ವೇದಗಳಿಂದ ಆರಂಭವಾಗಿ ಎಲ್ಲ ಉಪನಿಷತ್ತುಗಳು, ಧರ್ಮಶಾಸ್ತ್ರ ಗ್ರಂಥಗಳು, ರಾಮಾಯಣ, ಮಹಾಭಾರತ, ಸಕಲ ಪುರಾಣಗಳ ಭಾಷೆ ಸಂಸ್ಕೃತವೇ ಆಗಿದೆ. ಅಷ್ಟೇ ಅಲ್ಲದೆ ಮಹಾ ಕಾವ್ಯಗಳು, ನಾಟಕಗಳು, ವ್ಯಾಖ್ಯಾನ ಗ್ರಂಥಗಳ ಪರಂಪರೆಯೂ ಕೂಡ ಇದರ ತಳಹದಿಯಲ್ಲಿಯೇ ಬಂದಿವೆ. ವ್ಯಾಕರಣ, ಗಣಿತ, ಜ್ಯೋತಿಷ್ಯ, ಆಯುರ್ವೇದ, ವಾಸ್ತುಶಾಸ್ತ್ರ, ಶಿಲ್ಪಶಾಸ್ತ್ರ, ಅರ್ಥಶಾಸ್ತ್ರ, ರಾಜನೀತಿ ಮೊದಲಾದ ಪ್ರಾಚೀನ ಶಾಸ್ತ್ರಗಳೆಲ್ಲವೂ ಸಹ ಸಂಸ್ಕೃತದಲ್ಲಿವೆ. ಅಷ್ಟೇ ಅಲ್ಲದೆ ನಕ್ಷತ್ರ ಮಂಡಲ, ಗ್ರಹಗಳು, ಸೂರ್ಯ ಚಂದ್ರರನ್ನೊಳಗೊಂಡ ಸಮಗ್ರ ಬಾಹ್ಯಾಕಾಶದ ಅನೇಕ ಗ್ರಂಥಗಳಿವೆ. ಇದು ಸಂಸ್ಕೃತ ಭಾಷೆಯ ವ್ಯಾಪ್ತಿ. ವಿಶ್ವಕ್ಕೆ ಅನೇಕ ಉಪಯುಕ್ತ ಸಂದೇಶಗಳನ್ನು ನೀಡುವಂತಹ ಶಾಸ್ತ್ರಗಳನ್ನು ಗರ್ಭದಲ್ಲಿಟ್ಟುಕೊಂಡಿದೆ ಸಂಸ್ಕೃತ ಭಾಷೆ.
