ಬೀದರ್: ಶಿಕ್ಷಣ ಮತ್ತು ಸಂಶೋಧನಾ ಕ್ಷೇತ್ರದ ಬೆಳವಣಿಗೆ ನಿಟ್ಟಿನಲ್ಲಿ ತಮಿಳುನಾಡಿನ ತಂಜಾವೂರಿನಲ್ಲಿರುವ ರಾಷ್ಟ್ರೀಯ ಆಹಾರ ತಂತ್ರಜ್ಞಾನ ಉದ್ಯಮಶೀಲತೆ ಮತ್ತು ನಿರ್ವಹಣೆ ಸಂಸ್ಥೆ (ನಿಫ್ಟೆಮ್)ಯೊಂದಿಗೆ ಬೀದರ್ ವಿಶ್ವವಿದ್ಯಾಲಯ ಒಪ್ಪಂದ ಮಾಡಿಕೊಂಡಿದೆ.
ಬರುವ ದಿನಗಳಲ್ಲಿ ಬೀದರ್ ವಿವಿ ಮತ್ತು ನಿಫ್ಟೆಮ್ ಪರಸ್ಪರ ಶೈಕ್ಷಣಿಕ, ಸಂಶೋಧನೆ, ಕೌಶಲ, ಔದ್ಯೋಗಿಕ ಕ್ಷೇತ್ರಗಳಲ್ಲಿ ಸಹಕಾರ, ತಂತ್ರಜ್ಞಾನ ವಿನಿಮಯದ ಒಡಂಬಡಿಕೆ ಪತ್ರಕ್ಕೆ ವಿವಿ ಕುಲಪತಿ ಪ್ರೊ.ಬಿ.ಎಸ್. ಬಿರಾದಾರ ಹಾಗೂ ನಿಫ್ಟೆಮ್ ನಿರ್ದೇಶಕ ಡಾ.ವಿ. ಪಳನಿಮುತ್ತು ಸಹಿ ಹಾಕಿದರು. ಇದರಿಂದ ಬೀದರ್ ವಿವಿ ವ್ಯಾಪ್ತಿಯ ಯುವಕರಿಗೆ ಶಿಕ್ಷಣ ಮತ್ತು ಸಂಶೋಧನಾ ಕ್ಷೇತ್ರದಲ್ಲಿನ ಹೊಸ ಬೆಳವಣಿಗೆಗಳ ಅಧ್ಯಯನ ಜತೆಗೆ ಉದ್ಯೋಗ ಅವಕಾಶಕ್ಕೆ ವರವಾಗಲಿದೆ.
ಈಗಾಗಲೇ ಬೀದರ್ ವಿವಿ ಕಳೆದ ಆಗಸ್ಟ್ ನಲ್ಲಿ ಕೇಂದ್ರೀಯ ಪೆಟ್ರೋಕೆಮಿಕಲ್ಸ್ ಇಂಜಿನಿಯರಿಂಗ್ ಆ್ಯಂಡ್ ಟೆಕ್ನಾಲಜಿ ಸಂಸ್ಥೆ(ಸಿಪೆಟ್) ಜತೆ ಒಪ್ಪಂದ ಮಾಡಿಕೊಂಡಿದೆ. ಇದರಿಂದ ಇಂದು ಅನೇಕ ವಿದ್ಯಾರ್ಥಿಗಳು, ನಿರುದ್ಯೋಗಿಗಳು ವಿವಿ ಆವರಣದಲ್ಲಿರುವ ಪ್ಲಾಸ್ಟಿಕ್ ತಂತ್ರಜ್ಞಾನದ ತರಬೇತಿಯಲ್ಲಿ ನಿರತರಾಗಿದ್ದಾರೆ. ನಿಫ್ಟೆಮ್ ಜತೆಗಿನ ನೂತನ ಒಪ್ಪಂದದಿಂದಾಗಿ ಈ ಭಾಗದ ಯುವಕರು ಆಹಾರ ತಂತ್ರಜ್ಞಾನ, ಕೈಗಾರಿಕೆ, ಆಹಾರ ಸಂಸ್ಕರಣೆ ಕ್ಷೇತ್ರದಲ್ಲಿ ಉನ್ನತ ಜ್ಞಾನ ಸಂಪಾದಿಸಲು ಅನುಕೂಲವಾಗುತ್ತದೆ. ಆಹಾರ ಕ್ಷೇತ್ರದಲ್ಲಿನ ವಿನೂತನ ಸಂಶೋಧನೆಗೆ ಹೊಸ ದಿಕ್ಕು, ಆವಿಷ್ಕಾರ, ಉದ್ಯೋಗ ಸೃಷ್ಟಿಗೂ ಅನುವಾಗಲಿದೆ.
ಬೀದರ್ ವಿವಿ ಆರಂಭವಾದ ಕೆಲವೇ ತಿಂಗಳಲ್ಲಿ ಕೇಂದ್ರ ಸರ್ಕಾರದಡಿ ನಡೆದಿರುವ ಇಂಥ ಮಹತ್ವದ ಸಂಸ್ಥೆಗಳೊಂದಿಗೆ ಒಡಂಬಡಿಕೆ ಮಾಡಿಕೊಂಡಿರುವುದು ಸಂತೋಷದ ಸಂಗತಿ ಮತ್ತು ವಿವಿ ಕ್ರಿಯಾಶೀಲತೆಗೆ ಸಾಕ್ಷಿಯಾಗಿದೆ. ಬರುವ ದಿನಗಳಲ್ಲಿ ಇಂಥ ಅನೇಕ ಸಂಸ್ಥೆಗಳೊಂದಿಗೆ ಒಪ್ಪಂದ ಮಾಡಿಕೊಂಡು ಈ ಭಾಗದ ಪ್ರಗತಿಗಾಗಿ ವಿವಿ ಅವಿರತ ಶ್ರಮಿಸಲಿದೆ ಎಂದು ಕುಲಪತಿ ಪ್ರೊ.ಬಿ.ಎಸ್. ಬಿರಾದಾರ ತಿಳಿಸಿದ್ದಾರೆ.
ಐತಿಹಾಸಿಕ ಒಪ್ಪಂದ ಸಂದರ್ಭದಲ್ಲಿ ವಿವಿಧ ವಿವಿ ಕುಲಪತಿಗಳಾದ ಪ್ರೊ.ಅಶೋಕ ಆಲೂರು ಕೊಡಗು, ಪ್ರೊ.ಗಂಗಾಧರ ಚಾಮರಾಜನಗರ, ಪ್ರೊ.ತಾರಾನಾಥ ಹಾಸನ, ಪ್ರೊ.ಸುರೇಶ ಜಂಗಮಶೆಟ್ಟಿ ಹಾವೇರಿ, ಪ್ರೊ.ರವಿ ಬಿ.ಕೆ. ಕೊಪ್ಪಳ, ಪ್ರೊ.ಆನಂದ ದೇಶಪಾಂಡೆ ಬಾಗಲಕೋಟ ಇದ್ದರು.
