ಕಾಲುವೆ ಹೂಳು ಜಮೀನಿಗೆ

ಯಳಂದೂರು: ತಾಲೂಕಿನ ಮದ್ದೂರು ಗ್ರಾಮದಲ್ಲಿ ಸಣ್ಣ ನೀರಾವರಿ ಇಲಾಖೆಯ ವತಿಯಿಂದ ಕಾಲುವೆಯಲ್ಲಿ ಹೂಳು ತೆಗೆದು ಈ ತ್ಯಾಜ್ಯವನ್ನು ರೈತರು ವ್ಯವಸಾಯ ಮಾಡುತ್ತಿರುವ ಜಮೀನಿಗೆ ಸುರಿದಿರುವುದರಿಂದ ತೊಂದರೆ ಎದುರಾಗಿದೆ.

ಮದ್ದೂರು ಗ್ರಾಮದ ಕೆಲ ಜಮೀನುಗಳ ಬಳಿ ಹಾದು ಹೋಗಿರುವ ಕಬಿನಿ ಕಾಲುವೆಯನ್ನು ಈಚೆಗೆ ನೀರಾವರಿ ಇಲಾಖೆಯ ವತಿಯಿಂದ ಜೆಸಿಬಿಯಲ್ಲಿ ಹೂಳು ಎತ್ತಲಾಗಿದೆ. ಇಲ್ಲಿದ್ದ ಮುಳ್ಳಿನ ಗಿಡಗಳು, ಬಳ್ಳಿಗಳು ಹಾಗೂ ಪೊದೆ ಸಸ್ಯಗಳನ್ನು ಕಿತ್ತು ಪಕ್ಕದಲ್ಲಿ ಇರುವ ರೈತರ ಜಮೀನಿಗೆ ಹಾಕಲಾಗಿದೆ. ಭತ್ತವನ್ನು ಬಿತ್ತಲು ರೈತರು ಈಗಾಗಲೇ ಜಮೀನನ್ನು ಹಸನುಗೊಳಿಸುತ್ತಿದ್ದಾರೆ. ತಮ್ಮ ಜಮೀನಿಗೆ ನೀರನ್ನು ಕಟ್ಟಿದ್ದಾರೆ. ಕೆಲವೆಡೆ ಭತ್ತವನ್ನು ಪೈರು ಮಾಡಲು ಬಿತ್ತನೆ ಮಾಡಲಾಗಿದೆ. ಈಗ ಜಮೀನಿಗೆ ತ್ಯಾಜ್ಯವನ್ನು ಸುರಿದಿರುವುದರಿಂದ ವ್ಯವಸಾಯ ಮಾಡಲು ತೊಂದರೆಯಾಗುತ್ತಿದೆ.