದು ಹಂತವನ್ನು ಇವರೆಲ್ಲರೂ ಕಣ್ತುಂಬಿಕೊಂಡರು.

ಸಂಪಾದಕೀಯ ವಿಭಾಗದಲ್ಲಿರುವ ಉಪಸಂಪಾದಕರು, ವಿವಿಧ ಊರುಗಳಿಂದ ವರದಿಗಾರರು ಕಳುಹಿಸಿಕೊಡುವ ಸುದ್ದಿಯನ್ನು ಪರಿಶೀಲಿಸಿ, ಸೂಕ್ತ ಶೀರ್ಷಿಕೆ ಕೊಟ್ಟು, ವಿನ್ಯಾಸ ಮಾಡಿ ಮುದ್ರಣಾಲಯಕ್ಕೆ ಕಳುಹಿಸಿಕೊಟ್ಟ ಪಿಡಿಎಫ್ ಪುಟವನ್ನು ವಿದ್ಯಾರ್ಥಿಗಳು ಗಮನಿಸಿದರು. ಬಹಳ ಕಾತರ ಹೊಂದಿದ್ದ ವಿದ್ಯಾರ್ಥಿಗಳು ಸಣ್ಣಪುಟ್ಟ ಮಾಹಿತಿಯನ್ನೂ ಕೇಳಿ ಪಡೆದುಕೊಂಡರು, ಅದನ್ನು ಬರೆದುಕೊಂಡರು. ಶರವೇಗದಲ್ಲಿ ನಡೆಯುತ್ತಿದ್ದ ನೂರಾರು ಪ್ರತಿಗಳ ಮುದ್ರಣವನ್ನು ಕೆಲ ವಿದ್ಯಾರ್ಥಿಗಳು ವಿಡಿಯೋ, ಫೋಟೋಗಳ ಮೂಲಕ ಸೆರೆ ಹಿಡಿದುಕೊಂಡರು.

ಟಿವಿ, ಸಿನಿಮಾದಲ್ಲಿ ಮುದ್ರಣಾಲಯವನ್ನು ನೋಡಿದ್ದ ಇವರೆಲ್ಲರಿಗೂ ಇದನ್ನು ಖುದ್ದು ನೋಡುವ ಮೊದಲ ಅನುಭವವಾಗಿತ್ತು. ಆಧುನಿಕ ಪ್ರೆಸ್ ಅನ್ನು ಕಂಡು ಬೆರಗಾದರು.

ವಿಜಯವಾಣಿಯಲ್ಲಿ ಪ್ರಕಟವಾಗುವ ಸುದ್ದಿಗಳು, ಲೇಖನ, ಅಂಕಣಗಳನ್ನು ಓದುವ ಮೂಲಕ ಅನೇಕ ವಿಷಯಗಳನ್ನು ತಿಳಿದುಕೊಂಡಿರುವುದಾಗಿ ವಿದ್ಯಾರ್ಥಿಗಳು ತಿಳಿಸಿದರು. ರಾಜಕೀಯ, ಅಪರಾಧ ಸುದ್ದಿಗಳಿಲ್ಲದ ‘ವಿದ್ಯಾರ್ಥಿ ಮಿತ್ರ’ ಪತ್ರಿಕೆಯನ್ನು ಓದುತ್ತಿರುವುದರಿಂದ ಆಗಿರುವ ಅನುಕೂಲಗಳು, ಕಲಿಕೆಯಲ್ಲಿ ಉಂಟಾಗಿರುವ ಪ್ರಗತಿಯನ್ನೂ ವಿದ್ಯಾರ್ಥಿಗಳು ಹಂಚಿಕೊಂಡರು.