ಬಾಗೇಪಲ್ಲಿಯಿಂದ ಬಂದ ಬೃಹತ್ ಕಲ್ಲಿಗೆ ಪೂಜೆ

ಪಾಂಡವಪುರ : ಪಟ್ಟಣದ ಬೀರಶೆಟ್ಟಹಳ್ಳಿಯ ಆಂಜನೇಯಸ್ವಾಮಿ ದೇವಸ್ಥಾನದ ಮುಂಭಾಗ ಏಕಶಿಲೆಯ ಆಂಜನೇಯಸ್ವಾಮಿ ಮೂರ್ತಿ ಕೆತ್ತಲು ಬಾಗೇಪಲ್ಲಿಯಿಂದ ತರಿಸಲಾಗಿರುವ ಬೃಹತ್ ಕಲ್ಲಿಗೆ ಗ್ರಾಮಸ್ಥರು ಬುಧವಾರ ಪೂಜೆ ಸಲ್ಲಿಸುವ ಮೂಲಕ ಬರಮಾಡಿಕೊಂಡರು.

ಗ್ರಾಮದ ಆರಾಧ್ಯ ದೈವವಾಗಿರುವ ಆಂಜನೇಸ್ವಾಮಿ ದೇವಸ್ಥಾನದ ಮುಂದೆ ಕಳೆದ 20 ವರ್ಷಗಳ ಹಿಂದೆಯೇ ನಿರ್ಮಿಸಿರುವ 65 ಅಡಿ ಎತ್ತರದ ಸಿಮೆಂಟ್ ಮತ್ತು ಕಬ್ಬಿಣದಿಂದ ನಿರ್ಮಿಸಲಾಗಿರುವ ಮೂರ್ತಿ ಶಿಥಿವಾಗಿರುವ ಹಿನ್ನೆಲೆಯಲ್ಲಿ ಗ್ರಾಮಸ್ಥರು ಒಗ್ಗೂಡಿ ಏಕಶಿಲಾ ಕಲ್ಲಿನಿಂದ ಆಂಜನೇಯಸ್ವಾಮಿಯ ಮೂರ್ತಿ ಕೆತ್ತನೆ ಮಾಡಿಸಲು ತೀರ್ಮಾನಿಸಿದ್ದಾರೆ. ಅದರಂತೆ ಬಾಗೇಪಲ್ಲಿಯಿಂದ 25 ಅಡಿ ಎತ್ತರದ ಆರೂವರೆ ಅಡಿ ಅಗಲ ಹಾಗೂ 5 ಅಡಿ ದಪ್ಪವಿರುವ ಸುಮಾರು 70 ಟನ್ ತೂಕ ಹೊಂದಿರುವ ಕಲ್ಲನ್ನು ತರಿಸಿ ಕೆತ್ತನೆ ಕೆಲಸಕ್ಕೆ ಸಿದ್ಧತೆ ಮಾಡಿಕೊಳ್ಳಲಾಗಿದೆ.

ಬಾಗೇಪಲ್ಲಿಯ ಬಾಗೇಕಲ್ಲು ಅಥವಾ ಗೂಳೂರು ಎಂದು ಕರೆಯಲಾಗುವ ಈ ಕಲ್ಲು ಮೂರ್ತಿ ಕೆತ್ತನೆಗೆ ಯೋಗ್ಯವಾಗಿದೆ. ಶ್ರೀರಂಗಪಟ್ಟಣ ತಾಲೂಕಿನ ಕಿರಂಗೂರು ಗ್ರಾಮದ ಶಶಿಧರ್ ಆಚಾರ್ ಅವರು ಮೂರ್ತಿ ಕೆತ್ತನೆಯ ಕೆಲಸದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ. ದೇವಸ್ಥಾನದ ಮುಂಭಾಗದಲ್ಲಿರುವ ಸಿಮೆಂಟಿನ ಆಂಜನೇಯಸ್ವಾಮಿ ಮೂರ್ತಿಯನ್ನು ತೆರವುಗೊಳಿಸಿ ಐದಾರು ತಿಂಗಳಲ್ಲಿ ಅಭಯ ಹಸ್ತ ತೋರುವ ಕಲ್ಲಿನ ಆಂಜನೇಯಸ್ವಾಮಿ ಮೂರ್ತಿ ಕೆತ್ತನೆ ಕಾರ್ಯ ಪೂರ್ಣಗೊಳ್ಳಲಿದೆ. ಐದು ಅಡಿ ಎತ್ತರದ ಪೀಠದ ಮೇಲೆ ಮೂರ್ತಿ ಕೆತ್ತನೆ ಮಾಡಲಾಗುವುದು.

ದೇವಸ್ಥಾನದ ಆವರಣಕ್ಕೆ ಕಲ್ಲು ಆಗಮಿಸುತ್ತಿದ್ದಂತೆ ಗ್ರಾಮಸ್ಥರು ಒಗ್ಗೂಡಿ ಮೂರ್ತಿ ಕೆತ್ತನೆ ಕಲ್ಲಿಗೆ ಪೂಜೆ ಸಲ್ಲಿಸಿದರು. ಬಾಗೇಪಲ್ಲಿಯಿಂದ ಸುರಕ್ಷಿತವಾಗಿ ಕೆತ್ತನೆ ಕಲ್ಲನ್ನು ತಂದ ಲಾರಿ ಚಾಲಕ ಹಾಗೂ ಶಿಲ್ಪಿ ಶಶಿಧರ್ ಆಚಾರ್ ಅವರನ್ನು ಸನ್ಮಾನಿಸಲಾಯಿತು. ಕೆತ್ತನೆ ಕಾರ್ಯ ಯಶಸ್ವಿಯಾಗಿ ನೆರವೇರಲೆಂದು ಪ್ರಾರ್ಥಿಸಲಾಯಿತು.

ಗ್ರಾಮಸ್ಥರಾದ ಕೃಷ್ಣ(ಜಲೀಲ್), ವಸಂತ, ನಾಗೇಂದ್ರ, ಕೆ.ಗಿರೀಶ್, ಕೆಂಚೇಗೌಡ, ಮಂಜುನಾಥ್, ಸಂಗಾಯ್, ಗ್ರಾಮದ ಯಜಮಾನರು ಸೇರಿದಂತೆ ಇತರರು ಇದ್ದರು.