ಬೆಳಗಾವಿ: ಹೆಸರಿಗೆ ಮಾತ್ರ ಸ್ಮಾರ್ಟ್ಸಿಟಿ ಎಂಬಂತಾಗಿರುವ ಬೆಳಗಾವಿ ನಗರದ ಕೆಲ ರಸ್ತೆಗಳಲ್ಲಿ ಗುಂಡಿ ತಪ್ಪಿಸಿ ದಾಟುವಷ್ಟರಲ್ಲಿ ಎಂಟೆದೆಯ ಸವಾರರು ಕೂಡ ಏದುಸಿರು ಬಿಡುತ್ತಿದ್ದು, ಹರಿದು ಹಂಚಿಹೋದಂತೆ ಭಾಸವಾಗುವ ರೋಡ್ ರಿಪೇರಿ ಮಾಡದಿರುವುದಕ್ಕೆ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದೆ.
ಮಹಾನಗರದಲ್ಲಿ ರಸ್ತೆಗಳು ಸಂಪೂರ್ಣ ಹಾಳಾಗಿವೆ. ವಾಹನ ಸವಾರರು ಮಾತ್ರವಲ್ಲ, ಪಾದಚಾರಿಗಳೂ ಸರ್ಕಸ್ ಮಾಡುತ್ತಲೇ ರಸ್ತೆಯಲ್ಲಿ ಸಂಚರಿಸಬೇಕಿದೆ. ಇಲ್ಲಿನ ಗಾಂಧಿ ನಗರಕ್ಕೆ ಹೊಂದಿಕೊಂಡಿರುವ ಪುಣೆ-ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿ ಸರ್ವಿಸ್ ರಸ್ತೆಯಲ್ಲಿ ಹೆಜ್ಜೆಗೊಂದರಂತೆ ಹೊಂಡಗಳು ನಿರ್ಮಾಣವಾಗಿವೆ. ಅಲ್ಲದೆ, ನೆಹರು ನಗರ, ಶಹಾಪುರ, ಎಪಿಎಂಸಿ ಯಾರ್ಡ್ ಸೇರಿ ಕೆಲ ಭಾಗದ ರಸ್ತೆಗಳಲ್ಲಿ ಬೃಹತ್ ಹೊಂಡ ಬಿದ್ದಿವೆ. ಹಲವು ಕಡೆಗಳಲ್ಲಿ ವಾಹನದಲ್ಲಿ ಓಡಾಡಲು ಸಾಧ್ಯವಾಗದ ಸ್ಥಿತಿಯಿದೆ. ರಾತ್ರಿ ಸಮಯದಲ್ಲಿ ಸಂಚರಿಸಲು ಸವಾರರು ಹರಸಾಹಸ ಪಡಬೇಕಾಗಿದೆ.
