ಭಾರತೀಯ ಜೀವನ ಮೌಲ್ಯ ಜಗನ್ಮಾನ್ಯ: ಪುತ್ತಿಗೆ ಶ್ರೀ

ಉಡುಪಿ: ಭಾರತೀಯ ಜೀವನ ಮೌಲ್ಯ ಜಗನ್ಮಾನ್ಯವಾಗಿದೆ. ಆದರೆ ದೀಪದ ಕೆಳಗೆ ಕತ್ತಲು ಎಂಬಂತೆ ಮೂಲನೆಲೆ ಭಾರತದಲ್ಲೇ ಅಜ್ಞಾನ ಆವರಿಸಿದೆ. ಹೀಗಾಗಿ ಭಾರತೀಯ ಸಂಸತಿ, ತತ್ವಜ್ಞಾನವನ್ನು ಯುವಪೀಳಿಗೆಗೆ ಪರಿಚಯಿಸುವುದು ಇಂದಿನ ಅಗತ್ಯವಾಗಿದೆ ಎಂದು ಪರ್ಯಾಯ ಪುತ್ತಿಗೆ ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಹೇಳಿದರು.

ಕೃಷ್ಣ ಮಠ ಹಾಗೂ ಪರ್ಯಾಯ ಪುತ್ತಿಗೆ ಮಠ, ನಿಟ್ಟೆ ವಿವಿ ಆಶ್ರಯದಲ್ಲಿ ಭಾರತೀಯ ದರ್ಶನಗಳಲ್ಲಿ ದೇವಾಲಯಗಳ ಪ್ರಾಮುಖ್ಯತೆ ಕಾರ್ಯಾಗಾರ ಉದ್ಘಾಟಿಸಿ ಮಾತನಾಡಿದರು.

ಪ್ರಾಚಿನರ ಚಿಂತನೆ ಉತ್ಕ್ರಷ್ಟವಾಗಿದ್ದು, ಪಾಶ್ಚಿಮಾತ್ಯರು ಈ ಬಗ್ಗೆ ಅಧ್ಯಯನಮಾಡಿ ತಮ್ಮ ಹೆಸರಿನಲ್ಲಿ ಪ್ರಚುರಪಡಿಸಿದ್ದಾರೆ. ಹಿಂದಿನ ಕಾಲದಲ್ಲಿ ಜನಜೀವನ ದೇವಸ್ಥಾನ ಕೇಂದ್ರಿತವಾಗಿತ್ತು. ಬದುಕು ಆಧ್ಮಾತ್ಮ ಕೇಂದ್ರವಾಗಿತ್ತು. ಅಧ್ಮಾತ್ಮಿಕ ವಿದ್ಯೆ ಇಲ್ಲದೆ ವ್ಯಕ್ತಿತ್ವ ಪರಿಪೂರ್ಣವಾಗುವುದಿಲ್ಲ. ಲೌಕಿಕ ಗುರಿಗಳು ತಾತ್ಕಾಲಿಕವಾಗಿದ್ದು, ಅಧ್ಮಾತ್ಮಿಕ ಉನ್ನತಿಯೇ ಮನುಷ್ಯನ ಪ್ರಧಾನ ಉದ್ದೇಶವಾಗಿರಬೇಕು ಎಂದು ಶ್ರೀಗಳು ಹೇಳಿದರು.

ಬರಹಗಾರ ಸುರೇಂದ್ರನಾಥ್​ ಬೊಪ್ಪರಾಜು ಮಾತನಾಡಿ, ದೇವಸ್ಥಾನಗಳು ಇಂಜಿನಿಯರಿಂಗ್​ ಅದ್ಭುತಗಳಾಗಿವೆ. ದೇವಸ್ಥಾನಗಳು ಕೇವಲ ಧಾರ್ಮಿಕತೆಗೆ ಮಾತ್ರ ಸೀಮಿತವಾಗದೆ ಖಗೋಳ ಶಾಸ್ತ್ರ, ಕೌಶಲ್ಯ, ಸಮಕಾಲೀನ ಜನಜೀವನದ ಬಗ್ಗೆ ಬೆಳಕು ಚೆಲ್ಲುತ್ತವೆ. ಇವುಗಳು ಸುತ್ತಮುತ್ತಲಿನ ಪರಿಸರದ ಆರ್ಥಿಕ ಚಟುವಟಿಕೆಯ ಕೇಂದ್ರಸ್ಥಾನಗಳಾಗಿದ್ದವು. ಹಿಂದಿನ ಕಾಲದಲ್ಲಿ ದೇವಸ್ಥಾನಗಳಿಗೆ 7 ಬಗೆಯ ಕಲ್ಲುಗಳನ್ನು ಬಳಕೆ ಮಾಡಿರುವುದು ಸಂಶೋಧನೆ ಮೂಲಕ ತಿಳಿದು ಬಂದಿದೆ ಎಂದರು. ಕಿರಿಯ ಶ್ರೀ ಸುಶ್ರೀಂದ್ರ ತೀರ್ಥ ಸ್ವಾಮೀಜಿ ಉಪಸ್ಥಿತರಿದ್ದರು. ನಿಟ್ಟೆ ವಿವಿ ಕುಲಪತಿ ಡಾ. ಎಂ.ಎಸ್​. ಮೂಡಿತ್ತಾಯ, ಹಿರಿಯ ಸಂಶೋಧಕ ಡಾ. ಶ್ರೀಪತಿ ತಂತ್ರಿ, ದಿವಾನ್​ ನಾಗರಾಜ ಆಚಾರ್ಯ, ವಿದ್ವಾನ್​ ಪ್ರಸನ್ನ ಆಚಾರ್ಯ, ರಮೇಶ್​ ಭಟ್​ ಮೊದಲಾದವರು ಉಪಸ್ಥಿತರಿದ್ದರು. ನಿಟ್ಟೆ ವಿವಿ ಐಕೆಎಸ್​ ವಿಭಾಗದ ಸಂಚಾಲಕ ಡಾ. ಸುಧೀರ್​ ರಾವ್​ ಸ್ವಾಗತಿಸಿ, ಡಾ. ಗೋಪಾಲಾಚಾರ್ಯ ಕಾರ್ಯಕ್ರಮ ನಿರೂಪಿಸಿದರು.