ಚಿಕ್ಕಬಳ್ಳಾಪುರ: ಆಧ್ಯಾತ್ಮಿಕ ಭಕ್ತಿ ಮತ್ತು ಪ್ರಾಮಾಣಿಕ ಶ್ರದ್ಧೆ ಮೇಲುಗೈ ಸಾಧಿಸಿದಾಗ ವಿಶ್ವದಲ್ಲಿ ಶಾಂತಿ ಮೂಡುತ್ತದೆ ಎಂದು ಸಣ್ಣ ನೀರಾವರಿ ಮತ್ತು ವಿಜ್ಞಾನ ಹಾಗೂ ತಂತ್ರಜ್ಞಾನ ಖಾತೆ ಸಚಿವ ಎಸ್.ಎನ್.ಬೋಸರಾಜು ಅಭಿಪ್ರಾಯಪಟ್ಟರು.
ತಾಲೂಕಿನ ಮುದ್ದೇನಹಳ್ಳಿಯಲ್ಲಿ ಹಮ್ಮಿಕೊಂಡಿರುವ ದಸರಾ ಮಹೋತ್ಸವ, ನವರಾತ್ರಿ ಹೋಮ, ಮಹಾರುದ್ರ ಯಾಗ ವೇದಿಕೆಯಲ್ಲಿ ಬುಧವಾರ ಮೇಧಾ ದಕ್ಷಿಣಾಮೂರ್ತಿ ಮತ್ತು ಸರಸ್ವತಿ ಹೋಮದ ಪೂರ್ಣಾಹುತಿಯಲ್ಲಿ ಭಾಗವಹಿಸಿ ಮಾತನಾಡಿದರು.
ಪುರಾಣ ಇತಿಹಾಸಗಳು ಸಂಸ್ಕೃತಿ, ಆಚಾರ ವಿಚಾರಗಳು ಸಾಗಿ ಬಂದಿರುವುದರ ಬಗ್ಗೆ ಮಾರ್ಗದರ್ಶನ ನೀಡುತ್ತವೆ. ಇವುಗಳ ಆಧಾರದ ನಂಬಿಕೆ ಮತ್ತು ಆಚರಣೆಗಳು ಬಲಗೊಳ್ಳುತ್ತಾ ಹೋದಂತೆ ಸಾಮರಸ್ಯ ಮೂಡುತ್ತದೆ. ಹಾಗೆಯೇ ಶಾಂತಿ ನೆಲೆಸುತ್ತದೆ ಎಂದರು.
ಸಕರ್ಮಗಳೂ ದೊಡ್ಡ ಯಾಗದಂತೆ: ಯಜ್ಞಾಧ್ಯಕ್ಷತೆ ಮತ್ತು ಮಹಾ ರುದ್ರಯಾಗ ಸಾನಿಧ್ಯ ವಹಿಸಿದ್ದ ಸದ್ಗುರು ಶ್ರೀ ಮಧುಸೂದನ ಸಾಯಿ ಮಾತನಾಡಿ, ಭಕ್ತಿಯಿಂದ ಅರ್ಪಿಸಿದ ಪ್ರತಿಯೊಂದು ಸಕರ್ಮಗಳು ದೊಡ್ಡ ಯಾಗವೇ ಆಗಿರುತ್ತದೆ. ಒಳ್ಳೆಯ ಕಾರ್ಯಗಳು ಭಗವಂತನದ್ದಾಗಿರುತ್ತದೆ. ಇಂತಹ ಪುಣ್ಯ ಕಾರ್ಯದಲ್ಲಿ ಭಾಗವಹಿಸಿದಾಗ ಜೀವನಕ್ಕೆ ಸಾರ್ಥಕತೆ ಬರುತ್ತದೆ ಎಂದರು. ಸಂಸ್ಕಾರ, ಸಂಸ್ಕೃತಿ, ಪರಂಪರೆಯನ್ನು ರಕ್ಷಿಸಿ ಪೋಷಿಸುವುದು ಕೂಡ ಧರ್ಮ. ತೋರಿಕೆಯ ಯಾವುದೇ ಕಾರ್ಯಗಳು ಸತ್ಫಲ ನೀಡುವುದಿಲ್ಲ. ಇನ್ನು ಆಚಾರ ವಿಚಾರಗಳು ನಿಂತ ನೀರಾಗದೇ ನಿರಂತರವಾಗಿ ಪ್ರವಹಿಸಬೇಕು ಎಂದರು.
ಸಚಿವ ಚಲುವರಾಯಸ್ವಾಮಿ, ಸತ್ಯಸಾಯಿ ಮಾನವ ಅಭ್ಯುದಯ ವಿಶ್ವವಿದ್ಯಾಲಯದ ಕುಲಾಧಿಪತಿ ನರಸಿಂಹಮೂರ್ತಿ, ಜಿಲ್ಲಾಧಿಕಾರಿ ಪಿ.ಎನ್.ರವೀಂದ್ರ ಮತ್ತಿತರರು ಇದ್ದರು.
