ಯಲ್ಲಾಪುರ: ಪಟ್ಟಣದ ಬೆಲ್ ರಸ್ತೆಯ ಡಾಂಬರೀಕರಣ ಕಾಮಗಾರಿ ನಡೆದು 4 ತಿಂಗಳು ಕಳೆಯುವ ಮುನ್ನವೇ ಕಡಿ ಕಿತ್ತು ಹೋಗಿದೆ. ಇದು ಕಾಮಗಾರಿಯ ನಿಜ ಬಣ್ಣವನ್ನು ಬಯಲು ಮಾಡಿದೆ. ರಸ್ತೆಯ ಮೇಲ್ಪದರು ಕಿತ್ತು ಹೋಗಿದೆ. ನಿಧಾನವಾಗಿ ಚಲಿಸಿ ಎಂದು ಲೋಕೋಪಯೋಗಿ ಇಲಾಖೆ ಫಲಕ ಅಳವಡಿಸುವ ಮೂಲಕ ಕಾಮಗಾರಿಯ ಕಳಪೆತನವನ್ನು ಪ್ರಮಾಣೀಕರಿಸಿದೆ.
ಅಂಬೇಡ್ಕರ್ ಸರ್ಕಲ್ನಿಂದ ಸಬಗೇರಿವರೆಗಿನ ಬೆಲ್ ರಸ್ತೆಗೆ ಫೆಬ್ರವರಿಯಲ್ಲಿ ಮರು ಡಾಂಬರೀಕರಣ ಕಾಮಗಾರಿ ಮಾಡಲಾಗಿತ್ತು. ಫೆಬ್ರವರಿಯಲ್ಲಿ ನಡೆದ ಗ್ರಾಮದೇವಿ ಜಾತ್ರಾ ಮಹೋತ್ಸವದ ಸಂದರ್ಭದಲ್ಲಿ ತರಾತುರಿಯಲ್ಲಿ ಕಾಮಗಾರಿ ನಡೆಸಲಾಗಿತ್ತು. ಶಾಸಕರ ಸೂಚನೆ ಮೇರೆಗೆ ಗುತ್ತಿಗೆದಾರರೊಬ್ಬರು ಈ ಕಾಮಗಾರಿ ಕೈಗೊಂಡಿದ್ದರು.
ಮೊದಲ ಮಳೆಗೇ ರಸ್ತೆಯ ಕಡಿ ಕಿತ್ತು ಹೋಗಿದೆ. ದ್ವಿಚಕ್ರ ವಾಹನ ಸವಾರರು ಸ್ಕಿಡ್ ಆಗಿ ಬೀಳುವ ಸ್ಥಿತಿ ನಿರ್ಮಾಣವಾಗಿದೆ. ಈಗಾಗಲೇ ಬೈಕ್ ಸವಾರರು ಬಿದ್ದು ಗಾಯಗೊಂಡ ಘಟನೆಗಳು ನಡೆದಿವೆ. ಜಾತ್ರೆಗಾಗಿ ಮಾಡಿದ ರಸ್ತೆ ಕಾಮಗಾರಿ ಜಾತ್ರೆ ಮುಗಿದು 4 ತಿಂಗಳವರೆಗೆ ಬಾಳಿಕೆ ಬಂದದ್ದೇ ಹೆಚ್ಚು ಎಂದು ಜನತೆ ವ್ಯಂಗ್ಯವಾಡುವಂತಾಗಿದೆ.
ರಸ್ತೆ ಕಾಮಗಾರಿ ಕಳಪೆಯಾಗಿದೆ ಎಂದು ಜನರು ಆಡಿಕೊಳ್ಳುವ ಮುನ್ನವೇ ರಸ್ತೆ ಉಸ್ತುವಾರಿಯಾಗಿರುವ ಲೋಕೋಪಯೋಗಿ ಇಲಾಖೆ ಜಾಣ್ಮೆ ತೋರಿದೆ. ‘ರಸ್ತೆಯ ಮೇಲ್ಪದರು ಕಿತ್ತು ಹೋಗಿದೆ. ನಿಧಾನವಾಗಿ ಚಲಿಸಿ’ ಎಂದು ಫಲಕ ಅಳವಡಿಸಿದೆ. ಸಬಗೇರಿ ಬಳಿ ಹಾಗೂ ಬಸ್ ನಿಲ್ದಾಣದ ಬಳಿ ಫಲಕ ಅಳವಡಿಸಲಾಗಿದೆ.
ಮಳೆಗಾಲ ಕಳೆಯುವವರೆಗೂ ಕಿತ್ತು ಹೋದ ಈ ರಸ್ತೆಯಲ್ಲೇ ಸವಾರರು ಬೀಳುತ್ತ, ಏಳುತ್ತ ಸಾಗುವುದು ಅನಿವಾರ್ಯವಾಗಿದೆ. ಮಳೆಗಾಲದ ನಂತರ ಮತ್ತೊಂದು ಕೋಟಿಂಗ್ ಡಾಂಬರು ಹಾಕಿ ಸಮಸ್ಯೆ ಪರಿಹರಿಸಬೇಕೆಂಬುದು ಜನತೆಯ ಆಗ್ರಹವಾಗಿದೆ.
