ಜನವರಿ 30ರಿಂದ ಉಚಿತ ಬೃಹತ್ ಯೋಗ ಚಿಕಿತ್ಸೆ, ಧ್ಯಾನ ಶಿಬಿರ; ದಿಗ್ವಿಜಯದಲ್ಲಿ ಯೋಗ ಶಿಬಿರ ನೇರ ಪ್ರಸಾರ

ಹುಬ್ಬಳ್ಳಿ: ಖ್ಯಾತ ಯೋಗ ಗುರು ಬಾಬಾ ರಾಮದೇವ್ ನೇತೃತ್ವದಲ್ಲಿ ಇಲ್ಲಿನ ರೈಲ್ವೆ ಮೈದಾನದಲ್ಲಿ ಜ. 30ರಿಂದ ಫೆ. 3ರವರೆಗೆ ನಡೆಯಲಿರುವ ಉಚಿತ ಬೃಹತ್ ಯೋಗ ಚಿಕಿತ್ಸೆ ಮತ್ತು ಧ್ಯಾನ ಶಿಬಿರ, ವಿಆರ್​ಎಲ್ ಮೀಡಿಯಾದ ದಿಗ್ವಿಜಯ 24x7 ಸುದ್ದಿವಾಹಿನಿಯಲ್ಲಿ ನೇರ ಪ್ರಸಾರವಾಗಲಿದೆ.

ಹುಬ್ಬಳ್ಳಿಯ ರೈಲ್ವೆ ಸ್ಪೋರ್ಟ್ಸ್ ಗ್ರೌಂಡ್​ನಲ್ಲಿ ಶಿಬಿರಕ್ಕಾಗಿ ಕೊನೆಯ ಹಂತದ ಸಿದ್ಧತೆಗಳು ನಡೆದಿವೆ. ಹರಿಯಾಣದಿಂದ ಲಾರಿಯಲ್ಲಿ ವೇದಿಕೆ ನಿರ್ವಣದ ಸಾಮಗ್ರಿಗಳು ಆಗಮಿಸಿದ್ದು, ಅಂತಿಮ ಸಿದ್ಧತೆಗಳು ಭರದಿಂದ ಸಾಗಿದೆ.

15 ಸಾವಿರ ಯೋಗಾಸಕ್ತರು ಭಾಗವಹಿಸುವ ನಿರೀಕ್ಷೆ ಇದ್ದು, ಸಂಚಾರ ದಟ್ಟಣೆ ನಿಯಂತ್ರಣಕ್ಕೆ ಎಲ್ಲ ರೀತಿಯ ಸಿದ್ಧತೆ ಮಾಡಿಕೊಳ್ಳಲಾಗಿದೆ ಎಂದು ಆಯೋಜಕರು ತಿಳಿಸಿದ್ದಾರೆ. 10 ವರ್ಷಗಳ ಹಿಂದೆ ಹುಬ್ಬಳ್ಳಿಯಲ್ಲಿ ವಿಆರ್​ಎಲ್ ಸಂಸ್ಥೆವತಿಯಿಂದ ರಾಜ್ಯದಲ್ಲೇ ಪ್ರಥಮ ಬಾರಿಗೆ ಬಾಬಾ ರಾಮದೇವ್ ಅವರ ಯೋಗಶಿಬಿರ ಏರ್ಪಾಟಾಗಿತ್ತು. ಅಂದಿನ ಶಿಬಿರ ಈ ಭಾಗದಲ್ಲಿ ಯೋಗ ಕ್ರಾಂತಿಯನ್ನುಂಟು ಮಾಡಿತ್ತು. ಮತ್ತೊಮ್ಮೆ ಅಂಥ ಸದಾವಕಾಶ ಯೋಗಾಸಕ್ತರಿಗೆ ಲಭಿಸಿದೆ.

ಬೇಸಿಕ್ ಯೋಗ, ಉನ್ನತ ಯೋಗ ತರಬೇತಿ, ಆಯುರ್ವೆದ, ಮನೆ ಮದ್ದು, ಔಷಧಗಳು, ಆಹಾರ ಪದ್ಧತಿ, ಅಕ್ಯುಪ್ರೆಷರ್, ಬೊಜ್ಜು ನಿವಾರಣೆ, ಸಹಜ ಸಮಾಧಿ ಸ್ಥಿತಿ, ಕುಂಡಲಿನಿ ಜಾಗರಣ, ಅಷ್ಟಾಂಗ ಯೋಗ, ಕ್ರಿಯಾ ಯೋಗವನ್ನು ಬಾಬಾ ರಾಮದೇವ್ ತಿಳಿಸಿಕೊಡಲಿದ್ದಾರೆ. 300 ವಿಜ್ಞಾನಿಗಳು ಯೋಗದ ಮೇಲೆ ಮಾಡಿದ ಸಂಶೋಧನೆ ಆಧರಿಸಿದ ವಿಷಯ ಈ ಸಲದ ಶಿಬಿರದ ವಿಶೇಷವಾಗಿದೆ. ವಿದೇಶಿ ಹಾಗೂ ಸ್ವದೇಶಿ ಯೋಗ ಶಿಕ್ಷಕರು, ಯೋಗಾಸಕ್ತರು ಭಾಗವಹಿಸಲಿದ್ದಾರೆ. ಈಗಾಗಲೇ ಬಹಳಷ್ಟು ಜನರು ಹುಬ್ಬಳ್ಳಿಯತ್ತ ದೃಷ್ಟಿ ನೆಟ್ಟಿದ್ದಾರೆ.

ಬಾಬಾ ರಾಮದೇವ್ ಮಾರ್ಗದರ್ಶನ

ವಿಆರ್​ಎಲ್ ಸಹಭಾಗಿತ್ವ

ವಿಆರ್​ಎಲ್ ಲಾಜಿಸ್ಟಿಕ್ಸ್ ಲಿಮಿಟೆಡ್, ರಾಜ್ಯದ ನಂ.1 ದಿನಪತ್ರಿಕೆ ‘ವಿಜಯವಾಣಿ’, ‘ದಿಗ್ವಿಜಯ 247 ನ್ಯೂಸ್ ಚಾನೆಲ್’, ‘ಪವರ್ ನ್ಯೂಸ್ ಆ್ಯಪ್’ ಸಹಭಾಗಿತ್ವ ವಹಿಸಿವೆ.