ತಂಗುದಾಣದೊಳಗೂ ಛತ್ರಿ ಹಿಡಿಯಬೇಕು!

ಹರಿಪ್ರಸಾದ ನಂದಳಿಕೆ ಕಾರ್ಕಳ

ಬೆಳ್ಮಣ್‌ನಿಂದ ಶಿರ್ವ ಮಾರ್ಗವಾಗಿ ಉಡುಪಿಗೆ ಸಾಗುವ ರಾಜ್ಯ ಹೆದ್ದಾರಿಗೆ ಹೊಂದಿಕೊಂಡಿರುವ ಬೆಳ್ಮಣ್ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಜಂತ್ರದಲ್ಲಿರುವ ಬಸ್ ತಂಗುದಾಣವೊಂದು ಹಲವು ವರ್ಷಗಳಿಂದಲೂ ಶಿಥಿಲಾವಸ್ಥೆಯಲ್ಲಿದೆ. ಮಳೆಗಾಲ ಆರಂಭವಾಗಿರುವುದರಿಂದ ಯಾವಾಗ ಬೇಕಾದರೂ ಕುಸಿಯುವ ಭೀತಿ ಎದುರಾಗಿದ್ದು, ಪ್ರಯಾಣಿಕರ ಪಾಲಿಗೆ ಯಮಸ್ವರೂಪವಾಗುವ ಅಪಾಯವಿದೆ.

ಮಳೆ, ಬಿಸಿಲಿಗೆ ಪ್ರಯಾಣಿಕರಿಗೆ ಆಸರೆಯಾಗಬೇಕಾದ ತಂಗುದಾಣ, ಮಳೆ ಬಂದಾಗ ಪ್ರಯಾಣಿಕರು ಇಲ್ಲಿ ಛತ್ರಿ ಹಿಡಿದು ನಿಲ್ಲುವಂಥ ಸ್ಥಿತಿಯಿದೆ. ನಿರಂತರ ಮಳೆ ಸುರಿದರೆ ತಂಗುದಾಣದೊಳಗೆ ನೀರು ಶೇಖರಣೆಯಾಗುತ್ತದೆ. ತೀರಾ ದುಸ್ಥಿತಿಯಲ್ಲಿರುವ ಜಂತ್ರದ ಪ್ರಯಾಣಿಕರ ತಂಗುದಾಣ ವಿದ್ಯಾರ್ಥಿಗಳು, ಪ್ರಯಾಣಿಕರ ಪಾಲಿಗೆ ಇದ್ದೂ ಇಲ್ಲದಂತಾಗಿದೆ.

ಮೇಲ್ಛಾವಣಿಯಲ್ಲಿ ಬಿರುಕು: ಬಹಳ ವರ್ಷಗಳ ಹಿಂದೆ ಈ ಬಸ್ ನಿಲ್ದಾಣ ನಿರ್ಮಾಣಗೊಂಡಿದ್ದು, ಸಂಪೂರ್ಣ ಶಿಥಿಲಗೊಂಡಿದೆ. ಮೇಲ್ಛಾವಣಿ ಹಾಳಾಗಿದ್ದು, ಸಿಮೆಂಟ್ ಹಾಗೂ ಕಾಂಕ್ರೀಟ್ ಅವಶೇಷಗಳು ಬೀಳುತ್ತಿವೆ. ಸಿಮೆಂಟ್ ಸ್ಲಾೃಬ್‌ಗಳು ಬೀಳಲು ಸಿದ್ಧವಾದಂತಿದ್ದು, ತಂಗುದಾಣದೊಳಗೆ ಪ್ರಯಾಣಿಕರು ನಿಲ್ಲುವುದು ತೀರಾ ಅಪಾಯಕಾರಿಯಾಗಿದೆ.

ಜಂತ್ರ, ಪುನಾರು, ಹಲಸಿನಕಟ್ಟೆ ಪ್ರದೇಶಗಳಿಗೆ ಇದುವೆ ಪ್ರಮುಖ ಬಸ್ ತಂಗುದಾಣವಾಗಿದ್ದು, ಅನಿವಾರ್ಯವಾಗಿ ಪ್ರಯಾಣಿಕರು ತಂಗುದಾಣದೊಳಗೇ ನಿಲ್ಲುತ್ತಿದ್ದಾರೆ.

ಗ್ರಾಮಸ್ಥರಿಂದ ಎಚ್ಚರಿಕೆ: ಸಂಬಂಧಿತ ಅಧಿಕಾರಿಗಳು, ಜನಪ್ರತಿನಿಧಿಗಳು ಇದೇ ಮಾರ್ಗವಾಗಿ ನಿತ್ಯವೂ ಸಂಚರಿಸುತ್ತಿದ್ದು, ಬಸ್ ತಂಗುದಾಣದ ದುಸ್ಥಿತಿ ಕುರಿತು ಅರಿವಿದ್ದರೂ ಪರಿಶೀಲಿಸಲು ಮುಂದಾಗುತ್ತಿಲ್ಲ. ಶೀಘ್ರವೇ ಜಂತ್ರ ಪ್ರದೇಶದಲ್ಲಿ ಹೊಸ ಬಸ್ ತಂಗುದಾಣ ನಿರ್ಮಿಸಿಕೊಡಬೇಕಿದ್ದು, ಈ ಕುರಿತು ಲೋಕೋಪಯೋಗಿ ಇಲಾಖೆ ಹಾಗೂ ಸ್ಥಳೀಯಾಡಳಿತ ಗಮನ ಹರಿಸಬೇಕು. ಪ್ರಸ್ತುತ ಇರುವ ಶಿಥಿಲ ತಂಗುದಾಣದಿಂದ ಅನಾಹುತಗಳಾದರೆ ಅಧಿಕಾರಿಗಳು ಹಾಗೂ ಸ್ಥಳೀಯಾಡಳಿತವೇ ಹೊಣೆಯಾಗುತ್ತಾರೆ ಎಂದು ಗ್ರಾಮಸ್ಥರು ಎಚ್ಚರಿಸಿದ್ದಾರೆ.