ಶಾಲಾ ಪ್ರವೇಶ ಪರೀಕ್ಷೆ ಪಾರದರ್ಶಕವಿರಲಿ

ಯಲಬುರ್ಗಾ: ಆರನೇ ತರಗತಿ ಮಕ್ಕಳ ಆದರ್ಶ ಮತ್ತು ಇತರ ಶಾಲಾ ಪ್ರವೇಶ ಪರೀಕ್ಷೆ ಪಾರದರ್ಶಕ ನಡೆಸುವಂತೆ ಒತ್ತಾಯಿಸಿ ಕರವೇ (ಶಿವರಾಮೇಶ್ವರ ಬಣ)ತಾಲೂಕು ಘಟಕದಿಂದ ಪಟ್ಟಣದ ಬಿಇಒ ಕಚೇರಿಯ ವ್ಯವಸ್ಥಾಪಕ ವೆಂಕಟೇಶ ಕುಲಕರ್ಣಿಗೆ ಗುರುವಾರ ಮನವಿ ಸಲ್ಲಿಸಲಾಯಿತು.

ಘಟಕದ ತಾಲೂಕು ಅಧ್ಯಕ್ಷ ಶಿವಕುಮಾರ ನಾಗನಗೌಡ್ರ ಮಾತನಾಡಿ, ಈಗಾಗಲೇ 6ನೇ ತರಗತಿ ಪ್ರವೇಶಾತಿಗಾಗಿ ಮುರಾರ್ಜಿ ದೇಸಾಯಿ ವಸತಿ ಶಾಲೆಗೆ ಪರೀಕ್ಷೆಗಳು ಪಾರದರ್ಶಕವಾಗಿ ನಡೆದಿಲ್ಲ. ಪರೀಕ್ಷೆಯಲ್ಲಿ ಕೆಲ ಮಕ್ಕಳಿಗೆ ಹೇಳಿ ಕೊಡುವುದು, ಪರೀಕ್ಷೆ ಬಳಿಕ ಓಎಂಆರ್ ತುಂಬುವುದರ ಬಗ್ಗೆ ಪರೀಕ್ಷೆ ಬರೆದು ಬಂದ ಮಕ್ಕಳು ಆರೋಪಿಸಿದ್ದಾರೆ. ಇಂತಹ ಅಕ್ರಮ ಚಟುವಟಿಕೆಗಳು ನಡೆಯದಂತೆ ತಡೆಯಲು ಸಂಬಂಧಿಸಿದ ಅಧಿಕಾರಿಗಳು ನಿಗಾ ವಹಿಸಬೇಕು. ಮಾ.26ರಂದು ನಡೆಯುವ ಆದರ್ಶ ವಿದ್ಯಾಲಯ ಪ್ರವೇಶ ಪರೀಕ್ಷೆಗಳು ನಡೆಯಲಿವೆ. ತಾವು ಗಮನಹರಿಸಿ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ನ್ಯಾಯ ಒದಗಿಸಬೇಕು. ನಿಷ್ಕಾಳಜಿ ವಹಿಸಿದರೆ ಆಡಳಿತ ಮಂಡಳಿ ವಿರುದ್ಧ ಉಗ್ರ ಹೋರಾಟ ನಡೆಸಬೇಕಾಗುತ್ತೆ ಎಂದು ಎಚ್ಚರಿದರು.

ಘಟಕದ ತಾಲೂಕು ಉಪಾಧ್ಯಕ್ಷ ರಾಮನಗೌಡ ಪೊ.ಪಾಟೀಲ್, ವಿದ್ಯಾರ್ಥಿ ಘಟಕದ ಜಿಲ್ಲಾಧ್ಯಕ್ಷ ಭೀಮೇಶ ಬಂಡಿವಡ್ಡರ್, ಪದಾಧಿಕಾರಿಗಳಾದ ರವಿಕಾಂತ ಪಾಟೀಲ್, ಘನವಂತೇಶ ಚನ್ನದಾಸರ, ಆನಂದ ಅಂಗಡಿ, ಹನುಮೇಶ ಗೌಡ್ರ, ಲಿಂಗರಾಜ ದೇಸಾಯಿ ಇತರರಿದ್ದರು.