ನಿವೃತ್ತ ಯೋಧನಿಗೆ ಅದ್ದೂರಿ ಸ್ವಾಗತ, ಡಿ.31ಕ್ಕೆ ನಿವೃತ್ತನಾದ ಮಾರಪ್ಪನಪಾಳ್ಯದ ವೆಂಕಟೇಶ್

ನೆಲಮಂಗಲ: ದೇಶದ ಗಡಿ ಭದ್ರತಾ ಪಡೆಯಲ್ಲಿ ಸೇವೆ ಸಲ್ಲಿಸಿ ನಿವೃತ್ತಿಯಾದ ಬಳಿಕ ಸ್ವಗ್ರಾಮಕ್ಕೆ ಬಂದ ಮಾಜಿ ಸೈನಿಕ ಎಂ.ಎ.ವೆಂಕಟೇಶ್ ಅವರನ್ನು ಗ್ರಾಮದ ಜನ ಸಂಭ್ರಮದಿಂದ ಸೋಮವಾರ ಬರಮಾಡಿಕೊಂಡರು.

ಬೆಂಗಳೂರು ಉತ್ತರ ತಾಲೂಕು ಮಾರಪ್ಪನಪಾಳ್ಯದ ನಿವಾಸಿ ಆಣಪ್ಪ, ಪುಟ್ಟಚೌಡಮ್ಮ ದಂಪತಿ 6ನೇ ಮಗ ಎಂ.ಎ.ವೆಂಕಟೇಶ್ ಡಿ.31ರಂದು ನಿವೃತ್ತಿಯಾಗಿದ್ದರು. ನಿವೃತ್ತಿ ನಂತರ ಹುಟ್ಟೂರಿಗೆ ಆಗಮಿಸಿದ್ದು, ಗ್ರಾಮಸ್ಥರು, ಮಾಜಿ ಸೈನಿಕನ ಜತೆ ವಿದ್ಯಾಭ್ಯಾಸ ಮಾಡಿದ್ದ ಅಕ್ಕಪಕ್ಕ ಗ್ರಾಮದಲ್ಲಿನ ಸ್ನೇಹಿತರು, ಕುಟುಂಬ ವರ್ಗದವರು ಅದ್ದೂರಿಯಾಗಿ ಸ್ವಾಗತಿಸಿದಲ್ಲದೇ ಗ್ರಾಮದ ಸರ್ಕಾರಿ ಶಾಲಾ ಆವರಣದಲ್ಲಿ ಏರ್ಪಡಿಸಿದ್ದ ಕಾರ್ಯಕ್ರಮದಲ್ಲಿ ಗೌರವಿಸಿದರು.

ಬೈಕ್ ರ‌್ಯಾಲಿ, ಪೂರ್ಣಕುಂಭ ಸ್ವಾಗತ: ಮಾಜಿ ಯೋಧ ಗ್ರಾಮಕ್ಕೆ ಆಗಮಿಸುತ್ತಿರುವ ವಿಚಾರ ತಿಳಿದ ಗ್ರಾಮದ ಯುವಕರು ಗ್ರಾಮದ ಮುಖ್ಯರಸ್ತೆಯಲ್ಲಿ ಕಾದುಕುಳಿತು ಬೈಕ್ ರ‌್ಯಾಲಿ ಮೂಲಕ ಮೆರವಣಿಗೆ ನಡೆಸಿ ಮನೆಗೆ ಕರೆದೊಯ್ದರೇ, ಗ್ರಾಮದ ಮಹಿಳೆಯರು ಪೂರ್ಣಕುಂಭ ಸ್ವಾಗತ ಕೋರಿದರು. ದಾಸನಪುರ ಗ್ರಾಪಂ ಉಪಾಧ್ಯಕ್ಷೆ ನಾಗವೇಣಿ, ಸದಸ್ಯರಾದ ಪ್ರದೀಪ್, ದೇವರಾಜು, ಗ್ರಾಮದ ಮುಖಂಡರಾದ ಸತೀಶ್, ಜೆ.ಪ್ರದೀಪ್, ಗೋವಿಂದ್‌ರಾಜ್, ಕುಮಾರ್, ಈರಪ್ಪ, ಬ್ಲೂ ಮೂನ್ ಪಬ್ಲಿಕ್ ಶಾಲೆ ಕಾರ್ಯದರ್ಶಿ ಚಂದ್ರಶೇಖರ್ ಇತರರಿದ್ದರು.