2025 ಕೋಟಿ ರೂ.ಕಾಮಗಾರಿ ಸುಳ್ಳಿನ ಕಂತೆ

ಬೀದರ್: ಮುಖ್ಯಮಂತ್ರಿ ಸಿದ್ಧರಾಮಯ್ಯ ಅವರು ಏ‌.16ರಂದು( ಬುಧವಾರ) ಬೀದರ್  ಜಿಲ್ಲೆಗೆ ಆಗಮಿಸಿ ಸುಮಾರು 2025 ಕೋಟಿ ರೂ.ಗಳ ವಿವಿಧ‌‌ ಅಭಿವೃದ್ಧಿ ಕಾಮಗಾರಿಗಳ ಚಾಲನೆ ಹಾಗೂ ಉದ್ಘಾಟನೆ ಮಾಡಲಿದ್ದಾರೆ ಎಂಬುದೆಲ್ಲ ಬರೀ ಸುಳ್ಳಿನ ಕಂತೆಯಾಗಿದೆ. ಇದು ಜಿಲ್ಲೆಯ ಜನರಿಗೆ ಕಾಂಗ್ರೆಸ್ ಸರ್ಕಾರ ಮಾಡುತ್ತಿರುವ ಮಹಾಮೋಸವಾಗಿದೆ. ಹೀಗಾಗಿ ಮುಖ್ಯಮಂತ್ರಿಗಳ ಕಾರ್ಯಕ್ರಮಕ್ಕೆ ಬಹಿಷ್ಕಾರ ಹಾಕಲು ಬಿಜೆಪಿ ನಿರ್ಧರಿಸಿದೆ.

ಮುಖ್ಯಮಂತ್ರಿ ಸಿದ್ಧರಾಮಯ್ಯ ಅವರು ಏ.16ರಂದು 2025 ಕೋಟಿ ರೂ. ಕಾಮಗಾರಿಗಳ ಉದ್ಘಾಟನೆ ಹಾಗೂ ಶಂಕುಸ್ಥಾಪನೆ ಮಾಡುತ್ತಿದ್ದಾರೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಈಶ್ವರ ಖಂಡ್ರೆ ಅವರು ನೀಡಿದ ಹೇಳಿಕೆ ನೋಡಿ ಅಚ್ಚರಿಯಾಗಿದೆ. ಇಲ್ಲಿ ವಿವಿಧ ಕಾಮಗಾರಿಗಳ ಕೇಂದ್ರ ಸರ್ಕಾರದ್ದು ಎಷ್ಟು ಪಾಲು, ರಾಜ್ಯ ಸರ್ಕಾರದ್ದು ಎಷ್ಟು ಪಾಲು ಎನ್ನುವದರ  ಕುರಿತು ಸ್ಪಷ್ಟ ಮಾಹಿತಿ ಇಲ್ಲ. ಇನ್ನು ಅನೇಕ ಹಿಂದಿನ ಕಾಮಗಾರಿ, ಯೋಜನೆಗಳು ಮತ್ತೆ ಪ್ರಸ್ತಾಪಿಸಲಾಗಿದೆ. ಖುದ್ದು ಈ ಹಿಂದೆ ಸಿದ್ಧರಾಮಯ್ಯ ಅವರೇ

ಶಂಕುಸ್ಥಾಪನೆ ಮಾಡಿದ ಕಾಮಗಾರಿಯನ್ನು ಮತ್ತೊಮ್ಮೆ ಈಗ ಶಂಕುಸ್ಥಾಪನೆ ಮಾಡಲಾಗುತ್ತಿರುವುದು ಹಾಸ್ಯಾಸ್ಪದ ಎನಿಸಿದೆ.

ಆರ್ಥಿಕವಾಗಿ ದಿವಾಳಿಯಾಗಿರುವ ರಾಜ್ಯ ಸರ್ಕಾರ ಅಗ್ಗದ ಪ್ರಚಾರಕ್ಕಾಗಿ ಹೀಗೆ ಸುಳ್ಳಿನ ನೆರವು ಪಡೆಯುತ್ತಿದೆ. ಹೀಗಾಗಿ ಈ ಕಾರ್ಯಕ್ರಮದಿಂದ ದೂರವಿರಲು ನಿರ್ಧರಿಸಿದ್ದಾಗಿ ಬಿಜೆಪಿ ರಾಜ್ಯ ಕಾರ್ಯದರ್ಶಿ, ದಕ್ಷಿಣ ಶಾಸಕರಾದ ಡಾ.ಶೈಲೇಂದ್ರ ಬೆಲ್ದಾಳೆ, ಬಿಜೆಪಿ ಜಿಲ್ಲಾ ಅಧ್ಯಕ್ಷ ಸೋಮನಾಥ ಪಾಟೀಲ್, ಮಾಜಿ ಸಚಿವರಾದ ಔರಾದ್ ಶಾಸಕ ಪ್ರಭು ಚವ್ಹಾಣ್, ಬಸವಕಲ್ಯಾಣ ಶಾಸಕ ಶರಣು ಸಲಗರ್, ಹುಮನಾಬಾದ್ ಶಾಸಕ  ಡಾ.ಸಿದ್ದಲಿಂಗಪ್ಪ ಪಾಟೀಲ್, ವಿಧಾನ ಪರಿಷತ್ ಸದಸ್ಯರಾದ ಶಶೀಲ್ ನಮೋಶಿ, ಮಾರುತಿರಾವ ಮುಳೆ ಜಂಟಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಜಿಲ್ಲಾ ಸರ್ಕಾರಿ ಕಚೇರಿಗಳ ಸಂಕೀರ್ಣಕ್ಕೆ 2017ರ ಆಗಸ್ಟ್ ನಲ್ಲಿ ಆಗ ಮುಖ್ಯಮಂತ್ರಿ ಆಗಿದ್ದ ಸಿದ್ಧರಾಮಯ್ಯ ಅವರೇ ಶಂಕುಸ್ಥಾಪನೆ ಮಾಡಿರುವುದನ್ನು ಜಿಲ್ಲೆಯ ಜನರು ಮರೆತಿಲ್ಲ. ಮುಂಚೆ 100 ಕೋಟಿ ರೂ.ವೆಚ್ಚದ್ದಾಗಿದ್ದ ಇದೇ ಯೋಜನೆಯನ್ನು ಈಗಿನ ಸರ್ಕಾರ ಹಣಕಾಸಿನ ಅಭಾವದ ಕಾರಣದಿಂದ ಕೇವಲ 48 ಕೋಟಿ ರೂ.ಗಳಿಗೆ ಇಳಿಸಿ, ಪ್ರಜಾಸೌಧ ಜಿಲ್ಲಾಡಳಿತ ಕಚೇರಿ ಕಟ್ಟಡ ಎಂದು ಮತ್ತೆ ಶಂಕುಸ್ಥಾಪನೆ ಮಾಡಿಸಲಾಗುತ್ತಿದೆ. ಶಂಕುಸ್ಥಾಪನೆ ಮಾಡಿದ್ದ ಕೆಲಸಕ್ಕೆ ಮತ್ತೆ ಶಂಕುಸ್ಥಾಪನೆ ಮಾಡುವುದು ಹಾಸ್ಯಾಸ್ಪದವಲ್ಲದೆ ಮತ್ತೇನು? ದೊಡ್ಡ ಮೊತ್ತದ ಯೋಜನೆ ಜಿಲ್ಲೆಗೆ ನೀಡಲಾಗುತ್ತಿದೆ ಎಂಬ ಸುಳ್ಳಿನ ಭರದಲ್ಲಿ ಮುಖ್ಯಮಂತ್ರಿಗಳಿಂದಲೇ ಡಬಲ್ ಡಬಲ್ ಶಂಕುಸ್ಥಾಪನೆ ಮಾಡಿಸುತ್ತಿರುವುದು ಅವರಿಗೂ ಮಾಡುತ್ತಿರುವ ಅವಮಾನವಾಗಿದೆ ಎಂದು ಹೇಳಿದ್ದಾರೆ.

ಔರಾದ್ ತಾಲೂಕಿನ ನಾಗೂರ ಹತ್ತಿರ 114 ಕೋಟಿ ರೂ. ವೆಚ್ಚದ ವಿದ್ಯುತ್ ಉಪ‌ ಕೇಂದ್ರದ ಶಂಕುಸ್ಥಾಪನೆ ಆಗಿ ಕೆಲಸ ಪ್ರಗತಿಯಲ್ಲಿದೆ. ಅದು ಸಹ ಸಿಎಂ ಕಾರ್ಯಕ್ರಮದ ಪಟ್ಟಿಯಲ್ಲಿ ಸೇರಿಸಿರುವುದು ವಿಚಿತ್ರವಾಗಿದೆ. ಇನ್ನು 582 ಕೋಟಿ ರೂ. ವೆಚ್ಚದ ಮೆಹಕರ್ ಏತ ನೀರಾವರಿ ಯೋಜನೆ, ಔರಾದ್ ತಾಲ್ಲೂಕಿನ 36 ಕೆರೆ ತುಂಬಿಸುವ ಯೋಜನೆಗೆ ಹಿಂದಿನ ನಮ್ಮ ಬಿಜೆಪಿ ಸರ್ಕಾರವೇ ಆಡಳಿತಾತ್ಮಕ, ಹಣಕಾಸಿನ ಒಪ್ಪಿಗೆ ನೀಡಿದೆ. ಔರಾದ್ ನೀರು ಸರಬರಾಜು ಯೋಜನೆ ಸಹ ಹೊಸದೇನಲ್ಲ.‌ ಹೀಗೆ ಹಳೆಯ ಯೋಜನೆಗಳಿಗೆ ನಮ್ಮದೇ ಎಂದು ಹೇಳಿಕೊಂಡು ಜನರಿಂದ  ಶಹಬ್ಬಾಸಗಿರಿ ಪಡೆಯಲು ಹೊರಟಿರುವುದು ಖಂಡನೀಯ. ಈ‌ ಸರ್ಕಾರದಲ್ಲಿ ದುಡ್ಡಿಲ್ಲ, ಗ್ಯಾರಂಟಿ ಯೋಜನೆಗಳ ಜಾರಿಗಾಗಿಯೇ ಈ ಸರ್ಕಾರ ಹೆಣಗಾಡುತ್ತಿದೆ. ಖಜಾನೆ ಝಳಝಳವಾಗಿದೆ. ನೌಕರರಿಗೆ ಸಮಯಕ್ಕೆ ಸರಿಯಾಗಿ ಪಗಾರ ಸಹ ಕೊಡಲು ಸರ್ಕಾರಕ್ಕೆ ಸಾಧ್ಯವಾಗುತ್ತಿಲ್ಲ. ಹೀಗಿರುವಾಗ. 2025 ಕೋಟಿ ರೂ. ಕಾಮಗಾರಿಗೆ ಚಾಲನೆ, ಶಂಕುಸ್ಥಾಪನೆ ಎಂಬುದು ಸಹ ಬೋಗಸ್ ಎಂಬುದರಲ್ಲಿ ಎರಡು ಮಾತಿಲ್ಲ.‌ ಇದು ರಿಯಲ್ ಅಲ್ಲ, ಕೇವಲ ರೀಲ್ ಬಿಡುವ ಕಾರ್ಯಕ್ರಮ ಎಂದು ಛೇಡಿಸಿದ್ದಾರೆ.

ನಾವು ಅಭಿವೃದ್ಧಿ ವಿರೋಧಿಗಳಲ್ಲ. ಅಭಿವೃದ್ಧಿ ವಿಷಯ ಬಂದಾಗ ನಾವು ಪಕ್ಷಭೇದ ಮರೆತು ಕೆಲಸ ಮಾಡಲು ಸಿದ್ಧರಿದ್ದೇವೆ. ಆದರೆ ಈ ತರಹ ಸುಳ್ಳಿನ ಕಂತೆಗಳ ಪಟ್ಟಿ ಮಾಡಿ ಜಿಲ್ಲೆಯ ಜನರಿಗೆ ಮೋಸ ಮಾಡಲು ಹೊರಟಿರುವುದು ಸಹಿಸಲಾಗದು. ಸರ್ಕಾರಕ್ಕೆ ಗಡಿ ಜಿಲ್ಲೆಯ ಬಗ್ಗೆ ಕಾಳಜಿ ಇದ್ದರೆ 2000 ಕೋಟಿ ರೂ. ವಿಶೇಷ ಪ್ಯಾಕೇಜ್ ಕೊಟ್ಟು ಕೆಲಸ ಮಾಡಿ ತೋರಿಸಲಿ. ಬೋಗಸ್ ಪಟ್ಟಿ ಮಾಡಿ ಅಗ್ಗದ ಪ್ರಚಾರ ಪಡೆಯುತ್ತಿರುವುದು ಖಂಡನೀಯ. ಸತ್ಯಕ್ಕೆ ದೂರವಾದ ವಿಷಯ ಸೇರಿಸಿ, ಅವಾಸ್ತವ ಅಂಕಿ ಅಂಶಗಳನ್ನು ‌ನೀಡಿ ಜನರಿಗೆ ಮೋಸ ಮಾಡುತ್ತಿರುವ ವರ್ತನೆಗೆ ವಿರೋಧಿಸಿ ನಾವು ಮುಖ್ಯಮಂತ್ರಿ ಕಾರ್ಯಕ್ರಮಕ್ಕೆ ಬಹಿಷ್ಕಾರ ಹಾಕುತ್ತಿದ್ದೇವೆ ಎಂದು ತಿಳಿಸಿದ್ದಾರೆ.