ಮಧ್ಯಾಹ್ನದಿಂದ ಚುರುಗೊಂಡ ಮತದಾನ

ಕೆಂಭಾವಿ: ಈಶಾನ್ಯ ಶಿಕ್ಷಕರ ಕ್ಷೇತ್ರದಿಂದ ವಿಧಾನ ಪರಿಷತ್​ಗೆ ಶುಕ್ರವಾರ ನಡೆದ ಚುನಾವಣೆಯಲ್ಲಿ ಕೆಂಭಾವಿ ಪಟ್ಟಣದ ಮತದಾನ ಕೇಂದ್ರದಲ್ಲಿ ಶಾಂತಿಯುವಾಗಿ ಮತದಾನ ನಡೆಯಿತು. ಪಟ್ಟಣದ ಸರ್ಕಾರಿ ಪದವಿಪೂರ್ವ ಕಾಲೇಜಿನ ಮತದಾನ ಕೇಂದ್ರದಲ್ಲಿ ಬೆಳಗ್ಗೆ 8ರಿಂದ ಆರಂಭವಾದ ಮತದಾನ 11ರ ವರೆಗೆ ಮಂದಗತಿಯಿಂದ ಸಾಗಿತು. 11&30ರ ನಂತರ ವೇಗ ಪಡೆದ ಮತದಾನ ಪ್ರಕ್ರಿಯೆ ಶಿಕ್ಷಕರು ಹಂತ ಹಂತವಾಗಿ ಆಗಮಿಸಿ ತಮ್ಮ ಮತದಾನ ಹಕ್ಕು ಚಲಾಯಿಸಿದರು. ಒಟ್ಟು 111 ಶಿಕ್ಷಕ ಮತದಾರರಲ್ಲಿ 103 ಜನ ಶಿಕ್ಷಕ ಮತದಾರರು ಮತದಾನ ಮಾಡಿದರು. ಶೇ. 92.79ರಷ್ಟು ಮತದಾನವಾಯಿತು. ಮುನ್ನೆಚ್ಚಿರಿಕೆಯಾಗಿ ಪಿಎಸ್​ಐ ಸುವರ್ಣ ಮಲಶೆಟ್ಟಿ ಅವರ ನೇತೃತ್ವದಲ್ಲಿ ಬಿಗಿ ಪೊಲೀಸ್​ ಬಂದೋಬಸ್ತ್​ ವ್ಯವಸ್ಥೆ ಕಲ್ಪಿಸಲಾಗಿತ್ತು.ಎರಡೂ ಪಕ್ಷದಿಂದ ಟೆಂಟ್​ ಮನೆ&ಮತದಾನ ಕೇಂದ್ರದಲ್ಲಿ ಮತದಾನ ನಡೆಯುತ್ತಿದ್ದರೆ ಇತ್ತ ಹೊರಗೆ (ಮತದಾನ ಕೇಂದ್ರದ ಸರಹದ್ದು ದಾಟಿ) ಎರಡು ಪ್ರಮುಖ ಪಕ್ಷಗಳಾದ ಕಾಂಗ್ರೇಸ್​ ಮತ್ತು ಬಿಜೆಪಿ ಪಕ್ಷ ಎರಡು ಕಡೆ ಬೃಹತ್​ ಟೆಂಟ್​ ಹಾಕಿ ಮತದಾನ ಮಾಡುವ ಶಿಕ್ಷಕರ ಪಟ್ಟಿ ಸೇರಿದಂತೆ ಇನ್ನಿತರೆ ರಾಜಕೀಯ ಚಟುವಟಿಕೆಯಲ್ಲಿ ಪಕ್ಷದ ಪ್ರಮುಖರು ತೊಡಗಿದ್ದರು. ಕಾಂಗ್ರೇಸ್​ ಟೆಂಟ್​ ಮನೆಯಲ್ಲಿ ಬ್ಲಾಕ್​ ಕಾಂಗ್ರೇಸ್​ ಅಧ್ಯಕ್ಷ ಬಸನಗೌಡ ಹೊಸಮನಿ ಯಾಳಗಿ, ಡಿಸಿಸಿ ಬ್ಯಾಂಕ್​ ನಿರ್ದೇಶಕ ಬಸವರಾಜ ಚಿಂಚೋಳಿ, ಪಕ್ಷದ ಜಿಲ್ಲಾ ಉಪಾಧ್ಯಕ್ಷ ಮಹಿಪಾಲರೆಡ್ಡಿ ಡಿಗ್ಗಾವಿ, ರಂಗಪ್ಪ ವಡ್ಡರ್​ ಇದ್ದರು. ಬಿಜೆಪಿ ಟೆಂಟ್​ ಮನೆಯಲ್ಲಿ ಸುರಪುರ ಹಾಗೂ ಶಹಾಪೂರ ನಗರಗಳಿಂದ ಆಗಮಿಸಿದ ಪಕ್ಷದ ಪ್ರಮುಖರ ಜೊತೆ ಸ್ಥಳಿಯವಾಗಿ ಪುರಸಭೆ ಸದಸ್ಯ ಶರಣಪ್ಪ ಅಂಗಡಿ, ಉಮೇಶರೆಡ್ಡಿ, ಮಂಜು ತುಂಬಗಿ, ಚಂದ್ರು ಯಾಳಗಿ, ಭೀಮನಗೌಡ ಮುದನೂರ, ಹಳ್ಳೆಪ್ಪ ಕವಾಲ್ದಾರ ಇತರರಿದ್ದರು